Родной вели - кись кели
Эряви аф аньцек аралакшнемс цебярть, но и виияфнемс. Тянь колга корхтавсь комсь колмоце районнай изданиятнень фестивальса.
Официальнай мероприятиять частец етась Тенгушевскяй Дворец культураса. Тяса главнай редакторхне, кореспонденттне и почетнай инжихне кульсть поздравленият Теньгушевскяй райононь оцюнять Ольга Куткинань эзда. «Тинь покодемантень коряс Мордовиянь эряйхне содасазь, кода минь эрятама и мезе ёратама, лия региоттне няйсазь, кода эряй глубинкась, - мярьгсь Альбина Симакина, Респубика Мордовиянь информационнай политикань управлениянь начальниксь, - Стаки ванфтость эсь изданиясонтт лямботь и паронь арьсемать».
Залса ульсь полиграфистсь Алексей Скорцов, сонь покодемац сембе редакциятнень пяк мялезост. Союз жуналистонь председательсь Владимир Назаров мярьгсь, што профессиональнай конкурснень коряс Теньгушевскяй районнай газетась сембода цебярьхнень лувксса. Сянкса главнай редакторти Юлия Сазанованди макссть Мордовиянь Правительствать эзда грамота.
Рузаевкань, Ардатовань редакторхне: Людмила Резяпкина, Юлия Черенкова азондозь работань опытснон президентскяй гранттнень колга, Атяшевань редакторсь Раиса Кузнецова альтернативнай газетань тяштьфтомань опытонц.
Тяса сембе няйсть рузонь илань костюм «Сряда»: пархци паля, инголькс кядьса кодаф кружевань мархта, стирень пряфкс - шелковай руцяста сюролда мархта тиф лента, авань пряфкс - сорока. Рузонь культурась тяса сотф эрзяннеть мархта. Авань и стирень рузонь пряфксненди путневихть акша тюсса покаряв мазоптомбяльхть. Тяфтама костюмса библиотекарть Анна Лёвина валонзон коряс, тядяц якась свадьбас. Тяни тяфта наряжакшнихть аньцек местнай артисттне.
Библиотекань музейнай уженяса аф фкя лаца тюсонь сюреса серматфт скатертть, нардамат. Тяса улихть краскаса ватьф нардамат и вадемка - шуфтонь матрица. Келуста тиф сифтепть, шуфтонь медень боцькеня.
Пяк арась журналисттнень мяльс якамась Шокша велети. Тяса ванфтсазь диалектнай культурать. Фольклорть ванома сашендыхнень вельде салава петеви сисемпрестолонь Михайло-Архангельскяй церькавсь, конань эса улихть колма пяк сире пингонь шкайнят, конатнень эса Спасительсь, Михаил Архангелсь и Богородицась. Церькавть ваксса калма лангса вете метрань серьса равжа тумонь крёст. Церькавонь азорть валонзон коряс, кинь сяда оцю горясь, путнесть сяда оцю крес.
Шокша велень Культурань Кудса сембе няйсть народнай костюмса дефиле. Ёмла пееди стирнясь аватнень и од стирьхнень и церанять мархта весяласта якась сценава народнай костюмса. Аватне наряжафтольхть сире пингонь шокшень костюмса. Сери «Соркаснон» эса М буквась путни тяштькс - матриархат. Шокшень костюмонь стай авась азондсь, што бабац каннесь тага тяфтама пряфкс: инголи латцеф сёралонзон ланга сотнекшнесь панчфу руця, пензон изезень кяшенде, а лихнезень бантокс.
Инжихнень тяса каванязь тюжя, танцтиста шиньфтай, удалафста кепотьф пачаса, сырса. Сырхт казань кофцонь эзда тиихть тяса оцю ошста саф предпринимательхть, конат эсь «Мардарика» продукцияснон мишендьсазь интернетса. Авась работась журналистокс, тефи статуэткать азороц сась велень эряфть варжама и покодема.
Инжихнень уйфнезь шуфтонь плотса Мокша ляйть эзга, няфтезь мокшень крайть мазышинц. Тенгушевскяй эряхнень эсь кядьса тиф вещаснон: варягат, вяшкондемат, Василий Блаженнай церькавть лаца тиф шкатулкат, матрешкат можна рамамс марнек мирть келес (вайлберисть вельде). Россиянь символти - рузонь матрешкати Тенгушеваса арьсихть путомс памятник. Тяфта тяса касфнихть велень туризма.
Омбоце частец мероприятиять ётась кафеса, коса каванясть эсонк кудонь лаца танцтиста пидеф ярхцамбяльса. Вятезе мероприятиять «Известия Мордовии» газетать корреспондентоц Олег Корчиганов. Кельговикс ведущайсь морсесь седиень токай морот и ётафтсь творческяй конкурст.
Васедемась макссь эрьгя и вий од тевоньди. И тага весть няфтезе, што ингольдень журналистт аш. Мондеень, кода од специалистонди, пяк мялезон тусь оцю опытонь мархта коллективть эса, коса профессионалхне най анокт максомс тевонь содай советт.
ТЕНЬГУШЕВСКЯЙ МАСТОРТЬ ЛАНГСА
Теньгушевскяй масторсь панжезень кенкшензон седикс-ваймокс учф инжиензонды. Преданиять коряс Теньгушевась оснаваф масторса, кона ульсь казьф Тингуш мордвинти, кона вирьхнень пачк етафтозень Иван Грознаень войсканзон Казань ошть сявомста.
Историческяй посольскяй кить лангса тяса ащи Вечкедеевась, велень калма лангсонза озондомань емла куднять кафта сятт кизонза. Такушевать вастса кунардонь пингста ульсь мордовскяй веле, кона ащесь Тамбовскяй губериянь Темниковскяй уездонь омбоце стантть составса. Сире Кочеевкаса революцияда инголе работась винокуреннай завод и ковровай фабрика. Районца ули кулси-юмай веле Сакаевскяй Майдан, тяса добувакшнесть уголь, а аф ичкозе, Полховскяй Майданца (тяни Вознесенскяй районц) анилиновай краскаса эряйхне мазопнезь самай васенце рузонь матрешкатнень. Дачнайса шачсь российскяй ученайсь Е. Н. Каблов и Российскяй флотонь контрадмиралсь В. М. Федорин, Барашеваса - ниленькрда чемпионсь Алексей Немов. Стандроваса Федеральнай значениянь архитектурнай памятник - храм Покрова Божией Матери. Кураевать эряенза 1944-це кизоня кочкасть ярмак танканди.
Тячи райцентраса можно няемс сельскяй советть, коста 1941-це кизоня шачем краень аралайхнень сявондезь фронту и тяниень пингонь мемориал Великай Отечественнай войнань геройхненди, сюкпря конатненди тячи тяса, кода и лия вастса минь сембода мазы краеньконь эса кашт аф моли эряф. Теньгушевати особай колорит максыхть купеческяй куттне, фкять эса покоди районнай газетать «Примокшанье» редакциясь.
Фотографияса: сиретнень тевсна ванфтомат отненди
Наталия ЮФКИНА