Лисьмаприне
ПокштямЭрьвантень ютксонок эрямось максови весть, кода сонзэ печтямс, мезе кадомс мельганок эйкакштненень, нуцькатненень, тиринь енксонтень, кочкамо эстенек. Кие-бути эри сэтьместэ, ковгак апак капша, чись ютась ды паро. Кинень жо кизэнь сехте кувака чиськак нурькинекс маряви, сатовольть бу виензэ веньпертькак важодевель. Мельсэнзэ-превсэнзэ свал чачить од арсемат, конатнень апак пеле ды лезэвстэ совавты эрямос. Потсонзо палыця толнэсь маласонзо улезетненьгак кирвазти виень апак вансто важодеме, эрьва арсеманть парсте тевс нолдамо. Истямо ломанекс ульнесь Иван Иванович Суюшов, Социалистической Трудонь Героесь.. Покш мельспаросо ды прянь шназь евтан, што те монь покштям. Кода ледстяса сонзэ лемензэ, рунгован валови а чарькодевикс лембе. Монень эзь саво вастовомс мартонзо эрямстонзо, но ламо лембе ды паро валт марсинь сонзэ коряс.
Чачсь сон Канаклейка велесэ тежа вексэсядт комсь вейксэце иестэ, кажов семиясо. Эйкакш пингестэ кармась важодеме колхозсо. Кода се шкань весе эйкакштнэ, печтясь стака пинге. Кеветее иесэ савсь тензэ озамс комбайнас. Сонзэ комбайнанть прясо свал лыйнесь якстере флажокось. Лемезэ ульнесь изницятнень ютксо.
Ламо шнамо коневсо казезель покштям. Важодемас покш бажамонзо неезь, сонзэ кочкизь бригадирэкс. Се шкане колхозсо кастыльть сюро, эмежть. Весе, кие важоди мода лангсо , содасызь, кодамо стака те тевесь. Покштям прянек– пильгенек чопавтсь те а шожда тевентень. Валскень зорясто саезь ракшань новолемс сон паксясоль.
Эх, сиземань а содыця ломань! Саженензэ марто покштям эскели паксяванть, лови чинь-чоп теезь тевтнень .Шка сась кудов пурнамс. Сермалесынзе весе важодицятнень ды евты сюкпря паро тевест кисэ.
Сизезь рунгонть пильгетне пачтясызь покштянь кудов. Ансяк печтясы поровтонть -шлязь-шляви сиземась. Тесэ сонзэ учить кемголмово пакшанзо ды вечкевикс низэ. Вишкинькатне капшить куземе элезэнзэ, покштнэ бажить евтамс, мезе сынь тейсть кудоютксо чинть перть.
Ламо сюронь кастомань кисэ сон ульнесь казезь Ленинэнь лемсэ орденсэ.
Важодезь, покштям эзь фатяяк, кода стака ормась совась потмозонзо ды сезизе од эрямонзо. Чополгадсь кудось. Бабань кедь лангс лиялесть оште сисем эйкакшт. Пек стака ульнесь бабанень покштявтомон, но весень стявтынзе пильге лангс. Сынь кассть ды сралесть масторонь эрьва енга. Эрьвась эйстэст муизе эсь эрямокинзэ. Кавто церанзо поладызь тетяст тевенть.
Минь, кевейксэе нуцьканзо , мельспаросо ледстнетяно сонзэ валдо лементь, паро тевензэ. Покштянь лементь а стувтнить велень эрицятне, тонавтнема кудосо эйкакштнэ ламо лембе валт евтыть сондензэ.
Эрьва иестэ, сонзэ чачома чистэнзэ, ютавтовить футболсо налксемат.
Алена Баюшкина.
Тиринь келем
Монь тиринь келем эрзянь. Сон монь туртов сехте малавикс ды питней. Тень мон карминь чарькодеме эйкакшпингестэ саезь, зярдо аволь парсте еще содылия рузонь келенть ды весе эсь мелень, арсеман, ежомарямон евтынь тиринь келем вельде. Истя жо, эрзянь келенть вельде саилинь эрьва-кодат содамочить. Тиринь келенть мазычинзэ ды питнензэ мон чарькодинь эрьва чи, зярдо весе малавиксэнь кортасть эрзянь кельсэ. Тетянь-авань келесь, тиринь кудосо марязь валось пингезэнь кадови мельс-превс, зярдояк а стувтови.
Шкастонть седеяк пек парсте карминь содамо эрзянь келентькак. Ней, школасо тонавтнемстэ, покш мель яван сонзэ тонавтнемантень. Мон покш мельспаросо якан эрзянь келень уроктнэс, конатне пек ды пек тукшныть мелезэнь секс, што неть уроктнестэ мон карминь содамо пек ламо тиринь кельденть, тонадынь видестэ ды вадрясто кортамо эрзякс. Теде башка мон мельспаросо якан краеведениянь кужос. Тосо мон ламо карминь содамо тиринь веледем, ламо мель явань эрзянь келентень: сермадан эрзянь кельсэ евтнемат.
Сехте пек монень вечкеви кунсоломс бабань кортамонзо. Сонзэ келесь прок истямо жо, но улить эйсэнзэ лия явовикс енксткак. Бабань кортамозо маряви тень седе чевтекс, кезэрень пингень моронзо седе гайгицякс ды мазыйкс. Пек вечкан мон неть моротнень кунсоломо. Сынь гайтевть, а кодамо покш смусть кандыть! Бабань чевте вайгелезэ маряви тень гайтев цековонь морокс. Мазый валтнэ прок ливтить сонзэ седейстэнзэ, ойместэнзэ истямо вечкема ды мелявкс марто, кунсоломсто мездеяк лиядо а арсезеваткак. Зярдо сон корты, мон сеедестэ марян пек мазый, чевте валт: «пакшинем», «тякинем», «тейтернем», «мазыйка» ды ламо-ламо лият.
Мон покш вийсэ вечкса эсень тиринь келем. Сон маряви монень гайтев цековонь морокс, прок бабань кортавксозо, морозо.
Люда Баюшкина.
Ратор леенть чиресэ сядо васенце ие эрясь Анна баба
Ратор леенть чиресэ ашти Колазеле велесь, косо уш сядо васенце ие эрясь Анна баба. Эрясь сон нуцьканзо кудосо. Мельспаросо ашти малавикстэнзэ. Эзть стувтне эйсэнзэ эйкакшонзо, нуцьканзо.
Те ломанесь ютась эрямованть а шожда ки.
Чачсь Моисеева Анна Григорьевна Колазеле велес 1908-це иестэ. Семияст ульнесь кажов. Эйкакшпингестэ саезь савсь ламо важодемс ломанень кедьга. Сон а пелиль стакачиде. Ульнесь сон мазый, шумбра тейтерь. Лисиль чокшне ялга юткс, сергедиль моро. Вечкиль гармония мельга киштемеяк. Мирденень лиссь кемзисемге иесэ. Поздяковтне ульнесть эриця семиякс, секс сонзэ тетязо каршо эзь моле.
Велень койтнень коряс ютавтозель свадьбась. Одирьвась урнесь, якась ялганзо марто велева кашадо ярсамо .
Ушодовсь авань эрямось. Вейке омбоце мельга чачсть эйкакштнэ. Мирдезэ, Анна бабань ледстнеманзо коряс, ульнесь сэтьме, важодиця, стяко валонь а кортыця. Колхозонь теевема шкасто Поздяковтне кадовсть единоличникекс. Кудазорось кемсь ансяк эсензэ лангс. Керизь пирест, саизь скалост, саразосткак. Кудо вакссо ульнесть анокстазь лазт кудопрянь вельтямс, неньгак саизь. Цидярдызь кавонест неть стака шкатнень Анна ды Петра.
Войнань шкась седеяк стакаль. Мирдензэ саизь воевамо. Анна лиядсь ниле экакш марто, ветецесэнть пешксесэ. Савкшнось ламо важодемс, ярсамс тикше марто човор кшиде. Тельня ускомс вирьстэ пенгеть эсензэ лангсо. Теяк салава. Эли валске чоподава, эли веть туиль ялганзо марто. Вирень ванстыцятне кундсесть, сайнесть пенгетнень, керсесть пикстнэнь.
Телестэнть кучизь Сурскоев окопонь чувомо. Кудос кадовсть ниле вачодо пешксе эйкакшт. Колмо ковт чувсь окопт. Самодо мейле чачсь тейтерне. Теньгак цидярдызе авась. Сехте стакась ульнесь икеле. Сась сонгак. Ве чистэ кандсть кавто сермат. Вейкесэнть мирдезэ сермадсь, кода тюри. Омбоцесэнть евтазель, што тюремань шкасто чавовсь мирдезэ. Конанень кемемс? Савсь молемс велень учителентень, сермас содыцятнеде аламольть. Сон толковизе: «Эсензэ кедьсэ сермадозь сермась кудов мольсь ниле ковт».
Эрьва чинь тевсэ те апароськак кандовсь эрзянь авантень. Ансяк рунгозо седе мендявсь, чамасонзо сормксевкстнэ ламолгадсть.
Иетне ютыть. Эйкакштнэ кепететсть. Тонавтнесть школасо, лездасть кудо ютконь тевтнесэ. Витя евтызе мелензэ совамс колхозос. Авазо каршо эзь моле.
Тейтертне, аваст кондят: шумбрат, мазыйть, курок лиснесть мирденень.
Стака авантень ульнесь, зярдо ве иестэнть кулость церазо, урьвазо, нуцьказо. Эзизе кадо сонзэ чаво кудос нуцьказо Петя. Саизе бабанзо беремазонзо ды кинь трокс кандызе эсензэ кудос. Тесэ эрияк ветеце ие Анна баба.
Кеме ломанесь Анна баба, цидярдынзе весе эрямонь сталмотнень. Пингензэ перть сон изнясь весе апаронть, конась понгонесь каршозонзо.
Сон ютась кувака эрямонь ки. Минек шкане стака муемс истямо виев, мездеяк а пелиця ломань, кодамокс ульнесь Анна баба.
Павел Топоров.
Чевте седей ойме ломань
Эрзянь раськеденть арсемстэ, лиясто ловномстояк мелезэнь свал леди Ванюгань Анна бабам. Сон эриль аволь васоло минек эйстэ. Оште эйкакшпингстэ минь ялгацек свал яксилинек налксекшнеме сонзэ вальмалов. Неилимизь, лисиль ваксозонок ды ушодылинзе евтнеманзо икелешкань стака эрямодонть, важодемадонть ды седе, кода сон ульнесь трактористкакс. А минь, весе кото-сисем иесэ эйкакштнэ, кургонь автезь кунсолылинек. Лиясто кармиль морамо тенек эрзянь морот, конатнень сонсь ладсекшнынзе.
Анна бабам, те Татарова Анна Васильевна, чачсь 1924 иень якшамковонь кемголмовоце чистэ Орданьбуень Лувне велесэ. Тетянзо-аванзо эрзянь сокицят-видицят, эйкакшост ламольть. Сынь весе оште эйкакшпингстэ маштыльть лишмень кильдеме, сокамо, изамо, видеме. Анна Васильевна ютксост сехте вишкинель, но сехте бойкаль, мездеяк а пелицяль, тевс чарькодицяль. Те весе тензэ маштовсь эрямосонть.
Ютасть иеть… Ушодовсь Великой Отечественной войнась. Фронтов саизь велестэнть весе цератнень. Кадовсть ансяк сыретне, эйкакштне ды аватне. Но эрявсь сокамс, видемс, кастомс кши. Те шкантень Анна Васильевнанень топодекшнесть весемезэ кемзисемге иеть. Эрявкшность механизаторт. И колхозонь прявтось арсесь кучомс од тейтерть тонавтнеме трактористкакс. Сайсть мель тонавтнемс кото тейтерть, ютксост ульнесь Анна Васильевнаяк. Тонавтнесть сынь Чаунзабуень Сабур-Мачкасы велесэнть. Кото ковс сынь тонадсть гусеничной трактортнэнь нолдамонтень ды ветямонтень. Теде мейле весе тейтертне кучозельть важодеме Отяжелев, тосо ульнесь МТС-сь. Анна Васильевнанень сатотсь таштыне тракторось «Натти» сабан марто. Неть трактортнэ ульнесть малав аволь истят, кодат нееньсетне. Штобу кармавтомс сынст роботамо, эрявсь кувать чаравтомс недь. Кирвазиль сяткине ды тракторось урнозевиль. Истя эрзянь авась кармась важодеме колхозсо трактористкакс. Важодсь Анна Васильевна тракторсо 1946 иес.
Стакат ульнесть шкатне, важодемскак ульнесь пек стака.
Эрямось лепштясь ломантнень нужачисэ ды майсемасо. Но те эрзянь авинесь печтинзе сынст. Эзь синдеве стакачинтень.
Эрямосонть ульнесь сон пек ероков ава, маштыль вадрясто пидеме– панеме. Кода паро обуцянь, кортакшов ломань, вадрясто эрсесь шабранзо марто, кить содылизь, весе вечксть эйсэнзэ. Те свал тевсэ лакиця авась кенериль и колхозсо важодеме, и кудоютконь ды кардазонь тевтнень тееме. Косо ульнесь Анна Васильевнась, тосо свал марявсть пейдемат, морамот, киштемат. Морыль сон пек парсте. Вайгелезэ виевель ды мазыель. Моротнень сонсь ладсилинзе. Улить моронзо и Лувне веледенть ды сонзэ эрицятнеде. Те сон лездась ДК-нь «Сырнень суркс» фольклорной ансамблянь теемантень. Течинь чис морыцятне морсить сонзэ моронзо. А бути велесэнть свадьба ды кудавась Анна Васильевна, то тозонь пурнавильть пелевеле, штобу кунсоломс, кода сон моры ды урни. Сон урни – кунсолыцятне авардить. Пек парсте морыль церьковань моравтоматненьгак, маштыль лайшемеяк.
Сон ульнесь чевте седей ойме ломань, секскак сакшныльть тензэ сеть, конатнень арасель моцест. Лездыль тенст чевте валсо ды молитвасо.
А тракторонь ведямо маштоманть сон эзизе стувто пингензэ перть. Кассть церанзо, истяжо важодсть механизаторокс. И сеедестэ неилизь Анна Васильевнань, кода сон озыль церанзо тракторонтень ды пейдезь ардыль мекев-васов веленть куншкава.
Вана истямо ульнесь эрзянь велень авась, Анна Васильвна Татарова.
Костя Константинов.