ПЁТР УВАРОВИЧ ГАЙНИ (ПОЗДЯЕВ) (1910–1968)
Таштамковонь 6-це чистэ топодевельть бу 115 иеть Петр Уварович Гайнинень. Чачсь сон Нижегородской областень Лукояновань буень Салманбиё (Салдоманово) велесэ. Эйкакш пингезэ ульнесь пек стака. Ушодкс школань прядомадо мейле кармась скалонь стада ваномо сюпавонь кедьсэ. Тень лангс апак вано, прядызе Пойской од ломанень школанть. Мейле кучизь тонавтнеме Лукояновав средней школав, но школанть эзизе прядо – эрявсь лездамс семиянтень. 20-це иетнень прядомсто велетнева уставась коллективизациясь. Появасть колхозтнэ. Эрямось лиякстомсь. 1929 иестэнть Пётр кармась тонавтнеме Нижегородской пединститутсо, но куроксто ютась Лукояновской педагогической мордовской техникумов. Тонавтнемстэ кармась сёрмадомо валморот. Васенце валморозо «Кизэнь чи» (руз. «Летний день») лиссь 1932 иестэ Лукоянонь «Вейсэнь эрямо» (руз. «Коллективная жизнь») кулялопасонть. Теде мейле сон сайсь эстензэ псевдоним «Гайни». Рабфаконть прядомадо мейле сась Мордовияв. Васня важодсь Кочкурвелесэ – «Якстере колхоз» райгазетасо, мейле тонавтсь эрзянь кель ды литература Кемлянь сельхозтехникумсо.
Пётр Гайни нолдась вейксэ книгат. Васенце валморонь пусмозо «Гайгек, вайгель» (руз. «Звени, голос») лись 1933 иестэ. 1934 иестэ примазель СССР-нь писателень Союзонь членкс. Москов ошсо вастовсь Максим Горький марто, кона валморонзо пек эзинзе шна, но ёвтась тензэ лембе валт: «Эряви важодемс, вешнемс тонсеть валморонь кинть и сёрмадомс эсеть родной кельсэ». Неть валтнэ токасть Гайнинь седейс. 1935 иестэ лись омбоце валморонь пусмозо эрзянь кельсэ - «Уцяска» (руз. «Счастье»), ков совавтозь ульнесь васенце поэмазо «Кавто уцяскат» (руз. «Два счастья»).
1936 иестэ Пётр Гайни эрясь Лукояновасо ды важодсь районной газетасо: ульнесь редакторокс литературной кулялопанть ды литературной консультантокс. Се шкане васоло Урал ёно кепедевсть покш заводт ды фабрикат. Пётр Гайнинень эрявсь весе те неемс. Сон тусь Серов ошов. Тосо маризе войнань кулянть. Ине Отечественной войнань шкасто валморозеесь ульнесь «Советский воин» фронтовой кулялопань спецкорокс, танково-десантной ротань командирэкс. Казезь Якстере Тештень ды Отечественной войнань 1-це степенень ордентнэсэ. П. Гайнинь войнань шкань валморонзо пешксеть эрямонь пси ойме коштсо, сынь лездасть тапамс ятонть. Валморосёрмаденть лириказо лаказь лакась алкуксонь седей лембесэ, изнямонтень кемемасо. Немецтнень каршо тюремась кармась Пётр Уваровичнень гражданской касомань тонавтнема таркакс. Сонзэ Ине войнань стихензэ, моронзо фельетононзо, очеркензэ лиснесть ламо фронтовой газетасо, мик «Красной звезда» газетасо. Кой-кона стихензэ ульнесть путозь гайтень ладс ды кармасть морокс. Ине войнань шкасто кармась содавикс поэтэнть «Слава» балладазо, кона икеле ульнесь лемдязь «Сазорка». Алтазель сон Валерия Гнаровская санитаркантень. Тейтересь тейсь героической подвиг тюрема паксясо, конань кисэ сонензэ куломадо мейле максозель Герой Советского Союза лем. Войнань китне пачтизь сонзэ Украинав, Молдавияв, Румынияв, Болгарияв. Кудов велявтсь инвалидэкс.
Войнадо мейле важодсь Мордкизсэ, радиокомитетсэ, «Эрзянь правда» кулялопанть редакциясо, сёрмалесь «Сятко»-со, «Ленинэнь киява» кулялопасо. Вишкине ловныцятненень Гайни эрзянь кельс ютавтокшнызе «Конёк-Горбунок» Ершовонь ёвксонть.
Кулось 1968-це иень ожоковонь 17-це чистэ. Калмазь Саранскойсэ.
Слава
Советской Союзонь Героенть Валерия Гнаровскаянь валдо лемензэ лецтнемга.
Прок килей уставна ды мазый
Тейтерь батальонсо ульиесь
Ды свал валдомгалесь чамазо,
Зярдо сон боецтнэнь вастнесь.
Кияк тензэ лемсэ эзь мере,
Сазоркай мерькшнесть вейкень пес,
Вечкелизь боецтнэ тейтеренть,
Коната эждякшнось оймест.
Ды алкукс боецтнэнь седейсэ
Ульнесь сон сазордо родной, —
Симсть-ярсасть мартоизо сынь вейсэ
Ды вейсэ якасть биев бойс.
Лиясто боецэсь раняви,
Допрок уш виезэ машты, —
Сазорось лездамо каяви,
Пульзядо эйзэнзэ шашты,
Тапарясы палыця рананть,
Лоткавтсы чудемстэ веренть, —
Энгами сэредьксэсь ды вана
Боецэсь, — счастиядо слень, —
Кедьсэпзэ — вийтемесэнть сорнозь,
Сювордасы сонзэ кеденть...
- Пасиба, пасиба, сазорнэм! —
Мери тензэ, эль-эль пейдезь,
Ды сонсь уш нильни летьке варманть:
Куломась малазонзо сы...
Сазоркась прок шождыне нармунь
Тол поцто ранязенть ливтьсы.
Ды вант уш лиянень кенери,
Секс дивазь боецтнэ кортнесть:
-Косто те цяняка-тейтеренть
Истямо певтеме виесь?
Тень ёвтазь, боецтнэ эзть згиля,
Истяня сазоронть сынь шнасть,
Сонзэ сынь седейсэ вечкилизь,
Прок мазый тундонть, ды содасть,
Косто од тейтеренть те виесь,
Кинь чамасо зорювань цвет,
Ки кандтни уш зярыя иеть,
Прок честь, комсомольской билет.
Весть, ансяк чурокстомсь чоподась,
Равжостонть велявтсь голубойкс,
Кивчкадсь сэнь ракета ды моданть
Вельтизе качамсо пси бой.
Вешкема ды зэрть...Врагонть ёно
Лаказевсь мик пандо чамась.
Истяня минек батальонось
Ормаза душмантнэнь громась.
Сазорось кисия пацясо
Тапарясь солдатонь томбавкст.
Друк седеень сыргстазь, фатясь сон:
Сэрьсэнзэ сявори комбат.
«Шаштомс бу пульзядо, а зярдо,
Куломась а учи вандынть...»
Ды вана: чии сон, кенярдозь,
Прок вармась эйсэнзэ канды.
Пачкодсь.
Уш сэретьксэнть тапари.
Ков сялгсь ятонь кежеиь кшни-панкс.
Чу, мень те увнома сон мери?
Удалов варштазевсь:
«Вай, танк!..»
Сои равжо крест марто ды сёрмав,
Гуй понань вельтизе бронь.
«Мерькасы цёранть маштыкс ормась!
Кадык уш мерькасамам монь...»
Сайсь стака гранатат ды ине
Пирявтокс каршозонзо стясь.
Кодамо неявсь сон вишкине
Те тейтеренть вакссо танкась!
Пандошка машина ды ломань
Кежев тюремасо васодсть.
Рангстамо ды зэрть...ды куломась
Качамокс вельксэзэст поводсь.
Прок килей уставна ды мазый
Тейтересь эрямодонть явсь, —
Шта ладсо ловтаня чамазо
Куломанть челькесэ артавсь.
Ней, валдо пеетьксэнзэ лецтнезь,
Кона сезезь онокс ёмась,
Вельксэзэнзэ весе боецтнэ
Мелявтыця прясост комасть.
Се мелесь, што сазордост явить,
Ульнесь тенст — а кемевикс мель:
Ведь ламот томбавильть, ранявильть, —
Сон яла живоель, кемель.
Но вана сон раужо калмось! —
Сельведтне певерить, прок ямкст.
Те рисксэнть марязь, верев палманькс
Комбатось чалгась пильге лангс.
Лов ладсо ашолдсь сонзэ чамась,
Эль-эль пильге лангсо аштезь,
Сои мерсь:
«Ялгат-оят, те, нама,
Горясь а кельгстяви мештес,
Но кадык пачкоди мелезэнк,
Што живстэ сазоронть нейсынк.
Аволь тень кулома лемезэ,
Те — слава, конатань гайтезэ
А опами пингеде пингс!»
(1943 ие)