В. И. Ромашкиндэ ледстнема чокшне
Те шканть перть, зярс важоди В.И. Ромашкин лемсэ «Этно-кудо» музеесь, кодат ансяк инжеть тесэ арасельть! Свал, зярдо молят тов кодамояк покшчис, седеесь нармунькс либорды кенярксстонть: кие марто сави вастовомс течи?
Таштамковонь котоце чистэ мон нуцькан марто капшинь этно-кудов В.И. Ромашкинэнь чачома чинзэ тешкстамо. Теевсь паро коекс эрьва иестэ, таштамковонь котоце чистэ, ледстнемс Йовлань Олонь валдо лемензэ. Васолдо уш редия Т. Мокшановань, Россиянь сёрмадеень вейсэндявксонь членэнть. Сон ламоксть уш ульнесь те музейсэнть Мордовиянь од сёрмадейтнень марто, конат совить «Вал» литературань вейсэндявксонтень.
Ве пеле музыкань аппаратуранзо анокстась Бакич Видяй (Виктор Чичайкин). Цёрантень савсь ютамс зярыя вайгельбеть, штобу понгомс те вастовомантень.
Эсензэ тонавтницянзо марто Саран ошсто сась и Екатерина Модина, «Мерема» этно – фолк группань прявтось. Тесэ ульнесь Павел Мигуновгак, «Тюштянь налксематнень» прявтось. Ульнесть Вирь Тавла велень эрицяткак.
Васняяк весе пуромсть музень ортатнень лангс, Йовлань Олонь кев рунгонть ваксс. Рябов Пётр Владимирович, «Этно-кудо» музеень прявтось, панжизе В.И. Ромашкинэнь путовксонзо минек раськень культурантень, кодамо покш тешкс сон кадсь ламонь эрямос. Раиса Васильевна Водясова, музеень экскурсоводось, путсь кеврунгонтень цецянь пусмо.
Мейле весе ютасть менель ало музеентень ды ушодовсь. В.И. Ромашкинэнь содыцятнень ледстнематне «ветнесть» минек и омбо масторонь ошка, и Мордовиянь покш-вишкине ужинетнева (уголок), косо савсь улемс Владимир Ивановичнень эсензэ тонавтницянзо марто.
О.В. Гангеев, кона пек вадрясто содылизе В.И. Ромашкинэнь, ёвтнесь, кода ютнесть сынст концертэст, кодамо покш мельсэ кортась сон тиринь кельсэ ды бажась кирвазстемс вечкемань тол натой сетненень, кие овсе а содылизе эрзянь келенть.
Павел Мигуновонь ледстнеманзо коряс, самай Владимир Ромашкинэнь мереманзо коряс и ушодовсть «Тюштянь налксематне». Сонзэ лезксэнзэ ало неть налксематнес совавтовсь национальной колоритэсь, мезесь теи налксематнень мельстуицякс и покштнэнень, и вишкинетненень. Ней Павел Валерьевич «Налксеманзо» марто эрси эрьва косо. Но, косо бу сон а улевель, мельсэнзэ Вирь Тавла велесь, В.И. Ромашкинэнь лемсэ «Этно-кудо» музеесь, ков сон свал велявты паро мельсэ од вий мельга.
Екатерина Модинань лемдить «Ромашкинэкс юбкасо». Ды те а пеедькшнемань тев. Сон чачсь-кассь Пенза ёнксонь Вачелай велесэ. Эйкакшпингезэ а яви ламо лия эйкакшнэнь эйстэ: тонавтнесь школасо, лездась кудоютконь тевтнесэ. Ветеце классо тонавтнемстэ сёрмадстызе прянзо фольклоронь кужос. Тонавтыцясь сеске редизе тейтерненть морамонтень колчинзэ, секскак кармась сайнеме сонзэ эрьва кодамо пелькстамос. Вейксэце классо тонавтнемстэ понгсь «Торама» морамонь куронть концертэзэнзэ. Сонензэ истя вечкевсь ламовайгелень морамось, што макссь эстензэ вал: «Мон карман морамо те морокуросонть».
Нама, те сонзэ эйкакшонь мелесь топавтови: сон сы Саран ошов, карми тонавтнеме ды карми морамо те морокуросонть. Ансяк, видьстэ меремс, аволь кувать савсь морамс «Тораманть» марто… Сон пурны эстензэ морамокуро ды лемдясы сонзэ «Меремакс» («Сказание»). Сонзэ покш мелезэ ульнесь минек покштятнень-бабатнень кармавтомаст пачтямс неень шкань эрицятненень музыкань вайгеленть вельде. Ды те сонзэ пек парсте лиси. Екатерина Модина важоди и Н.П. Огарёвонь лемсэ госуниверситетсэ, косо тонавты од ломантнень раськень культуранть вечкеме, сонзэ ванстомо, мезес сонзэ тонавтызе В.И. Ромашкин.
Коень коряс, музеень важодицятне пурнасть лемень кундамонь стольгак. Тесэяк ледстнематне эзть прядово. Ламонь ульнесь мезе ёвтамс минек неень шкань Тюштядонть, Йовлань Олодо.
Весе неть кортамотнень марто, нама, тарка ульнесь музыкантеньгак. Эсензэ моронзо инжетнень туртов казинзе Бакич Видяй.
Нама, кодамо бу паро ломанесь илязо уле, муевить истяткак, кить бажить «рудазкавтомс» те ломаненть. Келя, мезекс кепедить истя Йовлань Олонь лемензэ, мезе сон истямонть тейсь? Видеяк, те ломанесь эзь панжо кодамояк лия мастор, эзь ливтне теште лангс, эзь путо покш мазый кудо, эзь ташта ламо ярмакт. Превей ломантне чарькодьсызь, што аволь теньсэ ломанень уцяскась. В.И. Ромашкин сюпаволь эсензэ бажамосонзо ванстомс раськень культуранть, кемекстамс сонзэ, тонавтомс эйкакштнэнь вечкеме эсест раськест, коест-кирдаст ды максомс те вечкеманть сыця шкань эрицятненень.
Секс вана и лисни, што ламонь туртов В.И. Ромашкин лемсэ «Этно-кудо» музеесь те – домка-домка лисьмапря, конань тантей кельме ведезэ максы ломантненень вий молемс икелев, теемс паро тевть ды кирвазстемс лиятненьгак седейс минек культурантень вечкемань тол.
Н. БАЛЯЙКИНА