"Время и жизнь"

Вячеслав Левштанов: «Кельгость эряфть»

Зубово-Полянскяй райононь Потманя велеста СВО-в тусть вете цёрат. Фкясь эздост Вячеслав Левштанов. Нинге мобилизацияда инголе эсь мяльс коре анась пря шачема-касома масторонц аралама. Пцтай колма кизоста мокшень цёрась няйсь-ётась аф кржа. Ётай кизоня сон казьфоль Мужествань орденца. Январьста Вячеславсь кафта недяляс сашендсь шачема велезонза, коса и удалась васедемс и корхнемс мархтонза

- Вячеслав, сидеста-аф нолятядязь отпускс? - Тяда инголе отпускса улень апрельста. Нолдамазь сяс, мес ялганень мархта пяшкодеме оцю задача. Инксонза отпускта меле тейне торжественнайста максозь Мужествань орденть. - Азонтк, кода сатовсь тяфтама оцю казнесь? - Мужествань орденть максозь сяс, мес кафксть якаме оцю штурмс, сявоськ Бахмутть флангонзон. Минь задачаньколь – ускомс десантть противникть малас. Эрявсь сявомс сери вастт, штоба лангсост ащельхть аф ВСУшникне, а минь. Лия ки ашель – аньцек видеста малазост. Инголен ардсть танкаса и урятцезь минатнень, мельгаст – БТР-Д-са мон. Тяфта и пачфтеськ десантть, противникть малас лядондсь 15 метра. Тюремась пяк стакаль, сяс мес улеме пакся кучкаса и няевоме, кода кядь кучкаса. Тяда инголе техникаса тяфтама малас кивок ашезь пачкотькшне. Минць аноклакшнеськ сембе машинатнень, танкатненди арьсеме-латцеме броня, штоба дроттне афолезь сата. Тевсь тифоль, противниксь фланкнень эзда ворьгодсь. Вов тянкса тейне и нинге ниле ялганенди макссть Мужествань орден, а сятненди, кит танкаса аропнезь инголенк кить – «Россиянь Герой» лем. - Кода сать мяльс тумс СВО-в? - СВО-ть ушедомста ламоц ялгане, кинь мархта служань армияса, лоткасть сувсемда интернету. Шарьхкодень – синь тосот. Лац-ряц арьсень, кочкайне документонень и срхкань – эсь 51-це полкозон, коса ётнине срочнай службать и служань контрактс коре. Тосотольхть ламоц ялгане, ингольдень командирне. Кой-конат ашет ни шиса. Семьясонковок ульсь кинь эзда сявомс кепотькс. Тядязень и алязень щятясна-атясна Тимофей Тимонин, Сергей Левштанов и Семён Семаев ульсть Великай Отечественнай войнань ветеранкс. Сидеста арьсекшнян колгаст. Кда афолень ту шачема-касома масторозень аралама, эста кикс улелень синь инголест? СВО-са велестонк аф ськамон: фкя класса тонафни ялгазе Василий Кажаев, ялгане Алексей Самошкин, Григорий Клещеногов, Иван Осауленко. Пцтай сембе ранендафт, кой-кит тянемс ётнихть реабилитация. - Кода ётнесть васень шитне фронтса? - Эстокиге азозь, што аф сатнихть БМ-Д-тненди и БТР-Д-тненди механикт-водительхть. Ня машинатне содафтольхть тейне, арнень мархтост контрактс коре служамстон. Лядондсь аньцек лятфтамс. Ковшкада меле тонадонь и монць анань пря Бахмуту. Васенце кизоть лама работаме эвакуацияса, усксеме шавфнень и ранендафнень эса, пачфнеме ярхцамбяльхть, боеприпаст. - Мезсь тоса сембода пелькссь? - Ялгань юмафтомась. Аф мзярда ляцендихть лангозот или прай ваксозот снаряд, а мзярда шавовихть ялгатне. Пяк лама ялгада юмась ня кизотнень. Сембода ламось аф Украинаса, а Курскяйса мекольце пяле кизоть. Сидеста лятфнеса командирозень, кона шавовсь аф кунара. Национальностьс коре казахоль. Задачань пяшкодема ардомста сязезе осколкаса дронць-камикадзесь. - Мзярда ётаде Украинаста Курскяи? - Тя ульсь ётай кизонь август ковста. Веть стяфтомазь и мярьгсть: «Тинь улихть колма частонте, штоба кочкамс техникать, лия паршихнень-меснень и срхкамс Курскяи». Мзярда аньцек пачкодеме Курскяйть малас, шарфтоме мяль шава велетнень лангс, тоса лятфтольхть аньцек сире атят-бабат. Сяльде, ламоц велетнень эзда вракть панемда меле, ломаттне меки мртцесть эсь кудозост. - Азонтк, кода кочкайть военнай тевть? Кода ладявсь эряфонь кице школада меле? - Школаса сембода мялезоноль физкультурась. Налхкондонь футболса, школьнай команданьконь мархта аф весть сявондеме васенце вастт пялькстомаса. Мялезон улендсть рузонь кяльсь и литературась. Оцю кельгома мархта фалу лятфнесайне учительнень и сюконян теест. Потманяса 9-це классть шумордамдонза меле поступань Пензенскяй областень Профессиональнай технологиянь и бизнесонь Спасскяй колледжу, коса тонафнень электрикокс, газоэлектросварщикокс, автослесарькс и водителькс. Тяда меле срхкань армияв, пяк ёрань повомс ВДВ-в. Тяфта и лиссь. Васенда кучфолень «учебкав» Омскяи. Колма ковда меле распределенияс коре повонь Тулав парашютно-десантнай 51-це полку, коса и служайне марнек срочнай службать, а меле нинге кафта кизот служань контрактс коре. Лама цебярь ялгада васьфтень служамста. Ётксост Давид Малыйкин, конанди максф Россиянь Герой почётнай лем. Васенцеда васьфтеме мархтонза Мордовиянь военкоматса. Повоме марса «учебкав» Омскяи. Омскяйса минь, Мордовияста саф цёратне, мон, Слава Шишканов, Давид Малыйкин и Игорь Панькин, кемоста ялгафнеме, фалу марсолеме. Тячемс кирттяма фкя-фкянь мархта соткст. - Сюкпря корхнеманкса, Вячеслав! Кодама совет максолеть морафтыень- конди? - Кельгость эряфть и кеняртькшнеда аньцяйняти. Оцю паваз якамс сетьме ульцява и аф пелезь варжакснемс перьфпяльге. Тясть юксне тянь. Оксана БЕЛКИНА.

Еще материалы

Комментарии