Тевонь кельги улят-пара вал кулят
Етась васенце этапоц респубиканскяй конкурсть, тиф сизьгемонь ветие войнать сеськома шис. Сембода цебярь тонафты мокшень келень учителень 2020 кизоти. Конкурсса участвовондасть кемготува учитель кеветие республикань районцта и городской округонь Саранск ошста. Темниковскяй муниципальнай районцта участвовандась Темникав ошень школаста, кона лемтьф Советскяй Союзонь Геройть Семиков А. И. лемса, мокшень кялень учительсь Мария Петровна Уткинась.
Васенце этапса сон лиссь сембода цебярь вете учительхнень еткс. Мария Петровна покоди Темникав ошень школаса кемонь кизот. Колмогемонь киза покодсь Вирь Ордажень школаса, кемзисемгясь эздост директоркс. Темникав ошу сась велень школать селгомда меле. Но эсь шачема вастонц тяшкава кельгсы, изь ту ошу, а лядсь эряма веленязонза. Эрь шиня сашенды покодема Темникав ошень школати.
Сон тонафтсыне шабатнень ванфтомс атянь-атяньконь кяльснон, мокшень костюмть. Конкурсть омбоце этапонцты тись презентация - монь родной краезе, районозе, республиказе, профессиональнай деятельностезе. «Шабатне - монь седиезе, мон аф няйса синьфтомост эряфть» - корхтай Мария Петровна.
Мария Петровнань вайгялец горняй шудерькскакс, эрь валнять путозь путсы седиезот. Тяфта азонды ефкст, легендат, азкст, преданият. Шабатнень тонафтсыне мокшень стихонь азондома, моронь морама, обуцятнень-койхнень ванфтома. Конкурсса аноклась мастер-класс, видеоурок. Марса шабатне мархта тисть перевод, мокшень кяльс етафтозь «Катюша» мороть. Уроксь етафтфоль ветеце класса. Шабанзон еткса улихть мокшет, руст, татарт и украинецт.
Учениконза аф аньцек лац корхтахть мокшекс и азондыхть стихт, тага тиихть исследовательскяй работат, участвовандайхть олимпиадаса. Омбоце вастть тяддя республиканскяй мокшень кялень олимпиадаса занязе рузонь стирнясь Панкратова Ульяна. Сон тонафни колмоце класса. Школьнай ансамбльса «Атямъенга» мокшень морот морайхть рузонь и татаронь шабатне. Синьге аф весть занцезь васенце васттнень республиканскяй конкурснень эса.
Мария Петровна лама киза лезды Московскяй университетонь М. В. Ломоносовонь лемса филологическяй факультетонь экспедициять студенттненди. 2018 кизоня лиссь книгасна «Элементы мокшанского языка в типологичеком освещении», коса пячатлафт Мария Петровнань азксонза.
Тага сон седиень путозь лама киза морсесь мокшень «Марлюня» ансамбльса.
Арьсетяма Мария Петровнанди лисемс конкурсть эса сяськикс.
Натали ИВОЛГИНАСЬ