«Калаганонь Керязонь шкинемань масторсо»
Малав комсь иетнень перть, зярс важоди В.И. Ромашкин лемсэ «Этно-кудо» музеесь, кодат ансяк тевть тесэ эзть юта! Кодат ансяк инжеть эзь васто музеесь! Кодат седейс токиця, мельстуиця валт эзть маря музейсэ важодицятне!
Но се тевесь, конась пурнынзе инжетнень умарьковонь 13-це чистэ (13 августа), ульнесь васенцеде. «Этно-кудонь» менель ало музеев пуромсть сёрмадейть, артыцят, морыцят ды ламот сеть, кие пии-палы мокшэрзянь народонть культуранть кисэ. Тувталось – П.В. Рябовонь «Калаганонь Керязонь шкинемань масторсо» («В мире творчества П. В. Рябова») книганть-альбомонть ванкшномась (презентациясь). Сынст ютксо Кочкурбуень прявтось С.Н. Герасимова, «Торама», «Ламзурь», «Мерема», «Толава» моро-куротне, Л.А. Ломшина, «Сятко» журналонть прявт редакторозо, Т.П. Мокшанова, Мордовия Республикань сёрмадейтнень вейсэндявсконь прявтось, Т. В. Моторкина, «Эрзянь правда» газетань корреспондентэсь, С.В. Пивкина, «Вайгель» радио передачань прявт редакторось, Г.С. Гребенцов, А. Подгорнова, М. Слугина сёрмадейтне, А.Н. Баргов артыцясь, керсицянть кудораськензэ ды ламот лият.
Паряк, сонсь пертьпельксэськак учось те чинть:валске марто ютась пиземе, а 16.00. частнэнень чипаесь невтизе прянзо, а васоло менельсэнть налксезевсь пиземечирьке (радуга).
Истямо книгань нолдамось Пётр Владимировичень мельс сась сестэ, зярдо сон А. Туркичёв керсицянть марто ульнесь Тюмень ёнксонь Уват веленть маласо фестивальсэ ды неинзе тосо Минсалим Тимергазеевень ловажасто керсицянть важодекстнэнь истямо книга-альбомстонть. Книгань вейке лопасонть ульнесь иллюстрация важодевксэнть марто, а омбоце лопасонть – те важодевксэнтень алтазь валморо (стих).
Кувать кандтнесь превсэ Пётр Владимирович меленть нолдамс истямо книга-альбом тесэяк. Тевесь сыргась таркастонзо сестэ, зярдо сон пшкадсь Марина Слугинанень, эрзянь содавикс валморонь ладсицянтень. Эряви меремс, се шкастонть Марина Слугина ульнесь уш содавикс П. Рябовонь шкинеманзо марто, ламот керсевкстнэнь лангс сонзэ арсезельть валморот. Сонзэ валонзо коряс, Пётр Владимировичень важодевкэнзэ лангс ванозь, сонзэ сеске раштась мелезэ сёрмадомс валморот секс, мекс сынст эйстэ сон неизе эрзянь кезэрень веленть эрямозо. Сонзэ чувтонь геройтне теить велень эрьвачинь тевтнень: сокить –видить, лаксить, керсить, ледить, калонь кундамо якить, оницямо (охотиться) ды седе тов.
А штобу эрьва истямо керсевксэнтень алтазь валморось чарькодевель рузонь ломантнененьгак, сынь ульнесть ютавтозь рузонь кельскак. Те тевенть топавтызе оштё вейке эрзянь ёроков сёрмадыцясь - Татьяна Мокшанова.
Вана истя вейсэндявсть колмо ломанть, штобу невтемс Пётр Рябовонь лиятнень лангс а молиця шкинеманзо.
Важодемась книганть-альбомонть лангсо мольсь вете иеть. Ды ней керсицянть кой-кона важодевкстнэнь марто мереви содавиксэкс теевемс те книганть лопатнестэяк. Тезэнь совасть мастерэнть 84 важодевксэнзэ – вишка пластикасто саезь покш скульптурас. Эрьва керсевксэсь – те тиринь велень ломантнень, покштятнень-бабатнень койтнень-кирдатнень лангс вановкс.
«Калаганонь Керязонь шкинемань масторсо» («В мире творчества П.В. Рябова») книгась-альбомось – те аволь ансяк ламо иень важодемань цётавкс, но и сюконямо Н.И. Мастиннэнь, эрзянь ёроков, келейдеяк келей ойме марто ломанентень, тонавтыцянтень, конась зярдо-бути кирвазсь тавлань ламо цёрынентнень седейс вечкема чувтосто керсема тевентень ды теемс сонзэ эрямонь лувокс.
Ламо паро, седейс токиця валт ульнесть ёвтазь мастерэнть лемс. Весе кортыцятне прасть ве мельс: Пётр Владимирович Рябов аволь ансяк паро мастер, васняяк, сон ломань, конась вечксы эсь тиринь ёнксонзо, эсензэ раськензэ. Сон весе седейсэ пии-палы минек народонть культуранзо ванстоманть кис, теи весементь, штобу эрзянь валось кувать гайгевель Вирь Тавла велесэ.
Истямо тевсэ кода казневтеме? А сынст эйстэ се чинть ульнесть пек ламо. Эсест морост П.В. Рябовнень ды весе инжетненень казизь «Торама», «Ламзурь», «Мерема», «Толава» морокуротне, конатне В. И. Ромашкин лемсэ «Этно-кудо» музеенть свалшкань ялганзо, сынсттемест а ютакшны кодамояк покшчи.
Эряви меремс, те тарканть ули оштё вейке коезэ: каванямс инжетнень толпандя лангсо пидезь ямдо ды симдемс тантейстэ качадыця тикшень чайде.
Кувать гайгсть кезэрень эрзянь моротне, кувать оштё мольсть седейшкавань кортамотне. Но кода кортыть, эрьва тевенть ули и прядовомазо. Ансяк минь кемтяно, што кувать оштё Йовлань Олонь лемсэ музейсэнть карми эрямо эрзянь оймесь, кувать кармить гайгеме эрзянь кельсэ седейс токиця моротне.
Пётр Рябовнень жо арсетяно кеме-кеме шумбрачи, кувака пинге, кадык зярдояк а лепами сонэ вечкемазо тиринь масторонтень, а покштятнень-бабатнень оймесэ эждязь Вирь Тавла велень коштось максы тензэ вийть сонзэ шкинемасонть.
Н. Баляйкина