Кафта браттне - геройхне
Гразязь цярахманкс сась войнась.Тядясь прважазень кафта церанзон Василиень и Александоронь. Церац Аким и стирнянза Валя, Катя лацьть мархтонза. Седись пяшксе пичефкста, сельмоведенза кеворихть. Мезевок аф тият. Аралаенза прважамат.
Повсть фронту, кучсесть тоста сермат. Тядясна из машта лувома. Сайхть шабратне, лувсазь, марса авардихть. Тядясь ризфти коськсь тишенякс: оцюфне воявайхть, емлатнень аш мейда андомс. Печфкя кады вандыти, анасась тячи.
Александоронь шкайсь кандозе куду. Медальса сась Барашевав, аванцты. Даря няезе мирденц фкя пильгоняса, мяргат мирденц эзда сярятьфсь сусксь соньге седиенцты. Ушедсь лятнязь авардема. Салава този пчкясь мирдец, якась протезса. Шачсть ниле иднясна.
Тундань лямбонясь кандсь оцюдонга оцю паваз, Победа! Орденца и медальса сась Василий, мусь мака панчф стирь, рьвяясь. Шачсть вете шабасна. Работась милицияса, тоса пожарнай частьса. Командасна якась республиканскяй соревнованияс, ламоксть лисендсть сяськикс. Тушендсть тоста казнет. Весть тусть гармония. Маштсь и валенцянь валяндама. Бабанятне тянимс Анна стиренц няйсазь, пара валса алянц лятфтасазь. Валенцянза валяндафт пяк лац.Тянимс каннесазь, пяк ляпонят и лямбонят.
Кафта браттне пяк кельгозь шачема крайснон, семияснон. Кулость мельцек, 1989 кизоня. Василиень ульсь 65 кизоц. Кота унокста кенерьсь няемс аньцек колмотнень.
Тя фотокарточкаса: А. Н. Захаркин, В. Н. Захаркин
Натали ИВОЛГИНАСЬ