Кавксть чачозь
Василий Ашапинэнь войнась стардызе армиясо улемстэ.
Армияв саизь 1940 иестэ, зярдо топодекшнэсть тензэ 18 иеть. Колмо ковонь ютазь, ацамговонь 7-це чистэ 1941 иестэ сонзэ отправизь тонавтнеме Монголияв. Ды теке иень сексня понги Украинав, косо васень бойсэ варштасы ятонть каршо виензэ.
- Ульнесь ли пелема монь седейсэ? – корты Василий Егорович, - нама, ульнесь, но монень те эзь чарькодевеяк сестэ, секс, што ульнинь пек од. Прясон ульнесь истямо каша, мик нейгак ледстнян тень, прок стака он. Васенце ранявомстояк мик эзь чарькодеве, мезе истямось мартон лись.
1942 иень эйзюрковонь 8-це чистэ Ашапин ранязель пильгс. Цела ков аштесь больницясо. Те ульнесь «Смена» станциясо. Госпитальде мейле понги 345 стрелковой полкс минометчикекс, ды 1945 иес ацамковонь 6 чис теке полконть марто боевой сражениясоль.
- 1943 иестэ сундерьковсто минек подразделениясь лиссь Днепра леентень, занинек келей плацдарма. Но те изнямось сатотсь тенек а шождасто. Лангозонок секе тев ютасть ятонь танкат. А весть леенть трокс печкемстэ, монь цють эзимим сала чадыведесь. Сексень тарькс ведесь усксь эйсэнь алов, цють эзинь лепия, начкинь пачк. Читне ульнесть тарькс якшамот. Сюкпря ялган таргимизь, ды те начко одежасонть фашистэнь пушкань ды минометонь толонть пачк савсь ютамс седе тов, - ледстни фронтовикесь.
Василий Егорович ранязель кавксть. Васенцеде – пильгс, омбоцеде ранявсь Румыниясо. Солдатось кувать ульнесь Московонь №3950 госпитальсэ. Вить пря бокасонзо ранань кикстнэ нейгак содавить. Пичксесь пек кувать, серматкак кудов эзь кучневе. Велев аванзо туртов сась куломадо конев. Авазо кувать майсематнеде: жив церазо эли арась, максызе лемензэ церковас. Ялганзояк арсесть, што сон кулось.
Сась Изнямонь чись. А евтавомашка кеняркс кутмордызе масторлангонть. Прядовсь войнась!
Ятонть лангсо изнямодо кулянть Василий Егоровичэнь авазо вастызе васоло паксясо. Велесь лаказь лакась. Авась арсесь, што те чись эзь кандо пек покш кеняркс, ансяк ледстнемат Вася церадонзо ды сельведть, сельведть… Ды капшиль солдатонь авась свечань путомо церанзо ойменть кис. А сон кецявтызе аванзо эсь самосонзо 1947 иестэ Роштова порава.
Тень коряс вечки пейдькшнеме Василий Егорович: «Кавксть чачозян, секс кувать эрян».
Василий Егоровичнэнь 88 иеть. Весе неть иетнестэ сон эрясь Таразбуесэ, важодсь пастухокс. Эсь тевензэ топавтсь парсте.
Войнадо мейлень эрямонть лангс Василий Егорович а пеняци: урьвакстсь, трясь эйкакшт… Сыречинзэ ютавты церанзо кедьсэ.
Ансяк иетне саить эсест, ды ранатнеяк сеедьстэ марсевить. Шапканзо ветеранось, допрок, а кайси, ансяк чуросто… Изнямонь чистэ, войнасо чавозь ялганзо ледстнемга.
Т. Атласова,
8-це классонь тонавтниця.