Войнань иттне
Груша стирнясь шачсь Песочнай Конак велеса, оцю семияса, кемонь иттнень эзда ульсь ветецесь. Семияснон лувозь кулакокс и сявозь сембе козяшиснон: алашать, тракскять, учатнень и сараскятненьге. Састь сяшкава ваче шитне, иднятнень пильгонясна таргозькшнесть, кода тумонят, а сельмонясна исть няе шоподаста. Ниле иднясна шис ашесть ладе.
Тага сась оцюдонга оцю беда. Война. Моданять - матанять, моданять - тряйнять ушедсть сязендема бомбат, снарятт. Алясна и братсна, Спиридон, тусть шачем масторть аралама. Груша школав омбоце классти ашезь моле, ванезе емла братканц. Войнась шинек - венек шувсь калмот. Синь семиязостка сась равжа серма. Сандань седиень пети поланяц, иднянзон алясна куду аф сай, шавовсь. Лама пинге тядясна явсесь, иттневок аварьтькшнесть мархтонза. Тяни аляснон синь мзярдовок аф няйсазь, калмаф Ростовскяй областьса, Новоселовка хуторса.
Кемонь кизоса Груша шинь стямать эзда ушедозь, позда илядьс аканзон мархта ряцок работакшнесь колхозонь паксятнень эса, тингонь и тише лядема лангса. А выходнойста якасть Темникав ошти, ярмаконянь добувама, ломаненди шувсть перет. Конакста ошу якасть кяпе. Карьснон карьсезь аньцек Темникав ошть маласа, ванфнезь. Пеньгатка вири тялоти аканзон мархта синць якасть аноклама. Спиридон теест ашезь помагава, войнаста сась ляценьф копорьса, якась инвалиднай каляскаса. Войнань сярятьфонза сяшкава оцюфтольхть, эрясь аньцек колмогемонь киза.
Шуфттнень лангс ашкодсь мазы сянгяря зиблек, и шкайсь кандсь Победа! Очижись и сяськомашись куломозонза ульсть Грушань кафта самай оцю иланза. А пяк стака кельме и вачеда войнань пингть лятфтамста, сельмеведенза шудезь шудесть. Пока эрясь, эрь сускомнять ванфнезе. И церькову путнесь штатолнят алянц и кулоф брадканзон, аканзон инкса.
Эрясь сон Темникавса. Мирденц мархта касфць кафта итть. Нилегемонь колма кизоса лядсь вдовойкс. Сембе семиянц пуропнезе, ладяфтозе. Библиотекаса седиень путозь покодьсь, урядакшнесь колмогемонь кафкса кизот. Цебярь работанкса теенза макссть медаль «Ветеран труда». А Кафтатежянь нилеце кизоня макссть удостоверения «Ветеран войны». Кота кизода меле Аграфена Серафимовна кулось.
Фотографияса: Аткиттнень семикасна
Натали ИВОЛГИНАСЬ