Пингонь гайф

Морамань-седямань искусствась и мокшень-эрзянь морамкатне

Седямась и морамась мокшень и эрзянь эряфса - ащефса ульсть фалу ломанть шачемстонза сявомок куломозонза молемс.

Нюрямняса улемстонза ни тётьмаксь марясь тядянь «нюряфтома морот» (мокш.), «лавсь морот» (эрз.). Сяда тов - идень кодама - повсь морот, налхсемкат-кольнемкат. Ёмлакс пингста ни иттненди макссесть налхкшт - вяшкоманят, конатнень вайгяльсна мазыста морай нармоттнень вайгяльснон лацотольхть - цёфксонь, жаворонкань и стак тов. Идькс пингста сявомок ни, сонцьке и оцюфнень мархта марса улендсь ся тефнень тиендемста - ётафнемста, мзярда морайхть - седяйхть морамкаса. Улеза тя свадьба, праздникши или марстонь озкс - фалу эсост кайгсь музыка. Эрь шись велеса ушекшневсь и аделсевсь стада ваныхнень морамаса: шобдава кайгсь «панемань мора», илять - «шимвалгомань мора». Эрь пирьфса калдазонь ортатненди повфтафоль «пайге» (мокш.), «баяга» (эрз.). Тя пайгса макссевсь вайгяль - куля, пачфневсь марнек велети тя или тона тевть колга, кона лиссь кудса - юрхтса: мярьктяма, шачсь тётьмак или кивок кулось, лия велеста сась инжи или токадсь ичкоздень купец. Аделавсь свадьбась или идти макссть лем, и лама-лама лия кодама - повсь кулянь колга.

Куйгорста тиф «дорамась» (эрз.), «торамась» (мокш.) кунардонь пинкнень ульсь аф аньцек морамкакс, но и латта азондомбялькс. Сонь вайгялец вирьса маряви пяк ичкози. Козя велетнень лангс сидеста врьгятнесть вракт, конат ломанень паршить нельгоманкса пачкотькшнесть мянь вирь кучкань веленятненди. Сашендовсь путнемс ваныхть. И аф фкя - кафта. И ащесть синь фкя-фкянь эзда торамань вайгяльть марявома вастса. Кафта ваныхнень ёткса тя вастти мярьгондсть «вайгяльбе». Мзярда няфнесь пря врагсь, васенце ванысь макссесь сигнал. Сонь кулендезь лиятне, омбоцетне и кучсезь сяда тов - колмоцетненди. Зиянть колга кулясь пачкотькшнесь вели, мзярда душманць эздонза ичкозель, сяс сяльде сон мушендсь аньцек шава, ломаньфтома кутт, конатнень эзда питни уликссь - паршись ворьфтьфоль ни, прдафоль. Сембе велеряйхне прянь идема ворьготькшнесть ош-панду. Тяниень кяльса «вайгяльбесь» - километра или «верста». А кунардонь пинкнень, эк, сон няфнезе ваныхнень ёткснон - вастть, коса лафчемкшни торамать вайгялец.

Сембось тя и нинге козя перьфпяльсь, кона пяшксель кодама-повсь гайфта, пефтома нармонень апак лотксек морамада, и ульсь юркс, конаста кассь мокшетнень и эрзятнень музыкальнай козя культурасна.

Полатксоц моли

Михаил БРЫЖИНСКИЙ

КУНАРДОНЬ ПИНГОНЬ МОРА

Алямань Просась

Мес пяк цебярня Алямань Просась,

Стирнясь мазыня, но.

Шачемстокиге Алямань Просась

Лофцса эшеляфсь, но.

Лофца ведняса Алямань Просась

Штафкясь нардафкясь, но.

Алькац макссесы Алямань Просать

Козя Радати, но.

«Тямак макса, алькай, тямак макса, тряйняй

Радань Сёмати, но.

Ся Радань Сёмать, аляняй-тряйняй,

Кунара содаса, но.

Сериска сери, аляняй-тряйняй,

Келиска кели, но.

Вете келеса аляняй тряйняй

Паля эряви, но.

Келе пялеса, аляняй тряйняй ожат эрявихть, но.

Колма келеса, аляняй-тряйняй,

Понксат эрявихть, но.

Сельмонза косойхть ся Радань Семать,

Пиленза глухойхть, но.

Лучи максомак, аляняй-тряйняй,

Сендюнь Митюти, но».

«Мир еткса аяш ся Сендюнь Митють

Сонь путонь кудняц, но.

Ярхцамс кшиц аяш ся Сендюнь Митють,

Симомс ведец аш, но…»

«Кшинкса мольхтяма, аляняй-тряйняй,

Козялянь утомс, но.

Ведняс мольхтяма, аляняй-тряйняй

Шуди Равати, но.

Лангонза ванан, аляняй-тряйняй

А мон топодян, но.

Мархтонза корхтан, аляняй-тряйняй,

Симмазе янгай, но-о-о».

Еще материалы

Комментарии