Мокшень цёратне отькорьхть да виихть
Луви ялганьке, тячи азонттама мокшень цёрань колга, кона пяк лац содасы шачем кяленц. Но тя аф сембе
Даниил Кабаев эряй Кушкса. Ётась сон Мордкозловкань школать кефкиеце клазонцты. Тя кизоня ся лангс аф ваномок, што тя школань тонафнихне пяк лац содасазь мокшэрзянь кяльть, тонафнема вастсонза сон лиссь мокшэрзянь кялень олимпиадань сяськикс.
Касы цёрась мокшэрзянь традициятненди оцю честень путы семьяса, коса кенерьтьфста кулендезе и тонафнезе шачем кяльть нинге аньцяйняста сявомок. Тячиень шити тядянц и аканзон мархта Даниил фалу корхни мокшекс. Раднянь-шабрань келеса лац содасазь и ванфтсазь мокшень илатнень и койхнень. Тядяц, Мария Михайловна, лама кизот тонафнесыне Кушконь школань иттнень мокшень и рузонь кяльхненди.
Аф стак корхтайхть, што мокшень цератне отькорхть да виихть. Вага и монь корхтай ялгазе аф фкя лаца спортивнай занятиянь кельги. Атерьса районнай соревнованияса и тя кизонявок занясь призовой вастт: соксса ардомста, спортивнай молемаса и ласькомаса.
Спортивнай занятиятнень эзда теенза сембода мяльс - хокеейсь. Мес? Аляц, Михаил Петрович, кота кизоста ушедомста пеставазе цёранянц хоккейть ширес ванома. Мзярс ульсь шиса, коль арфнезе машинаса Атерь аймаку тренировкас. Кафкса кизоса Даниил ушедсь примсема участия соревнованияса. Тячиень шити спортсментть ветьгемонь медаленза, эздост кемонць - зрнянь. Соревнованияса ульсь Чамзинкаса, Краснослободскяйса, Саранскяйса. Сонь лемдезь Республиканскяй «Золотая шайба» соревнованияса 2022-2023 кизонь сезонть «Инь цебярь защитникокс». Ся меле Инсаронь командать лувксса сон якась Всероссийскяй соревнованияс Уфа аймаку.
Даниил примси участия соревнованияса Атерь аймаконь и УФСИНонь командатнень ёткса. Тага ули хоккейса налхкомань кафта кизонь лия опытоц. Тя - Саровскяй командать лувксса, коса получась 3-це спортивнай разрядть. Седи панжи, што ули оцю арьсемац, мялец хоккейса налхкомста араламс Мордовия Республикать честенц республиканскяй командать лувксса.
Наталия ЮФКИНА