Сон фкесь сетнень эзда, кона изь са войнаста
Сась войнась... Кандсь аф кандови канфт, ризфт, тошнат.
Оце Максимсь рьванц мархта ильхтезь ниле цераснон, надиямшиснон. Федор церась тумста палазе ортать... Пелагеень седиец тупстадсь. Сельмонза исть коськонде шамань пиди сельмоветьста.
Синь иднясна вейхксоняль. Тага ульсть церашабанят. «Спасиба шкайти, хоть тят емланят» - думандась тядясь. Ризфть эзда седиец неволи, а тевонза тиемат: жувататне урядамат, пидема-панема. Фкя кусоконяса вете пеконят андома, фкя лоскотть эзда вете панархт стама.
Мирдец сась финскяй войнать эзда, работась колхозса председателькс. Ванондозень сембе колхозонь тефнень, фронту сембось касоза, ильхтевоза.
Сась кудозост ризфсь...
Маря стирнясна ласьксь: «Тядяй, почтальонць сай». Пелагея лиссь вальмалу васьфтемонза. Сявозе пяшксе оржа салмокста сермать. Тоса похоронка... Церашабась Федор куду аф пачкоди. Шавовсь. Калмаф брадонь-салдаконь калмоса Смоленскяй облостьса, Усты велеса.
Тядясь ушедсь явсема «Цераняй, матаняй. Менди минь шавомс максодязь инекуйхненди?» Прась. Церашабатне ласьксть аляснон меле. Максим сась эряскодозь. Кельгома аванц петезе мокша руцянянц. Вятезе куду. Кода идня ванезе. Аннезе куцюняста.
Шачсь кемонце иднясна, монь тядязе Татя. Мазы пеконардафкскясь ульсь сембода кельгома иднясна. Азонкшнесь теень ся пингть колга.
- Тядяньке тии лапшанят, пуцыне коськома. Шары куд еткова - пялесна ашет. «Иднят, косот лапшанятне?» А синь ни ваче пеканясонк. Ваттама лангозонза мазыняста, ав и торасамазь. А путсыне пидемс, сяда лама ведня каяй. Ламонектама. Ярхцатама, паморькс аф прафтозь. Тейнек, Миша браткязень мархта, кржа повондсь, пока рахсетяма, пялеснон порьсазь.
Ушетф тевсь пачфтевсь педа пес. Калафтовсь фашисттнень карязсна. Сась оцюдонга оцю Победа!
Састь фронцта церасна. Касфтовсть лади иднясна. Шкайсь макссь теест разопт, пара кит и кельгама ломатть.
Тяни кемонтть эзда лаць аньцек Маряканеке. Тядянязе аш почти кафта кизот. Тройцяста мольхтяма вели. Сюконятама теест. Минь козятама, сяс мес ламонектама. Ладясаськ кошяльнекань-занясаськ марнек Колапонать.
Давайте мяляфтсаськ, кодама стакадонга стакаль пингсь. Ся пингонь ломаттне кирдезь кельмодонга кельмотнень, псидонга пситнень, касфтозь сиротатнень, строязь шкайда аф пели фашисттнень кядьста плхтаф-ювотф кудтнень, кандсть копорьсост тейнек цебярдонга цебярь эряф. Арьсетяма шумбраши шис латьфненди. Путтама свецянят кулофнень инкса.
Натали ИВОЛГИНАСЬ