Маяк

Лисьмаприне (Страничка на национальном языке (эрзя)

Страничка на национальном языке (эрзя)

 Кавто а содавикс ломанть. Варштасть вейке-вейке лангс. Сельмест вастовсть ды марявсь, ендолнэнь кондямо кивчкадсь се шкастонть.

…Кизэ куншка. Лембе варма, шожда ялтке, сэняжа менель, нурька веть ды тантей валскеть… Вейке минутадо икеле мон сонзэ тунь а содылия. Ансяк вана нейке, зярдо вастовсть минек вановттнэ, мезе-бути теевсь. Марявсь, сеске полавтовсь весе пертьпельксэсь, маласо аштиця ломантнеяк лиякстомсть. Вейке варштавкс – ды, мерят, содаса умоктояк умок. Сельмень  апак сае ванан лангозонзо: мизолды-пееди, корты, евтни мезть-бути. Ды мезе эйсэнзэ истямось, а евтавиксэсь? Лангс ваномс весень кондямо. А меревлинь: мазыйдеяк мазый, явови лиятнень эйстэ. Ансяк потсом мезе-бути явизе сонзэ лиятнеде.

Седе тов ванан мельганзо. Окойники! Сон таго варштась енон! Кундамс те варштавксонть! Прок тол ютась пачкан. Ялатеке а саян сельмень. Сонгак ушодсь налксеме сельмсэнзэ.

Куш мезе улезэ, ансяк эряви мартонзо теевемс содавиксэкс, марямс вайгелензэ ды чарькодемс: кодамо тол кирвазсь монь потсо. Теке шкастонть лоткинь марямодо, мезде кортыть шабрам, лоткинь неемеде, мезе моли перькан. Кадовсь икелем – ансяк те ломанесь. Прок кавтонек масторлангсонть.

Сон умок уш редизе: мон ванан ансяк сонзэ лангс. А талновтыяк, мезе те шкане арси мондень. Эх, течи неи  эйсэнь, ванды жо… Азе вешник косан.

Нать истямоль пазонть мелезэ: те церанть марто минь теевинек содавиксэкс. Шкаськак лоткась.

 – Зярдояк  истя иля ванно киньгак лангс, – ушодсь кортамо церась.

 – Мекс?

 – Соват видьстэ седейс ды калавтсак…

 – Иля манче, мон а маштан калавтомо седейть.

 – Монь жо калавтык, – кепединзе лангозон пейдиця сельмензэ.

 – Те а куватьс.  Седе тов мезеяк а ули.

 – Весемесь икеле. Иля ертне стяконь валт.

 – Мон а вечкан ертнеме стяконь валт.

 – А мезе вечкат?

 – Вечкан якамо чокшнень ошка, зярдо чамить куринкатне, весе удыть, ансяк тесэ-тосо палыть толнэть. Маряви лопань тошкамось. Вечкан, зярдо чинь певтеме шалтось полавтови тантей сэтьмечисэ, конань мазылгавты нармунень  чоледема. Сестэ чачи вейке мелем – ливтнемс…

– Те прок евксонь шка. А молят каршо, бути сыргатано ливтнеме вейсэ? – маринь кенярдовтыця валтнэнь.

 Минь кундынек кедте кедьс ды сыргинек. Нейгак ледстнян, кода валскень самс якинек чаво ошка ды  кортынек, кортынек, кортынек. Эрьва мезде: эрямодо, ютазь ды сыця шкадо. Седе мейле вастовкшнынек мартонзо эште весть. Содан, минь зярдояк а ультяно вейсэ. Эрьванть эсензэ  эрямозо. Ансяк кадовсть сонзэ мельга ламо ледснемат. Тесэ арасель вечкемань панскеяк. Паряк, ансяк вечкемантень бажамо. Ялатеке казесь валдось нейгак эжди седеем ды валдомгавты эрямом.

Таня Моторкина,

Орозбие велестэ.

Мастор лангсонть пек ламо кортамо кельть. Ансяк монень маряви эрзянь келесь сехте мазый. Те тиринь кельсэнть мон евтыя васенце валом. Те кельсэнть авам морась тень лавсень морот. Ды кода а вечкемс сонзэ, если кортыть эйсэнзэ тетям ды авам.

Тиринь келесь теке ванькс лисьмапря, кона чольнезь канды ведензэ васов ды конань арась пезэ. Ансяк сонзэ вельде минь карминек содамо пертьпельксэнть. Монень  покш зыянокс маряви эсь тиринь келень стувтомась. Но  улить истят ломанть, конат туить велестэ ошов ды стувтсызь эсь келест. Те а тев! А стяко ули истямо валмеревкс: «Кулы келесь – кулы народось». Кодат видеть неть валтнэ!

Мон чачинь эрзянь велес, кортнян эрзякс ды а виздян  теде. Кода шнамс  эсь келенть, кодат муемс седе мазый валт мон а содан. Содан ансяк вейке – монь тиринь келем эрзянь. Ансяк сонзэ вельде мон пачкодян лия кельтнес. Нама, сынь весе эрявить, но тиринь келесь сехте малавикс. Эряви ванстомс эйсэнзэ.

Коля Жочкин,

Низовка велестэ.

Минек ульнесь Мурка катканок. Сон левксыясь. Левкстнэ эрясть каштом лангсо. Зярыя чинь ютазь миненек састь ошсто инженть – Алеша ды Миша аваст марто. Сынст арасель каткаст. Катка левкстнэ пек тусть мелезэст. А эно кода, сынь истят вишкинеть, чевтинеть, понавнеть, чинь-чоп мелеть эйстэст а моли. Эрьва валске  сынст муссы аваст вакссто.

Ды вана лиссь истямо тамаша… Ве чинь валске арасельть таркасост, емасть. Вешнинек, допрок, весе кудонь уголтнень, косояк арасть. Вана дивась! Зярыя шкань ютазь совась кудос левкснэнь аваст, ды, кылчк, эцесь шифоньерс. Авам варштась тозонь ды серьгедьсь: «Садояк, ванодояк, емаськенек муевсть!»

Истя каткась кекшекшнынзе эйстэнек левксэнзэ. Нать, мелезэнзэ ошонь инжетне эсть туе, мон арсян. Седе мейле минь максынек лия лем каткантень – Ежовне.

Максим Громов,

6 кл., Пиксяська велестэ.

***

Содан, авай, учат эйсэнь учат,

Содан, авай, весемеде пек.

Седей вакссо эждезь валот кучат

Ды ознат кисэнь чинек-венек.

Таргат пси прякат самозон – лексить.

Ансяк тонеть паневить истят.

Сельведеть – мизолдат тень  –  а невтьсыть,

Мекс жо начкот пенензэ пацят?

Содан, авай, учат эйсэнь, содан,

Коморозот сювордавлик шканть…

Мон – те тон, ды ансяк седе одан,

Секс чарькодьса седеенть орманть.

Содан, авай, вакссот мон, свал вакссот,

Секеть пельтне вельсканок уить.

Зяро Пазось кить илязо максо,

Монь туртов сынь тонь енов ветить.

***

Тон сезить тарад, ертык ведьс –

Сон ойметь ладсо сеске ваясь.

Ансяк тонь оймесь ваясь сельмс.

Лисемс жо вийтнень косто саемс?

Тон кочкить валт – ков емасть сынь? –

Ды пулькить ежомарямосот,

Толгасо ацыть латков кинть –

Толгатнень тарксить эсь селмостот.

Пансить вадовокс эций венть,

Кона сэвинзе сельмтнень валдост,

Конадонть ойметь ченгезь ченгсь,

Кона эзь кадо лембень касовкст.

Тон синдить тарад, саик кедьс,

Озавтык седей вальмат алов.

А коськи сон, касы килейкс,

Валдонь казицякс тонеть ары.

Минек веленть лемезэ Пиксяська. Тесэ эрить ламо вадря ломанть. Мон эрян Од ульцясонть. Эсь лемсэнзэ ульцянок невти, што сон сехте од ды монень  пек вечкевикс. Алопе ульцясь токи Сарка леентень, а Верепе – ветясамизь мазы чилисеманть енов, косо чуди Бам леесь. Виренть пандонть ало сравтовсь Одыре ульцясь, кона сюпав садсо. Сехте сыре ульцясь – Удалцьпе.

Веленть малава улить паксят, вирть, лейнеть. Паксятне ламо. Сынь андыть народонть, тосо важодить велень эрицятне. Сехте мазыесь виресь, косо эрить ламо нармунть. Веленть пертпельксэсь мазый, а вирень пандось мазылгавты седеяк. Те кизэстэнть мон ламоксть якинь вирев ды пандопрявов кстый ды панго мельга. Пси шкатнестэ вирьсэнть экше, ялатеке, сы симемат, муят лисьмаприне, варчасак ведензэ, мик седеетькак витеви. Тедеде натой ульнесть пештькак. Виреськак паксянть ладсо анды, но тев мон якан оймень оймавтомо.

Леенек  а пек ламо. Оймсемань кисэ  ломантне якить экшелямо ды калонь кунсеме  Сарка леентень, конань ведезэ аволь домка, но кельме. Сон чуди кевне ланга, конат чипазонть ало неявить сырнекс, берекка касыть эрьва кодамо тикшеть ды куракшт. Сексня  тезэнь  лотксить ливтиця лембе масторов нармунтне. Тельня леенть ланга каяви калгодо эень велькс. Эйкакштне вечксызь се шканть, зярдо эенть ланга арась лов ды мельспаросо  налксить тесэ хоккейсэ.

Веленть омбоце песэ ули таго оймсема тарканок. Минь сондензэ мерьтянок  Бам лей, конань ведезэ домка ды ванькс. Сарка леенть коряс Бамонь ведесь седе лембе ды ванькс. Сон терди экшелицятнесэ.

Велесэнек мазылгавты пазнэнь ознома таркась. Церковамок пек умонь. Ульнесть шкат, зярдо пекстакшнызь. Шкатне полавтовсть, ды сонзэ таго панжовсть кенкшензэ. Ней тей сакшныть аволь ансяк эсь велень эрицятне, но и шабра велестэяк. Сон велесэнть  сехте сэрей ды неяви васолдо. Церькованть бокасо ашти школанок: покш, ванькс, валдо. Эйсэнзэ превей эйкакшт, вадрясто тонавтницят.

Тиринь мастором монень сех пек малавикс. Пек стака карми явовомс те мазычинть марто, зярдо сави кувалгавтомс тонавтнеманть ошсо.

Ю. Широкина,

 Пиксяська велестэ.

Минек велесь яла чами. Скалтнэдеяк лиядсть аламо. Икеле иетнестэ  ванстыльть пастухт. Сынь содылизь весе пастбищатнень, латкотнень. А ней умок уш ваныть очередьсэ.

Кузьмань Толянь ванома очередьстэ емась Федянь скалозо. Вешнесть эйсэнзэ кавто чить, кодаяк а муеви. Вана скалонть редизь колмоце чистэ эрьке прясто. Мезе тувталось, мекс скалось эзь лисеве?  Кияк эзь сода.  Монень савсь кортамс сырькаень марто, конась евтнизе те эрькенть историянзо.

Те ульнесь войнадо икеле, колхозсонть виднильть кансть, ваявтомс ульнесь а казонь. Сестэ велень промкссо решизь чувомс кавто омут. Весе цератне  важодсть. Конатне чувсть, а конатне лангсост кантнесть вирьстэ тумот. Виресь ульнесь овсе сеске – пель вайгельбе арась. Мейле неть чувтотнеде чапсть сруп ды нолдызь  омутнэнень, косо ведесь ульнесь чевте ды ванькс. Од тейтертне якильть тозонь ашо пацяст муськеме.

 Канстесэнть  ваявтыльть ды таргильть церат  кувака баграсо. Кизэстэнть кармась война. Цератне велестэнть весе тусть.  Канстенть ваявтомс   а кинень. Войнадо мейле тейсть селт, кармасть ваявтомо тозонь. Истя стувтовсть неть кавто омутнэ, конатнесэ срупось ашти нейгак. Сыре ломатне мерильть: «Минек вирень тумось пек кеме, сонсэнзэ саильть кораблянь строямс Петра Первоень пингстэ».

Анна Овсянникова,

 Чукало велестэ.

Зярдо тундось само кармась,

Зярдо рожомсь кежей вармась,

Зярдо од лопинеть чачсть –

Тундонь читне таго састь.

Нармунтне кармасть морамо,

Прок эрзянь кельсэ кортамо.

Чувтотне сакалт нолдасть,

Теке ине атят стясть.

Килейтне палят оршасть,

Енсто киштеме кармасть.

Тумо атясь сехте сыре,

Сонзэ лангсо пешксе пире:

Кортыть, сон уш сядо иеть

Вансты сезякадо пиреть.

Нумолось тулуп каясь,

Шержей шубине оршась.

Сыре сееленть вастыя,

Ашо пангодо андыя.

Сеелесь тень сюконясь

Ды сюкпря монень евтась.

Эрьва тундо, эрьва чи,

Эрьва ие те эрьси.

Паряк, евкс те, паряк, он?

Евтницязо ульнинь мон.

Лей чиресэ од килейне

Ашти сон теке тейтерне.

Чипаесь мартонзо налкси,

Чись эйсэнзэ теке палси.

Модась эйсэнзэ анды,

Лейнесь веднеде симди.

Вармась черьсэнзэ судри.

Ансяк сон, ведь, а арси –

Кежей теле таго сы.

Кельмевтьсы сон килейненть,

Матедевтьсы тейтеренть.

Ансяк килейнесь а янкси,

Теде пек ламо а арси.

Соды: сонензэ лездыть

Модась, вармась, лембечись.

Мезень кисэ седеем талны?

Мезень кисэ оймем палы?

Косто саемс неть мазый валтнэнь,

Конат ломань ойме эждить?

Сайсынь мон сынст лембе седейстэ,

Ловныцятнень кенярдовтсынь:

Сермадомань чанстенть оймесэ

Казы пазось кемеманть кис.

Маша КУДАШОВА.

9 кл., Орозбие велестэ

 Сашань бабазо ды авазо тейнить прякинеть. Церынесь меши. Сонзэ кучизь погодань кунсоломо. Дикторось евтни:

– Осадки, снег, временами ветер, давление ртутного столба 748 мм.

Саша кунсолызе да евтни эсензэ ладсо:

– В посадках снег, криминальный ветер ды мезе-бути столба прясо.

***

Вишка Анянь авазо кармавтызе кияксонь шлямо. Тейтерькась шлясь куватьс. Аванзо мельс ледсь, што эряви рудазов веденть ертомс. Совась кудов ды кевстизе Анянь:

– Веденть валык?

– А ведесь лиядомс должен, – мерсь Аня. 

Еще материалы

Комментарии