Национальная тематика: Эрзянь келень Чиденть Чадыковонь 14-це чистэ школасонок ютавтозель районной фестивалесь, кона алтазель эрзянь келеньЧинтень
Национальная тематика: Эрзянь келень Чиденть
Чадыковонь 14-це чистэ школасонок ютавтозель районной фестивалесь, кона алтазель эрзянь келеньЧинтень
Можнавидестэ евтамс, што апрелень 14-це чись удалась эрьва ендо. Ушосонть ульнесь лембе, эждясь чипаесь, а школазонок уш кеменце часстнэнень пурнавкшность ламо инжеть. Крыльця лангсо эйсэст вастасть эрзянь оршамосо наряжазь минек тонавтницятне. Сынь евтасть сыцятненень лембе валт ды казсть тенст мазый сувенирт.
Фестиваленть лангс сакшность районной образованиянь представительтне: Т. Н. Васина, Г. Н. Филина. Примасть участия мик весе начальной, основной ды средней школань тонавтницятне, башка тарка тенень явсть и КДЦ-тне.
Мероприятиясь ушодовсь сеньстэ, што паро лембе валт евтась Шокшинской сель-ской администрациянь прявтось Д. М. Шиндаков. Сон кортась седе, што эрзятне эрить эрьва косо, што весе минек велетне малавикст, што эряви свал кирдемс вейсэ. Остаткакс Дмитрий Михайлович весенень евтась шумбрачи ды войнавтомо эрямо.
Мейле максозель вал М. И. Шемякинанень, эрзянь келень ды мордовской литературань тонавтыцянтень. Сон евтнесь седе, кодамо покш проблема марто сави вастовомс эрзянь келенть тонавтомсто. Ламо эйкакшт аволь покш мель явить те предметэнтень. Сынь а чарькодить, што бути минсь кадсынек эсенек келенть, то мокшэрзянь нациясь еми. Секскак эсенек келенть сави ванстомс. Минь – эрзятано!
И вана сась шкась, зярдо сцена лангс лиссть анокстазь эрзянь номерэст марто тонавтницятне. Те иестэнть эрьва школанть ендо ульнесть невтезь сцена лангсо налксемат, евтнезельть стихотвореният, моразельть гайтев мокшэрзянь морот, невтнесть танецт. Башка можна явомс и сень, што весе эйкакштнэ (рузонь ды эрзянь школатнестэ) оршазельть национальной оршамосо.
Покш робота ветяви эрзянь келенть коряс и КДЦ – сэ. Аволь васенцекс минек эйсэ кенярдовтыть эсест эрзянь моротнесэ Сокав велень КДЦ – со важодицятне. Сынст «Валдоня» ансамблясь, козонь совить (Тангаева В. К., Мурашева И. В., Матвеева О. Ф., Бабина М. П., Овчинникова М. В., Дуброва Т. В.), содавикс аволь ансяк районсо, но и республикасояк.
Эсензэ активностензэ невтизе и Шокша велень КДЦ-сь. Национальной шокшинской костюмсо оршазь, эрзянь стихотворения евтнесь методистэсь Слезкина Ж. В.
Интереснойстэ арсизь эсест выступленияст Кураевасто начальной школась ды КДЦ-сь. Сынь евтнесть стихть ды морасть. Вадрясто морасть!
Эрзянь морост марто инжетнень икеле выступась и районной КДЦ-нь представителесь.
Ламо лембе валт весе участниктненень евтась администрациянь Прявтонть заместителесь – социальной роботанть коряс управлениянь начальникесь Т. Н. Васина. Татьяна Николаевна евтась сюкпря фестивалень организатортнэнень (Шиндаков Д. М., Каторова Г. М.), весе участниктненень. Васина Т. Н. мерсь, што истят вастовоматне важнойть ды эрявикст.
Эсень ендо евтан, што мероприятиясь удалась ветес. Весе анокстасть седейстэ, эрзянь келенть вечкезь. Секскак, зярдо мероприятись прядовсь, школань директорось Каторова Г. М. весе участниктненень казсь благодарственной сермат.
Эрзянь келень тонавтыцясь МБОУ «Шокшинской СОШ» ШЕМЯКИНА М. И.