Кодаптольхть мокшэрзятнень койсна
Историянь лопанят.
Кународонь илатне, койхне, обряттне - национальнай културань ся нежесь, конань лангса и кирди этническяй эсь лацонь ширесь.
Мокшэрзянь наротть тундань и кизонь коенза-иладонза лама, сембе мяляфтовихть, пяк эсь лацоннет. Ня илатнень вельде азонкшневсь вов мезсь. Календарнай сембе обряттне сотфт тефнень, трудть мархта. Крестьянинць веконьберьф покодсь, а тундань, кизонь пингонди сашендовсь сембода лама тевда. Аф стак вдь корхнихть, тундань шись киза анды. Тя ульсь эрьгянь пуроптома пинге, оцю тевонди анокламань пинге. Тунда соксеви модась, витцевихть видьмотне, вятевихть сембе паксянь тефне. Кода общинась покоди тунда, стане кармай эряма кизоньберьф.
Вов мес велеряйхне тунда нинге сяда пяк ванцть сянь мельге, мезе тиендеви перьфпяльса, природаса, кода латцеви кизось. Велень ломанть сембе эряфоц сотф модать, перьфпяльть мархта. Вов мес сон старандась и иланзон - коензон вельдевок анамс сяда лама сера, лама тиша. Штоба аф ётамс тялонь пингти шавонь кятть. Сяс и эняльдсь, озондсь вярдень вийхненди лездомс сембе тевса.
Тундань и кизонь койхнень-илатнень, обряттнень эса лац няевихть кафта пластт: кунардоннесь, языческяйсь, и кстиндамда мельденнесь. Кунардонь озксне эрясть пяк ламос, синь етафневсть мянь ХХ векть самс. Синь инголи ётафневсть лия пинкнень, но мокшэрзятнень кстиндамстост меле сяда маласькофтовсть христианскяй праздникне.
Тундань илатне, койхне ушеткшневсть лямбонь тердемаста. Пицесть шапаксонь нармоннят, жаворонкат, куцендсть лата пряв и тернесть тундать, лямботь эса.
Вернаень шиня оттне якасть кудста кудс, удыхнень стяфнезь вирняень тараткаса. Вирняйсь, няк, пяк рана панжи, эреклай, тараткаса эрьхнезь касфнезь ломантьке виенц, эрьганц. Обрядонь ётафнихне морсесть:
О, удода, удода
Тяда пеле стямантень
Вирняйняса эрьхттядязь,
Эрьгавшинтень касфтсаськ минь!
Илань ётафтыхне токсесть эрь кудти, меле тушендсть ляй трвав. Тоса морсесть морот, юватькшнесть Вармавати, анцесть лямбе варманя, мани, лямбе шинят.
Вармавать лемс ётафнесть озкс. Путнесть эрь кодама ярхцамбяльхть. Башка шаваняса - калонь шонгарям. Тяза жа путнесть пярякат, акша почфонь калацят. Каванякшнезь ляй трвав сафнень. Шять, тя койсь сотфоль кунардонь ся койть мархта, мзярда озонкшнесть Акша калти. Эняльдсть, штоба калонь кунцихненди повондоль сяда лама калда.
Лама илада, кунардонь пингонь койда ётафневсь Очижи еткть. Эрзятне Очижить лемнесазь Инечикс. Тя фкя инь оцю христианскяй праздниксь. Ломаттненди аф мярьгондеви покодемс, тя шиня работамась лувондови пежекс, грехокс.
Мокшэрзятне Очижи ёткть кунцезь кулофнень, тонашистотнень лемснон. Озондсть, штоба атянь атятне кучельхть сембонди пара шумбраши, штоба шачель серось, штоба афольхть ураткшне жувататне. Семьянь келеса якасть калмолангс. Тоза сявондсть мархтост ярхцамбяль. Тернезь кулоф раднятнень «баняса штама», «ярхцама». Очижинь карша ёткшиня кинь-кинь раднятнень пяле путнесть атянь пуре. Медть атянь пурень тиемс рамсезь раднянь келеса. Кафта шра лангс кочксесть ярхцамбяль. Шкай ужети путнезь атянь атянь лемс. Сяда мрга шири - кулоф бабаднень лемс. Крьвяснезь атянь штатолть. Эрь родсь - плямась ванфтозе эсь атянь штатолонц. Атянь штатолть ваксс путнесть нинге атянь вазь. Тоза кайсесть ярмакт, путнесть алхт. Эняльдсь Очижити, эняльдст кулоф раднятненди, штоба синь арьсельхт пара. Озондсть фкя кудса, меле ётнезь родонь - плямань лия куттненьге. Од рьвянятне сотнекшнесть атянь штатолть видес казненди руцянят, нардамат. Тяфта петнезь тонашистотнень мяльснон.
Полатксоц моли
Фотографияса: мокшэрзянь «Пиземонь анама койсь». Вирь Келгуж. Фотографиясь редакциять архивста
Наталия ЮФКИНА