Национальная тематика: ФЕТИСОВ Сергей Григорьевич (1923-1983)
ФЕТИСОВ Сергей Григорьевич (1923-1983)
1941-це иень аштемковонь 22-це вене се шкань школань ламо прядыцятне якасть морсезь ушова, кеняркшнесть уцяскав эрямонтень. Кияк эзь арсеяк: рана валске ушодови война. Но истя лиссь.
Школань прядыцятнень ютксто аволь ламонень савсь велявтомс войнасто. Кить велявтсть, сеть томбазельть-ранязельть, пицезельть войнань толсонть. Сынст ютксоль Фетисов Сергей сержантоськак.
Войнань стака китнеде, тиринь мастордо С.Г. Фетисов ёвтни содавикс произведениясонзо — «Шумбрат» ромасонзо (седе мейле нолдазель «Хмара» лементь ало). Эйсэнзэ ёвтневи Никифор Тараскинэнь – Зубово-Полянской райононь мокшонь цёранть – ды ялганзо, Украинасто подпольщиктнень, тевдест. Войнань темантень истя жо алтазь «Домик на окраине» повестезэ.
Теде башка, С. Фетисовонь лиссть «Памятные годы», «Место в жизни» ёвтнемань пусмонзо. Васенцесэнть ёвтневи Мордовиясо советэнь властенть ладямодо, омбоцесь алтазь од ломантнень войнадо мейлень а шожда тевезэст.
Пек содавиксэкс теевсь С.Г. Фетисовонь «Я живу в Мордовии» книгазо. Сон васня 1978-це иестэ лиссь Московсо «Советская Россия» издательствам, мейле – 1983-це иестэ поладкс марто – Саранскойсэ. Эйсэнзэ художественной кельсэ-валсо невтеви республиканть чачозо. Ёвтневи эрзятнень ды мокшотнень эрямопингедест, Мордовиянь пертьпелькстэнть, Степан Эрьзя ине скульптордонть, содавикс лия ломантнеде.
«Осенние звёзды» пьесанзо коряс спектаклясь а весть путневсь Мордовиянь драматической театрань сцена лангсо. Сонзэ эйсэ ёвтнемась моли зыянов тевтнеде, конат лиссть 1918-це иестэ Пензенской губерниянь Саранской уездэнь Лада велесэ.
Сергей Григорьевич Фетисов чачсь 1923-це иень панжиковонь 23-це чистэ Брянской областень Севск ошсо служащеень семиясо. Кода уш вере меринек, школань прядомадо мейле тусь фронтов. Васня ульнесь рядовоекс, мейле — стрелковой отделениянь командирэкс. Стакасто ранязель. Казезь Славань 3-це степенень орденсэ, ламо медальсэ.
Войнадо мейле прядызе Ленинградской государственной университетэнь филологиянь факультетэнть. Важодсь литературной сотрудникекс Тамбовонь ды Саранскоень газетань зярыя редакциясо.
Лововсь виев журналистэкс. Газетасо важодемстэ эзизе кадно прозаической произведениянь сёрмадомантькак. Эрямонть парсте содамось лездась С. Г. Фетисовнень сёрмадомс виев произведеният. А стяко сонзэ книганзо, конат лиснесть зярыя тёжань тиражсо, кувать эзть кирдевкшне книгань лавкатнесэ.
1964-це иестэ Сергей Григорьевич Фетисов примазель СССР-нь Писателень вейсэндявксос.
Кулось 1983-це иень чадыковонь 10-це чистэ. Калмазь Саранскойсэ.
Портретэнть теизе
В. ФЕДЮНИН