Монь тиринь Ёнксом
«Умный ДОМ» Покш Игнадбуень ловнома кудосо ловныцятне пек сеедьстэ кевкстнить книгат, конатне сермадозь тиринь эрзянь кельсэ. Свалшкава мельстуезь ловныть Кузьма Абрамовонь книгатнень: «Исяк якинь Найманов», «Велень тейтерь», «Эрзянь цера», «Эсеть канстось а маряви». Истяжо пек вечкевить минек енксонь сермадыенть Тамара Барговань евтнеманзо. Тамара Сергеевна келейстэ панжи Андрейвелень ломантнень икеле шкань эрямонь лувост. Эрзянь кельсэ литературась свалшкава одкстомтови Мордовиянь культурань Министерстванть вельде. Истяжо 2025 иестэ рамазель истямо литература од библиотекань фондонь пурнамсто. Эрзянь кельсэ ловныцятнень ютксто эряви тешкстамс Адушева Надежда Ивановнань, Семенова Людмила Владимировнань, Куприянова Александра Ивановнань, Жегалина Римма Дмитриевнань, Сонаева Татьяна Григорьевнань, Краснощекова Антонина Ефимовнань ды ламо лият. Ангелина ЕРМУШЕВА, Покш Игнадбуень ловнома кудонь прявтось