Тиринь веледест арсезь
Кода минь якинек «Овтонь каямо чи» эрзянь коень кенярксчив.
Те кенярксчинть ютавтыть вана уш ветецеде Нижней ёнксонь Гагинань районсо Какина эрзянь велесэнть. Минек «Пизёлнэ» ансамблянь аватне тердезельть тозонь омбоцеде: васня якинек 2023 иень кизна, сестэ ульнинек ансяк ниленек, ды ней понгонинек тов малав весенек. Велень покшчись алтазель тундонь ильтямонтень, зярдо прядовильть видемань тевтне - кизэнь вастомантень. Минек автобусось лоткась Какинань клубонь кудонть ваксс. Тозонь пурнавсть ламо ломанть, конат мазыйстэ оршазь эрзянь ды рузонь оршамосо. Вастымизь Михаил Иванович Безаев, Какина велень эриця, пек ламо иеть эрзянь койтнень вельмевтемань коряс важодицясь.
Зярс учость лия сыцятнень эйсэ, минь карминек эрзянь моронь морсеме. Эйсэнек кунсолость, снимасть камерас.
Ды вана яволявтсть покшчинь панжомась. Какина велень аватне лиссть килеень тарадонь пусмо марто клубонть икелев. Аватне ветясть раськень оршамосо ды мазый каштазсо наряжазь тейтерьава. Покшчинь ветицясь кармась ёвтнеме, те койденть: «Зярдо-бути, келя, пек умок аватне тундонь прядовома шкасто мольсть вирев. Сынь пек пельсть вастомс вирьстэ овто. Вейкентень юткстост сась мель раксемс ялганзо марто. Сон салава мольсь тов, косо касыть килей чувтотне, синтресь тарадт ды понгавтнинзе эсензэ лангс – теевс пек покшокс, теке овто. Кармась пижнеме овто ладсо. Ялганзо васня тандадсть, мейле жо ветизь те «авака овтонть» велень куншкасо сёлтонтень ды каизь тов экшелеме. Сон тосо, шлявсь. Ваньськавтозь «овтонть» раськень моронь моразь ветнилизь велень ульцятнева., арсильть ломантненень паро. Вирень азорось - овтось эрзятненень свал ульнесь, кудораськень ванстыця, покш виень ды шумбрачинь кандыця тешксэкс.» Нейгак, наряжазь «овтонть» марто минь, весе пурнавозтне, теинек вейсэнь кирькс (хоровод), морынек «Вирев молян» раськень моронть, мейле весе, моронь морсезь, ютынек сёлтонтень (молемс мик 1,5 – 2 вайгельбеть).
Сёлговтонь ведь чиресэ лазсто теезь чалгамо таркасто (эрзякс мерить тензэ «надамо») «авака овтонть» эртизь ведьс. Те истя сонзэ лангсто ванськавтови весе апарось, берянесь. Ней сон ванькс, ды килеень тарадтнэ, конатнесэ сон оршазель, явшевсть весенень – кадык кандыть ломантненень лезэ.
Эрицятне кемить: килеень тарадтнэ, конатнес совась овтонть ойме виезэ, ней теевсть ванстывиевекс, апаронь тандавтыцякс. Сынь кармить ванстомо ломантнень кудост, кардазост ды улипарост.
Ведьсэ ваньскавтомадо мейле весе пурнавить вирьпулонть ваксс, косо, теезь сценанть лангсо, панжовсь регионъютконь фестивалесь.
Павел Кондаков, Гагинань муниципальной округонь самоуправлениянь прявтось кортась: «Те мероприятиясь минек чопавти минек пек умонь иетнес, невти, кода ульнесь ютазь шкань иетнестэ. Миненек тень эряви ванстомс. Те минек коенек-кирданок».
Ушодовсь концертэсь, косто гайгсть эрзянь ды рузонь морот. Минь морынек «Позяря», «Листя, листяка» ды «Мейс тон, Дуня?» раськень моронок. Койсэнь, сынь вечкевсть кунсолыцятненень. Мон ёвтынь сюконямонь валт Мордовиянь ды минек райононть пельде фестивалень теицятнень истямо паро тевенть ды тердеманок кис. Ловныя П.К.Любаевень «Ванстодо мирэнть!» валморонзо. Миненек казсть Шнамонь конёв, чувтосто керсезь овтонь рунго кедьтеевкс. Инжетнесэ каванясть пек тантей шулюмкасо (модарька марто сывелень ямсо). Эйкакштнэнень теезь налксема таркасто марявсть раксемань ды кецямонь гайтть. Минь покш мельспаросо туинек кудов, ансяк эзь прядово покшчись. Кенярксчив састь сеть эряцятнеяк, конат эрьва кодамо тувталонь коряс (по причине) тусть ошов. Лембе вастомат, седейшкава кортамот, киштемат, морамот…
Те коесь ней ютавтови Какинасо эрьва ие. Сыть кудов ошсто ды лия таркасто, ков сравтовсть кудораськест эйстэ, ломантне, вастовить малавиксэст марто, ледстясызь сетненьгак, конат тусть юткстост тоначив.
Истя ютась те покшчись. Кадовинек покш мельспаросо. Кортыть, ярмакт те кенярксчинь ютавтомс макссть Какинань сюпав ломантнеяк. Те пек паро тевесь!
Какинасо кемить: зярс ломантне явшить вейке вейкест туртов «овтонь виенть», зярс пейдить ды налксить эйкакштне, ды сыренек-однэк весе кирдить мельсэ-превсэ кезэрень койтнень, велесь карми эрямо, сонзэ оймезэ а ёми. Паряк, истя улезэяк!
Римма Жегалина, «Пизёлнэ» ансамблясо морыця