«Мокшень морось - тя монь ваймозе»
Захар Федорович Дорофеев мокшэрзятнень эзда васенце поэтсь. Сон сувась мокшэрзянь письменнай литературать ушедыензон ёткс.
З. Ф. Дорофеев шачсь 1890 кизоня Торбеевскяй райононь Салазьгорь велеса. Синь оцюволь семьясна, ульсь мянь кемнилие ломань. Покодема Захарнясь кармась, кода эста и сембе мокшень шабатне, ёмланястокиге.
Сисем кизоса сон якаль ни алашань ванома, сяльде сонь тонафтозь инзама, сокама, тишень и сёронь лядема. Сон сембода пяк кельгозень моротнень, морамать, моронь и баснянь кулхцондомать и азондомать. Сон оцюволь ни, работась Москуса, но эсь ялганзонды сидеста корхнесь: «Мокшень морось - тя монь ваймозе».
1922-1929 кизотнень сёрмадсь вете мокшень книгат: «Валда ян» букварь, «Од веле» морафтома книга, «СССР-сь» комплекснай книга нилеце класса тонафнеманди, «Пиже пакся» букварь оцюфненди. Сон васенцесь сувафтозень учебникненди письменнай литературань произведениятнень. Букварьса и морафтомань книгаса печатлафтольхть сонцень стихонза.
Лама вий и эрьгя путсь Захар Фёдорович Дорофеев Мордовияса национальнай автономиять тиемста. Сонь вельденза виияфневсь и эреклафневсь Мордовияса, Пензаса и лама лия вастова, коса эрясть и эряйхть мокшетне и эрзятне, национальнай школань и училищань панжемась, национальнай культурати сяда оцю мялень шарфтомась.
З. Ф. Дорофеев ётафтозень мокшень кяльс рузонь классикнень произведенияснон: А. С. Пушкинонь, Н. А. Некрасовонь, А. В. Кольцовонь, И. С. Никитинонь, Ф. И. Тютчевонь, а тафта жа лама лия советскяй поэтонь произведения.
1914 кизоня кода вишке урма върьгятсь народть лангс империлистическяй войнась. Сявозь и Дорофеевоньге. Сон фронтсовок ашезь лоткафне сёрмадоманц. Сёрмадсь тяфтама стихотвореният, кода: «На войну», «Война», «Беженцы», «Ночь в лагере», конатнень эса сялдсы массовай тюремать.
1916 кизоня пяк стакаста ранендазь. Ламос госпитальса ащемда меле 1917 кизоня армияста нолдазь куду. Сон мърдась Ардашевав тага учителькс. Но работамс тяса ламос ашезь сав. Дорофеевонь ётафтозь покодема Темникову. Тоса сонь сатозе Великай Октябрьскяй революциясь. Меле сон кочкафоль Темниковскяй уездонь народнай образованиянь отделонь заведующайкс.
Натали ИВОЛГИНАСЬ