Эрсить пингсэнть истят вастомат…
Оймесэст паро ульнесь аволь ансяк инжетнень, кецясть вастовомантень тонавтыцятнеяк, ламот эйстэст умок уш а важодить школасо – лиссть пенсияс.
Зяро лембе валт, лецтнемат ульнесть евтазь эрьва выпускникенть эйстэ. Сынст ютксо: Н. Салмов, Е.Шульгов, Т.Егорцева, Н.Зеткин, И.Гордеева ды ламо лият. Седеяк покш кенярксокс ульнесь се, што кияк эзизе стувто тиринь келензэ, кортамось мольсь эрзянь кельсэ. Гайгсть истят валт:
Эйкакшпора – те монь пингень валске,
Кода васов сон эйстэнь кадовсь.
Ялатеке таргавсь сиянь рисьмекс
Монь седейс лецтнеманть лембе кись.
Ну, аволь ансяк те чистэнть ульнесть морамот ды киштемат, школав сакшнось оште вейке покш инже – Р.Б. Щанкина. Раиса Борисовна – Суоми масторонь М.А.Кастренэнь вейсэндявксонь премиянь лауреат, Мордовия Республикань культурань заслуженной роботник. Ней икелень «Эрзянь правдань» корреспондентэсь важоди Равчирень финнэнь-угрань раськетнень культурань центрасо ды топавты вейсэнь ламо тевть. Теде башка - сон «Литова» эрзянь авань вейсэндявксонь ды «Ламзурь» фольклорной ансамблянть прявт. Кортамось мольсь эрзянь келенть ванстомадонть, штобу эрьвась эсь мелензэ маштоволь евтамо кода минек содавикс поэтэсь А.Моро: «Мон эрзян, прясто пильгс эрзян». Р.Б.Щанкинаньгак сермадовкстнэнь марто ловныцятне вастневсть ламоксть. Сон малав 30 иеть важодсь корреспондентэкс «Эрзянь правда газетасо». Те шканть перть сермадсь ламо ды домка материалт эрзянь пек содавикс ломантнеде ды сеть полавкстнэде, конат ютасть Мордовиянь культуранть эрямосо.
Р.Б. Щанкинань лиссь од книгазо, лемезэ «Эрьванть эсензэ тештезэ». Те пусмось сетнеде, кить эрямост перть тевсэ-мелявкссо лакить, весень ванстыть ормадо, превть максыть, валдо кандыть, паро тевс тонавтыть, эсест тевсэст кандыть лезэ минек масторонтень ды раськентень.
Вастовомась, нама, малавгавтынзе ламбаськень ломантнень эрзянь сермадыцянть марто, ды макссь кемема - мезень кисэ эрзятненень эряви вечкемс тиринь келест.