Сембода мяляфтови ши
Илья Девинонь, мокшень писательть и ВОВ участникть мяляфтомаста
Кагоднень сюволямста кядялон повсь равжа лангакс тетрадь. Ушедонь тюжалготф страницанзон яфиема и …бта васедень пяк кунардонь ялга мархта.
Полкозонк сась куля: курок получатама од танкат и аф кодама-кодама «Валентайнат», а тридцатьчетверкат - «минцень»! Ся пингти странасонк пяк вишкомсь танкань и боевой лия техникань нолямась. Кода тяштьф Советскяй Союзть Великай Отечественнай войнанц нюрьхкяня историяса «1943 кизоня СССР-са тифоль комсь ниле тежянь танка и самоходно-артиллерийскяй установка, пцтай колмогемонь вете тежянь самолет, сяда колмогемонь тежянь разнай орудия… А немецне кафта кизоста 1942-1943 - кенерсть тиемс кемгафксува тежянь кафта сятт танка и пцтай кемонь тежяньда сяда кржа самолет.
Эста ашеськ сода ня цифратнень. Содаськ аньцек: тылоньке - оцю надияма васта. Сон тиезе семботь, штоба воиноньконьди улель мезса тюремс, улель мезьса щамс-карямс и улель мезьда ярхцамс-симомс. Содасаськ сяньге, што странасонк вишкомкшнесь патриотическяй пяк оцю движения - народсь сонць кочксесь кой ярмакт, кой-месть армияньконь вооружёндамс.
Кулеськ, кода Саратовскяй областьста колхозниксь Ферапонт Головатый макссь эсь ярмактонза сяда тёжянь цалковай самолётонь строямс. Сонь лацонза тисть сядот лия колхозник марнек странаньконь келес. И пяк пара, што тя движенияса аф мекольце вастса няфтезь пряснон республиканьконь трудящайнза. Пцтай вейхксогемонь сисем миллион цалковай макссть синь эсь ярмактост танкань и самолетонь строямс.
Тянь колга пара мяльса лятфнян сяс, мес «тридцатьчетверкатнень, конатнень надияфтозь полконьконди и конатнень пяк учендозь танкистоньке, - ся боевой машинатнень тифтезь эсь ярмакснон лангс советскяй содаф писательхне Алексей Николаевич Толстой, Александр Евдокимович Корнейчук, ученайхне Милица Васильевна Нечкина, Исаак Израилевич Минц, Марк Борисович Митин и лият.
Лац мяляфтса, кода синь сашендсть ширезонк танкаснон максома 1943 кизонь октябрьста. Вирьса, коса эряме и анокламе од бойхненди, ульсь митинг. Корхтась полконь командирсь гвардиянь подполковниксь Говрилюк, политчастень коряс заместителец майорсь Попов, писательсь Корнейчук, академиксь Минц и кие - бди таткисттнень эзда.
Сембе корхтасть, конешна, фашисттнень каршес сиземань апак содак, эряфонь апак ужяльтть тюремать, Сяськомань шить сяда курок малатфтоманц колга. Эста ня мяльхне эрясь советскяй эрь солдатть, эрь офицерть, генералть, эрь ломанть седиса и ёньца. Тяконь лангс азомс, эста минь содаськ ни, конашкава тарвафтфтольхть гитлеровецне Сталинградса и Курскяйть ала.
Фоторафиясь, кона печатлаф «Советскяй Россияса» лятфтазень и Кубинкать ала вирть, и Павел Беляевонь, и экипажень ялганзон, и Алексей Николаевичень, и митингть, кона лемтьфоль полконьконди танкань максомати. Снимкась вачкотьфоль тоса, митингса. А «Т-34 «танкась …. лувихне, улема, шарьхкодсть ни - Алексей Толстойннель. «Хождение по мукам» романонц инкса тейнза максф Государственнай премиять Толстой авозлазе танканди и лемдезе сонь «Грознайкс». Тияк азомс, тя лемть, кода и Корнейчуконь танканц лемонц - «За Раданську Украину!» - и лядыхнень танкаснон башняс лепнень савсть сермадомс мондине, - кошардомань полконь командирть политчастень коряс заместителец майорсь Попов, сяс мес полксонк художник ашель, а мон нолянь кой стенгазетат, кой «боевой листокт» и аф ламода маштонь рисовандама.
Врагсь нинге вииель и розарязень ся райоттнень, конат нинге кядялонзотольхть. Эста, 1943 кизонь октябрьста, васенцеда кулине Корнейчуконь кургста, кода фашисттне салсезь, да, да, салсезь Украинань черноземть. Тракторса, бульдозерса - мезьса крксезь модать вярдень кувонц, грузсезь ся равжа модать эшелонц и прважсезь эсь Германиязост. А тоса ни почерязь паксяснон лангс. Мзярдовок, фкявок войнаса тяфта ашесть тиенде. Маряк, гитлеровецне арьсесть: советскяй модать лангса куватьс аф кирдевихть, сянкса хоть мзяронц-аф мзяронц эряви ворьфтемс эсь ширезост, бта минь тоза аф пачкоттяма. А минь сявоме да пачкодеме! Пачкодеме эсь пильгоньконь лангса. Эсь танканьконь, эсь самолетоньконь лангса, пачкодеме мянь Берлину!..
...Куватьс якаме Берлинть ульцянзон эзга, ванондоськ - коса мезе ульсь. Вов имперскяй канцеляриясь, вов гестапось, вов Брандербургскяй ортатне - эздост ушеды Унтер дер Линден ульцясь.
…1945 кизонь 9-це Майсь - сембода мяляфтови ши.
Фотографияса: Алексей Толстой «Грознай» танкать экипаженц мархта. Кереж ширеса - Людмила Ильинична, писательть авац
Материалть аноклазе Наталия ЮФКИНА