Монь тиринь Ёнксом
Покш Игнатовань райононь Андрейвелень школась ловови «Большеигнатовская СОШ» МБОУ-нь структурной подразделениякс. Те иестэ саезь школась кармась основноекс. Те корты седе, 10-11-це класст арасть, эйкакштнень усксить Покш Игнатовав. Андрейвелень школасонть, кода республикань ламо лия велетнесэяк, редяви эйкакштнень аламолгадомась. Неень шкантень тесэ тонавтницятнеде а пурнавить 30. Тонавтыцятнеде – 11. Ютазь тонавтнема иестэ 1-це ды 2-це класст арасельть. Тедедень сентябрянь 1-це чинтень васенце классос учовить ансяк колмо эйкакшт. Андрейвелень школанть прявтсо зярыя иень перть важоди эсь тевензэ вадрясто содыця специалистэсь, алкуксонь тонавтыцясь Светлана Григорьевна Левщанова. Светлана Григорьевна школасо важодеманть кочкизе эште эйкакш шкасто. Лиякс ульнесь а кода, тонавтыцянь тевентень весе пингест максызь сонзэ тетязо ды авазо. – Чачома велем монь – Андрейвелесь, тестэнь тетянь кудораськезэ. А вана эрясь семиянок шабра Чукало велесэ, – евтни Светлана Григорьевна. – Тетям-авам – Григорий Павлович ды Лидия Васильевна Понеевтне, весе пингест перть ульнесть тонавтыцякс. Тетям Чукало велесэ роботась школань прявтокс, авам – учителекс. Школань прявтонь тевденть башка, Григорий Павлович тонавтсь история, Лидия Васильевна эйкакштненень ветясь математика. Светлана Григорьевна кочкизе тетянзо кинть ды кармась истя жо историкекс. Тонавтыцянь тевень кочкамонть кувалма зярдояк эзь янксе, важодемась тензэ пек вечкеви. – Школасо важодемась пек мелень коряс. Зярдо жо мартот тевенть топавтыть алкуксонь специалистт, овсе кодаткак стакачить а редят. Коллективесь минек пек вадря, весе опыт марто, важодить ламо иеть. Андрейвелень школасонть весемезэ лововить 10 тонавтыцят, эсень марто – 11. Кадратнень коряс кодаткак мелявкст арасть. Тонавтыцятнень ютксо улить Мордовия Республикань образованиянь заслуженной роботникть, высшей категориянь тонавтыцят. Минек тесэ роботыть эсь тевень содыця алкуксонь специалистт, конатне профессиянтень максызь эрямост, – корты Светлана Левщанова. – Эряви тешкстамс сеньгак, минек тонавтыцятне эсь тевентень кандовить творческой енкс марто. Сынь парсте чарькодить эрьва тонавтницянть, редить эрьванть содамочитнень, ерокчитнень ды вешематнень, маштыть муемс мартост кель-вал. Парсте содыть, мезе эряви неень шкань эйкакштненень. Секскак уроктнень ветить истя, штобу покш мельсэ кунсоловоль эрьвась. Тонавтомань лувонтень совавтыть интеллектуальной пелькстамот, эрьва кодат просветительской ды культурной мероприятият. Ды домкасто ваныть сень мельга, штобу неть пелькстамотнесэ ды мероприятиятнесэ эсь ерокчинть невтевлизе эрьва тонавтницясь. Паряк, тень коряс Андрейвелень школань тонавтницятне сеедьстэ лиснить изницякс райононь ды республикань пелькстамотнесэ, олимпиадатнесэ. Свал невтнить ерокчист эрьва кодамо кевкстематненень алтазь конференциятнесэ ды форумтнесэ. Эряви евтамс сеньгак, Андрейвелень школась национальной. Кода тешкстызе Светлана Григорьевна, эрзянь келесь тесэ ветяви 1-це классто саезь 9-це классос. – Эрзянь келенть ды литературанть лангс эрьва классонтень недлязонзо явовить 2 част, 9-це классо – 1 час. Эрзянь келенть тонавтыть покш квалификация марто тонавтыцятне – Татьяна Петровна Горина ды Галина Александровна Дорофеева, – евтни школань прявтось. – Ризнэвти се, эйкакштне, эрзянь велесэ чачозь-касозь, кортыть седе сеедьстэ рузкс. Куш сынь келенть содасызь, весементь чарькодить. Минек школась ды эйкакштне невтнить ерокчист эрзянь келень коряс весе мероприятиятнесэ, олимпиадатнесэ, пелькстамотнесэ. Ялатеке эрзянь келесь тенст маряви стакакс. Андрейвелень школась овсе а явови ошонь школатнень эйстэ. Зярыя иеде икеле тесэ панжозь «Точка роста» центра, конантень совить информатикань, технологиянь ды ОБЖ-нь кабинеттнэ, ули шахматсо налксемань туртов кружок. Патриотической енксонтень – башка мель Андрейвелень школасонть пек покш мель явови патриотической енкссонть важодемантень. Тонавтнемань эрьва недлясь ушодови масторонь флагонть кепедемасто ды эрявикстэнть кортамотнестэ. Покшнек-вишкиненек тешкстыть, те пек эрявикс тев. Тесэ зярдояк а стувтнить эсь велень геройтнень, конатне невтизь пряст Ине Отечественной войнанть шкасто, Чеченской ды Афганской войнатнесэ, зыянов лия таркатнесэ. Ламо кортави специальной военной операциядонть. Школасонть уш ламо иень перть важоди П.М. Куманев лемсэ «Орлята» поисковой отрядось. Сонзэ вети РФ-нь образованиянь почетной важодицясь Валерий Михайлович Кечемайкин. Поисковиктнень марто сынь эрсить республикань ды весероссиянь эрьва кодат мероприятиятнесэ. Отрядось малав эрьва ие ардтни чувноматнес. Икеле поисковой важодемась ветявсь 10-11-це классонь тонавтницятнень марто, ней 9-це классонть марто. Ютазь иестэ поисковой вахтас ардтнесть 8-це классонь тонавтницятнеяк. – Поисковой важодемадонть марсинь умок, ансяк васенце шкастонть кода-бути покш мель эзинь яво тенень. Мейле, зярдо тюремань паксятнестэ муизь минек райононь боецэнть кадовксонзо, сонзэ семиянтень медальононть ды лия мезенть максомо Покш Игнатовав сакшнось содавикс поисковикесь Николай Андреевич Кручинкин. Те вастовомадонть мейле районсонть кармасть явомо мель вешницянь важодемантень. РОНО-со методистэкс сестэ роботась Анна Ивановна Федорова ды сон весе школатнесэ кармавтсь пурнамс поисковой вейсэндявкст. - Те ульнесь 2003 иестэ. Мон арсинь, те весемесь а кувать карми, зярыя шка юты, стувтови. Ие ютась, важодеманть ветятано, омбоце ютась… Арсинь, молянгак, ванноса, мезе истямось поисковой вахтась. Ды Николай Андреевич тень мерсь, бути омбоце вахтас молят, свал кармат те тевсэнть. Секе иестэнть молинь омбоце вахтас ды те тевентень чопавтинь целанек. Те шкастонть саезь районсонть весе отрядтнэ важодемаст лоткавтызь, кадовинек ансяк минь, – евтни Валерий Михайлович. Чувноматнес ардтнематнень коряс пурназь а покшке музей, косо невтневи паксятнестэ ускозь войнань шкань ули-парось. Тесэ улить лия енов а молиця предметт – немецень солдатонь бляхась, чуваронь поколесь, конась понгсь «Катюшатнень» леднеманть алов ды седе тов. Музейсэнть улить истят материалт, конатне косояк лиясо арасть. Ванстови «Книга призыва Большеигнатовского района» пусмось, эйсэнзэ сермадозь велень эрьва эрицянть лемезэ, конась максызе тиринь масторонтень долгонзо. Отрядонть невтевксэнзэ а берянть. Весе шканть перть сынь вельмевтсть малав 20 боецэнь лемть, конатне кадовсть тюремань паксятнес. Школанть юрсо истя жо ули раськень музей. Сон сертифицированной. Нупальнетне кадык аволь покшкеть, ансяк экспонаттнэнь коряс музеесь пек сюпав. Вейке нупалесь алтави XVIII-XIX пингенть ушодовомсто эриця эрзятненень-мокшотненень. Омбоце нупалесь – Ине Отечественной войнантень. Тешкстасынек, Андрейвелесэ чачсть кавто Советской Союзонь Геройть – Павел Маркелович Куманев (поисковой отрядось кандтни сонзэ лементь) ды Петр Герасимович Шунеев. Арсеви эште теемс кужине, конась карми алтазь СВО-нь тевтненень ды геройтненень. Эдь тесэнь цератне неень шкасто вейсэ лиятнень марто ванстыть Тиринь масторонь сэтьмечинть. Кизэнь шканть ютавтыть лезэвстэ Кизэнь каникулатнень шкасто Андрейвелень школась а эрси чаво. Эйкакштнень гайтев вайгелест тесэ гайгить тонавтнеманть эйстэ оймсема шкастонтькак. Кизэнь васень ковтнестэ школанть юрсо важодсть «Успех» ды «Школа выживания» эйкакшонь лагертне. Воспитательтне анокстакшность мельстуиця программа. Ды, эряви меремс, лагерень сменатнень важодемстэяк башка мель явовсь патриотической енксонтень. Лагерьсэ эрьва чись эйкакштнень туртов ютась пек лезэвстэ.