Национальная тематика: МОКШАНОВА Татьяна Петровна (1984)
Татьяна Мокшанова (мирдень коряс Швецова) Мордовиянь томбальдель, товолдоль, косо тагозярдо чавозевсь литературанок лисьмапрясь.
Т. Мокшанова чачсь 1984-це иестэ якшамковонь 9-це чистэ Самара ёнк- сонь Шенталань буень Баганя (Багана) велесэ (те веледенть ледстневи эрзянь фольклорсояк, литературасояк). Семиясост сон ветеце эйкакш. Весень марто тетяст-аваст кортасть тиринь кельсэ.
Баганясо Татьяна прядызе средней школанть. Тонавтнемстэ ушодсь сёр- мадомо стихть, васня рузонь кельсэ, мейле эрзякскак. Эрзянь валморонзо кармась кучнеме «Чилисема» журналонь редакцияв. Курок тердизь Саранов од сёрмадыцянь семинарс. Ды истя ульнесь зярыя иень перть.
Тонавтнесь Н. П. Огарёв лемсэ МГУ-нь филфаконь эрзянь отделениясо, конань прядызе 2006-це иестэ. Те шканть перть эзизе кадно сёрмадоманзо, секе тев печатавсь эрзянь эйкакшонь жур- налсонть. 2006-це иень кизэстэнть сась тей роботамо редакторокс.
Т. Мокшановань валморонзо совасть «От Урала до Невы» (2001), «Первая капель» (2005), «Монь вайгелем» (2005), «Литературный сентябрь» (2006), «Эскелькс» (2008), «Эрзянь валске» (2011), «Тешке» (2014) вейсэнь пусмотнес. Сёрмады эсензэ ладсо, седейшкава, виевстэ. Секс 2006-це иестэ Мокшанова Татьянанень максозель од сёрмадыцятнень туртов Мордовия Республикань прявтонь литературань премиясь.
Саранскойсэ лиссть кавто эсензэ книганзо: «Эрьгекерькс» (2006) ды «Толонь лопат» (2010). Неть валморонь пусмотнень кис авторось саезель Россиянь Писателень вейсэндявксос (2014).
Печатавсь «Шенталинские вести», «Слободские куранты», «Округа», «Валдо ойме», «Эрзянь Мастор», «Эрзянь правда» газетатнесэ, «Сятко» журналсо. Стихензэ лексить пертьпельксэнь мазычинтень, тиринь келентень, культурантень певтеме вечкемасо. Сёрмадовксонзо мазыйть, эйсэст ламо валдочи, парочи.
Кода ёвтни сонсь Татьяна Мокшанова, стихтне сакшныть тензэ костобути верде. Чачить кодаткак кавто строчкинеть (сынь мейле седе сеедьстэ теевкшнить стихенть «седеекс»), конатнень перька мелень ёвтамонзо кисэ ладсевить лия строчкатвалт. Ды зярс мелесь а ёвтави, зярс стихесь а прядови, кандтни эйсэнзэ сталмокс, кона а максы оймамо, вели превсэнзэ, веши лисема тарка. Ды ансяк сестэ шождалгады оймезэ, зярдо путсы меельце тешкеэнть.
Покш мельсэ Татьяна Петровна топавты лия кельстэ ютавтомань тевентькак. Ютавтовксонзо вельде эрзянь ловныцясь теевсь содавиксэкс коминь, удмуртонь, маринь, мокшонь, рузонь, венгрань, украинэнь автортнэнь поэтической произведенияет марто.
Ней варчни виензэ прозасояк.
Т. Мокшановань шкинеманзо вечкицятне учить пельдензэ од книгат. Портретэнть теизе В. Федюнин