Монь тиринь Ёнксом
Сыре ломантнень эрямост паролгавтомга Покш Игнатбуень Ветеранонь советэсь важодеманзо лади вейсэ райононь администрациянть, эрицятнень социальной ванстомань учреждениянть ды лия общественной организациятнень марто вейсэ. Тесэ эрицятнень ютксто 44 % пенсионерт. Улить истяткак, кинь мельга якить социальной роботникть, тенст максыть лезкс волонтерт ды тимуровецт. Диспансеризациянь ютамонь шкастонть медицинасо важодицятне сыре ломантнень содавтсть ды ванкшность витьстэ кудосост. Истя жо ломантненень сакшность правань ванстыця органонь сотрудникть. Манчемань тевтнень а нолдамга ютавтсть мартост кортамот. Ютазь иестэ сыре ломанень ковонтень Андреевка велень пенсионертнэнень райононь Ветеранонь советэнть вельде явозельть 140 750 целковойть Владимир Васильевич Литюшкин спонсоронть пельде. Мельтеме а кадовить лиятнеяк. Истя, Ветеранонь советс совицятне, райононь администрациянь представительтне ды эрицятнень социальной ванстомань управлениянь важодицятне вейсэ весенень, кинень топодить 90, 95, 100 иеть, явшить поздоровонь сермат ды ледстнемань казнеть. Сыре ломанень ковонть ютавтомсто эрицятнень социальной ванстомань учреждениянь важодицятне, райононь Ветеранонь советэнь представительтне вастневсть малав 200 ломань марто. Истя, лезкс максозель малав 1000 ломаннень, весемезэ 218 971 целковой. Патриотической лувсо од ломантнень кастомга Ветеранонь организациятне кеме сюлмот кирдить школасо тонавтницятнень ды тонавтыцятнень марто. Сынь сеедьстэ эрсить сеть мероприятиятнесэ, конат алтавить патриотической лувсо одтнэнь кастомантень. Невтемакс, мелят сынь ульнесть «День памяти неизвестного солдата», «День вывода советских войск из Афганистана», «Георгиевская лента», «День памяти и скорби» ледстнемань вастовоматнесэ ды «кругловой стольтнесэ». Эрьва иестэ Ветеранонь советэсь покш мель яви Ине Изнямонь чинтень анокстамосо ды ютавтомасо. Свал якить велень весе поселениятнес, башка велетнес, косо улить Ине Отечественной войнасо маштовозтненень алтазь кеврунгот ды обелискть, путыть цецят, каштазт. Районсонть, общеобразовательной школатнень юрсо, улить волонтеронь колмо отрядт. Течинь чинтень райононть территориясо Ине Отечественной войнасо маштовозтненень стявтозь 20 кеврунгот ды те енксонь воинтнэнень 2 обелискть. Волонтертнэнь васень тевест – сынст ваньксстэ кирдемась. Тень мельга ваныть ды те тевенть эрявиксчидензэ тенст евтнить ветерантнэ. Неень шкане ламот тосо эрицятнень ютксто участвовить специальной военной операциясо. Райононь малав весе эрицятне лездыть малавгавтомс Изнямонь чинть, сынст эйстэ а кадовить ветерантнэяк. Сынь кандыть ярсамо- ды оршамопельть, надобият, сермат… Пенсионертнэ ды школасо тонавтницятне эрьва чистэ пурнавкшныть воинтнэнь туртов кекшемань алтымань кодамо. СВО-сто велявтыця нурька шкас оймсеме боецтнэ сакшныть сеть патриотической мероприятиятнес, конат ютавтовить школасо, библиотекасо вейсэ ветеранонь организацияс совицятнень марто. Кортамось юты патриотизмадо, масторонть икеле долгонть топавтомадо, тиринь тарканть вечкемадо. 2025 иестэ панжозельть мемориальной лазт, конат алтазельть СВО-со маштовозь воинтнэнень. Одсто важодеме тонавтомадо Иень перть ютавтозельть ламо вастовомат ветерантнэнь-наставниктнень Покш Игнатбуень школасо тонавтницятнень марто. Вейсэ кодасть кекшемань алтымат, анокстасть окопонь эждиця штатолт. Сехте покш мелесь явовсь седейшкавань кортнематненень, вейке-вейкень марямонтень ды кунсоломантень. «Движение Первых» организациянь активисттнэ вейсэ од ломантнень тевест коряс инспекторонть И.Н. Галанова ды Ветеранонь советэнь прявтонть С.В. Пьянзина марто прасть вейке мельс волонтеронь тевтнень виевгавтомадо. Неень шкане сынь лездыть пенсионертнэнень ловонь ванськавтомасо, икелепелев тундосто сексес арсить кудоютконь ды садпирень тевтнесэ лездамо. Ютазь иень сентябрясто пенсионертнэнь ютксо теезельть «Лучшее подворье» пелькстамонть коряс цетавкст. Сехте паро вете семиятне, кить лиссть изницякс, казезельть грамотасо ды «Восход» газетанть лангс питневтеме сермадстомасо. Шумбрачинь иеденть 2026 иесь минек республикасо алтави шумбрачинь ванстомантень-витемантень. Покш Игнатовань райононь эрицятне те эрявикс тевентень свал явить покш мель. Истя, 2025 иестэ саезь Ветеранонь советэнть юрсо ушодызе важодеманзо «Вектор здоровья» тейтерьавань клубось. Прявтокс кармась Ветеранонь советэнь бюронь членэсь Р.И. Байтякова. Раиса Ивановна – аволь ансяк гимнастикань ветиця, истя жо ловны лекцият ярсамонь, витаминотерапиянь, фитотерапиянь коряс. Эдь ансяк шумбра эрямо лувонть ветязь, кувалгавтови ды паролгавтови пингенек.