Састь изнявкс марто
Н.Н. Сайгушкинань ученикензэ ютксо ламо тонавтницят, конат эрьва ие саить паро таркат районной ды республиканской конкурстнэсэ. Те - О. Учеваткина, Е. Козлова, И. Сидорова, В.Сайгушкин ды ламо лият. Надежда Николаевна мельспаросо евтнизе миненек, кода мольсь 17 районнонь тонавтыцятнень ютксо конкурсось, кодат ульнесть максозь заданият ды школасо важодемадонть, косо сон уш 23 иеть. Эйстэст ламо иеть ашти тейтерькань "Килейне" фольклорной ансамблянь прявтокс.- Эрзянь келесь ды литературась минек школасо тонавтневить васенце классосто саезь кевейкеецес молезь. Ветеце классосто саезь тиринь келесь тонавтневи кода башка предмет. Школасо покш мельсэ топавтови духовно-нравственой трямонь-кастомань программась, конась нежеди мокшэрзянь ды лия народтнэнь койтнень ванстомаст лангс. Тень кувалма минек ули весе: ловномань кудонок, конась сюпав ламо книгасо, эйсэнзэ малав 12000 экзэмплярт; духовной кабинетэнек; историко-краеведческой музеенек.Покш лезэ эрзянь кель-валонь кастомантень, эрямонь мазычинть лангс келейстэ ваномантень максы эрзянь келень ды литературань кабинетэсь. Тесэ ламо иень перть пурназь дидактической ды наглядной материалось, эрьва ендонь валкст, тонавтыцянень лездамонь материал, мокшэрзянь писательтнень ды поэтнэнь художественной произведенияст умонь ды неень шкань, эсенек велень сермадыцятнень важодевксэст. Тесэ мокшэрзянь писательтнень ды поэтнэнь портретэст ды шкинемаст. Кабинетэсь сюпав тиринь масторосо лисниця журналсо ды газетасо, фонохрестоматийной материалсо. Виде, ули мейс аштемс покш мельспаросо эрзянь келень кабинетэнть коряс. Тесэ покш тарка максови финно-угрань чувтонтень, сеске сельмс каяви Пиняевень эрзянь кельде стихотворениясто саевксэзэ, конась пек педи седейс. Неень шкань вешематнень коряс кабинетсэнть муизь таркаст тестовой важодематне. Ютко шкасто Надежда Николаевна тонавтницятнень марто якить Сабанцелень сыре ломантненень, пельдест пурныть кезэрень морот, лайшемат, калядамот, морсевтемат… Мордовиянь содавикс сказительницась С.М. Люлякина аволь весть ульнесь школасо инжекс. Покш мельсэ ловнось эсензэ стихотворениянзо, морась моронзо, казнекс кадынзе эсь кедьсэ зярыя сермадовксонзо.Н.Н. Сайгушкина покш мельспаросо ашти сень кувалма, што тонавтницятнень ули мелест содамс тиринь келест, бажить эйсэнзэ кортамс, а виздить кувалманзо. Седейшкава якить эрзянь келень ды литературань олимпиадас, творческой конкурсос. Теде ды ламо лиядо евтнесь Надежда Николаевна аволь ансяк миненек, ну и конкурссонь молема читнестэ. Ламонь мельс тусь максозь урокозо, конань лемдизе "Пертьпельксэнь мазычи". Тонавтыцяст марто Саранскоев якасть кавто 5-це классонь тонавтницят. Паряк сы шка ды сынь тожо кармить кодамояк конкурссо изницякс, кода сынст тонавтыцяст Надежда Николаевна Сайгушкина. КАРВО ДЫ ПРОМОТундонь шкане, садсоВармань лыйнемасо,Чова нетькске лангсо -Нурсесь карвось озадо.Друк, цеця лангсто, промо несьДы каштансто сон мерсь:"Кода тон а нузялдат,Важодемс чить ды веть!Тонь таркас мон бу-Чизэнзэ коськевлинь.Вана, примеркс,Мон эрян, теке райсэ!Монь тевень ансяк,Ливтнемс инжекс.Прянь апак шна тонеть мерян,Монень, весе содавикст,Сюпав ломантнень кудост.Содавлитькак, кода тосо ливтнян…А косо свадьбат ды менинат,Васенцекс тосо мон улян.Ярсан фарфоровой вакансто,Хрусталень стопкасто симан.Инжетнеде икеле - Сех тантей кускатнень варчнян.Монсь ломантнень юткова ливтнян,
Сизян, оймсеме лангозост озан. "Весе тень мон содан, - мерсь промось, -Ды истяткак маринь мон валт,Што тонь кияк а вечки,Ломантне сормсить чамасост карводо,Што, кода кудос тон ливтят -Виськсчамас сынсэст совавтат.Ды сюдомасо панить тоньсэ?"Карвось прянь апак покорда мери:"Панить! Ды мезе теньсэ?Вейке вальмасто лисян,Омбоцес, сеск сован".Ялгат, илядо уле карвотнень кондят,Нузяксонть а вечксы кияк. А. СИДОРОВА