Стихонза сувасть марстонь сборнику
Азка, варма…
Варма, арьсеманень салайть,
Коське лопакс панить ляйс.
Меки пара мяльнень анан,
Тейне лезды вярдень Шкайсь.
Ёрдайть арьсеманень томбас.
Мес шта ризносян коль мон?
Бта ваянь мон вень шобдас
Или няян кальдяв он.
Варма, валнявок аф азат,
Шинек-венек мяльсон фкясь:
Кода сёксесь пачкодсь тяза?
Коза кизоть кяшсь туцясь?
Варма, валхнень тяйть ужяльде,
Увфцень лоткафтк, мезьге аст:
Кода эрят, азонтк, сяльде,
Сёксеть мазы пингонц казьк.
Сёксе
Шерьфни коське тишеть вармась,
Модась стакаста куфкстась,
Менельсь равчкодома кармась,
Сетьме пиземня срхкась.
Тюжя лопатне ни пяярсть,
Зрнянь тюсса ацазь кить,
Садса марьхне ёт ни кенерсть,
А туцятне кяшезь шить.
Каркне лямбе шири лиихть.
Лиихть, вешихть лямбе вастт,
Коса варматне аф виихть,
Коса сёксе ёфси аш.
Пакся
Сёронь паксясь пиндолды, зрнянне.
Тяса лама сёрода ни кассь.
Вармась азоркс лиенди тияне,
Мзяра сёронь товда ёрясь, прафтсь.
Аньцек паксясь фалу эсонк анды,
Кшида лама максси тейнек сон.
Аф ужяльдезь паршинц макссы ванды,
А мзярс сон няи валда он:
Кода вармась прафни сёронь прятнень,
Кода авась кши моркш лангу лихтсь,
Масторлангонь пара од кулятнень,
Кода колганза мон тяштян стихт.
Вирьса
Шуфттне вирьса ащихть виде ронкт,
Куфцихть, мярьгат, кирнихть оцю сталма.
Ситерьксть ёткса эряй стама шобда,
Пелем-панжамнятне туйхть кувалмат.
Келу пораняса морайхть нармотть,
Азондыхть синь, кода эряйхть тяса.
Кода сетьме, лямбе вармась:
Шерьфни лопанятнень шуфттнень пряса.
Кда ломанть седиса аф пара,
Потмосонза кяшне, кода пораф.
Моли вири, шуфттнень алу арай,
Кулхцонды сон цёфксонь мазы морот.