Торбеевские новости

Машты кяттне аф сизихть

Тячиень шить районца аф пяк лама мастерицада, конат штакшнихть-тиихть мокшэрзянь нарятт, украшеният. Фкясь эздост - Дракина велень авась Надежда Андреевна Грачева.
- Кодама-стакшнема тонадонь нинге од пингста, - азонды мастерицась. - Кодак аделайне 8 класснень, и эстокиге кармань покодема Торбеевань КБО-са трикотажнай цехса. Вов эста тя аф теждя тевсь и кельговсь. Тоса покодень кемоньда лама киза. Стакшнеме штанат, кофтат, платьят. Кода алянди, стане и аванди. Тейнек лац работаманкса сидеста макссесть путевкат. Ся кизотнень монць нинге тонадонь вышивандама. Стафненди тиендень разнай мазы узорхт, конатне пяк тушендсть ломаттнень мяльс.
Сяда тов Надежда Андреевнась стамать-кодамать кадозе и кярьмодсь тя ремеслати аньцек лама кизода меле. Валонзон коряс, ашель мзярда. Сяс мес эрявсь работцемс, трямс-касфтомс иттнень, меле ваннекшнемс унокнень.
Н. А. Грачевась шачфтсь колма итть, конат тядяснонды-аляснонды казьсть вете унокт. Работцесь и аптекаса фасовщицакс, больницяса - сестра-хозяйкакс. Дракинань «Прогресс» хозяйстваса свинофемаса варчсесь тувот. Коса ба афоль покоде, сембе вастса шнакшнелезь и казенделезь питни казняса, почетнай грамотаса.
- Пенсияс лисьфан кемоньда лама киза, - азонды Надежда Андреевна. - А стакшнемати кярьмодень кода нилице кизось. Шабатнень касфтоськ. Тушендсть кажнайсь эсь кудгаст. Уноконькевок ни оцюфт. Вов и мувсь пинге. Васенда вышивандань нардамат, рисовандакшнень тейст панчфкат, мокшэрзянь узорхт. Меле седизе токась шкайнятненди и кармань стакшнема, кода картина лаца, Богородицать. Тяфта тиень стафкст Богородицать разнай иконанзон корява. Тяда башка тиендян мокшэрзянь мазы куклат. Эрь нарядть куклати стаса или кодаса, а меле кода эряви наряжаса. Мокшэрзянь сюжетнень сявондсайне эряфста. Кепотьксонди, тяфтама мазы панарса, кодамот куклане, васенда наряжакшнесть Ст.Пичуры велеса.
Надежда Андреевнась мазы няканзон, нардаманзон и стакшеф шкайнянзон макссесыне раднянзонди, мала ломанензонды, мезенкса синь тейнза азыхть оцю спасиба. 

Еще материалы

Комментарии