Торбеевские новости

Од ломанень сельмованфксса

Етай кизоть Саранскяйса етафтовсь Российскяй Федерациянь Мокшэрзянь кялень форум «Тядянь кяльсь од ломаттнень сельмованфксса». Форумса работасть кафта дискуссионнай площадкат: «Мокшэрзянь кяльхне информационнай пространстваса» и «Родной кяльхне культуратнень диалогса».
Васенце площадкаса корхтамась мольсь сянь колга, кода ванфтомс и келептемс мокшэрзянь кяльхнень информационнай пространстваса. Вятезе дискуссионнай клубть Мордовскяй государственнай университетонь филологическяй факультетонь деканць Ю.А. Мишанин. Корхтамась ульсь содержательнай. Ламоц делегатне азозь эсь мяльснон, пачфтезь ся прябалатнень, конатнень махта сашендови васьфнемс эрь шинь работаса. Кепотьксонди, «Од пинге» и «Сияжар» редакциянь корреспонденттне азондсть, кода мольфтевихть национальнай страничкатне телевиденияса. Телевизионщикне шарфтсть мяль аф аньцек сатфткснень лангс. Синь стане жа азозь, што «Сияжарсь» и «Од пингсь» лисендихть пцтай фкя пингть, сяс ломаттненди сашендови «комотнемс» каналста каналс. Аф прибавай зрительхть и ся, што эсь кяльса сюжетне лисендихть эфиру ся пингть, мзярда покоди ломаттне нинге рабочай вастсост. Лама корхтафоль районнай газетатнень эса мокшень и эрзянь кяльса полосатнень нолямаснон колга. Азфоль мяль, штоба «районкатне» сяда сидеста ноляльхть родной кяльса лопанят, сяс мес тячиень шис тядянь- алянь валсь синь страницаст васьфневи шуроста. Сяс эряви тянь ширде мольфтемс работать сяда эрязста, вдь мокшень и эрзянь валть районкань лувихне учсазь.
Омбоце дискуссионай площадкаса, конанц вятезе Мордовскяй госуниверситетонь профессорсь А.Г. Бурнаев, ванондовсь мокшэрзянь кяльхнень тонафнемасна образованияса: идень садса, школаса. Кода ащихть родной кяльхнень мархта сотксне республикань культурань эряфса. Тяса корхтамась мольсь сянь колга, штоба од ломаттне афолезь юксне эсь кяльснон, шачема-касома культураснон, ванфнелезь койснон-обуцяснон. Тянкса тячи лама тиендеви: и идень садса, и школаса, и ВУЗ-са. И штоба тевсь тянь ширде молель парста, лотксемс тячиень сатфкснень лангс аф эряви.

Еще материалы

Комментарии