Темниковские известия

Панчфкянь пусма

Темниковскяй идень садсь «Атякшкясь» - тя опытнай муниципальнай площадкась «Виияма ваймонь нравственнай и патриотическяй трямань-касфтомань иттнень школада инголень пингень» проектонь эряфс етафтома. Фкя составляющайсь тя проектть эса - тя покодемань программась «Минь эрятама Мордовияса», конань эса содафттама садонь иттнень мордовскяй национальнай культурать историянц, искусстванц, обуцянзон и коензон мархта.

Тя программать рамкаса средняй группань «Кстыня» воспитательхне Т. Ю. Февралева и А. В. Кижапкина нагляднайста няфтезь иттненди мордовскяй орнаментть, кона серматф матрешкатнень лангса и пяк мазы мордовскяй национальнай костюмть. Ромба сермать сембода оцю значенияц, серматфнень еткса - тя кичкор-мячкор ведь, озяра, ляй, а кафксапень тяштсь - ши.

Стилизованнай мокшень и эрзянь костюпнень иттне эсь лангозост щакшнезь пара мяльса. Тага ниле кизонь иттне тонафнезь мокшень народнай мороть «Луганяса келунясь». Воспитательхне азондозь мороть историянц, што тя мороса азондови мазыста наряжаф стирнять колга, кона ащесь келунять ала. Морось шачсь пяк кунара. Сонь морсезь аф фкя лацонь мяльса покодемста и ваймамста. Васенце пингста стирьхне и аватне кочксевсть фкя кудс, коса кштирдсть, мазыста серматкшнесть котфт и морсесть кувака морот.

Емла стирнятне кайгиста и весяласта моразь мороть «Луганяса Келуня», и няфтезь мордовскяй кштимать основной музыкально-ритмическяй шаштоманзон. Ляди группань иднятне теест вииста цяпасть. Занятиясь пяк тусь иттнень мяльс.

Еще материалы

Комментарии