Фольклоронь ванстыцят
Сабанцелень сыре ломантне лововить койтнень-кирдатнень ванстыцякс. З.И.Федотованень 77 иеть. Аванть вайгелезэ нейгак оште виев ды мазый. Ды кода корты сонсь Зоя Ивановна, сцена лангсо тунь а максовлизе прянзо седе одтнэнень. Сонзэ мельсэ нейгак аштить тюштя пингень эрзянь моротне, лайшематне ды одирьвань урнематне. Зярдо бути Сабанцелень фольклорной ансамблясь, косо морась З.И. Федотова ава ялганзо марто, ардтниль Саранск ошовгак. Казезельть казнесэ ды шнамонь грамотасо. Ялатеке сехте питней казнекс свал марявиль кунсолыцятнень мельспаронсо цяпамотне.
Мейле ульнесть лия морыцят. Ансамблянтень максокшность рузонь лем «Грустиночка». Шкатне полавтовсть таго. Неень морыцятненень маряви, што тиринь кельсэ валтнэ гайгить седе мазыйстэ. Уш зярыя иеть Сабанцелень авань фольклорной ансамблясь кандтни «Комолькай» лементь. Сонзэ морыцятне: кудоютксо, клубсо, производствасо важодиця ават, школасо тонавтыцят... Те - Нина Алексеевна Федотова, Светлана Ивановна Денисова, Анастасия Ивановна Красноперова, Мария Ивановна Князева, Любовь Михайловна Китайкина, Ольга Александровна Кузнецова, Мария Васильевна Козлова, Валентина Сергеевна Сидорова, Учеваткины - Татьяна Васильевна и Елена Николаевна.
Аватнень репертуарсо ламо эрзянь морот, снартнить виест фольклорсояк. Пока живть улить икелень морыцятне, кода З.И. Федотова, сабанцелень моротне кармить эрямо ды гайгеме сцена лангсо. Кавто эйстэст В.С. Сидорова евтась минек туртовгак.
Алкикс Михаловсь милостлив
Алкикс Михаловсь милостлив,
Алкикс Михаловсь праведнэй.
Ие вай, вай, вай ох вайяень охо вай,
вай ох вай ох вайяень.
Мезе тейтеренть частезэ, Мезе тейтеренть долязэ.
Ие вай, вай, вай ох вайяень охо вай,
вай ох вай ох вайяеннь.
Сивсь пильге сараз долязэ,
Суркс кудре реве частезэ.
Ие вай, вай, вай ох вайяень охо вай,
вай ох вай ох вайяень.
Пасиба пазнэнь парэнень,
Пасиба вершеки пазнэнь.
Ие вай, вай, вай ох вайяень охо вай,
вай ох вай ох вайяень.
Пасиба лембстэ лиси чипазнэнь,
Пасиба валдстэ свети ков пазнэнь.
Иех вай, вай ох вайяень
Охо вай, вай ох вай, ох вайяень.