Войнанть аволь авань чачозо
Мель ежо… Ломанесь бажи нардамс, ертомс превстэнзэ сеть стака ледстнематнень, конатне сексень векс – чоподат. Кода стувтомс сеть стака иетнень, зярдо мольсь Ине войнась? Кодаяк! Сынь одс ды одс кармавтыть арсеме, штобу истямо кажо аволь уле. Се шкань ломантне парсте содасызь, мезе истямо войнась. Войнась канды зыян весенень ды весементень. Сехте покш кажось – канды кулома. Неть стака иетнестэ весе раськень ломантне тюрсть ятонть каршо, теке вейке покш раське. Ине Отечественной войнась невтизе народонть кеме обуцянзо эсь геройтнень вельде, конатнеде аволь аламольть. Сынь ульнесть аволь ансяк тюремань паксятнесэ, но и васоло фронтонть эйстэ. Теть ульнесть сыре ломантне, тейтерьаватне, цераломантне, кинь лавшоль шумбрачись ды эйкакштнэ.
Монь тиринь велестэнь истя жо ламот ютасть войнань китнева-янтнэва, кудов эзть велявто, емасть кулявтомо, ламот неень шкас эзть цидярдо. Ульнесь шка, зярдо войнань участниктне сакшность школав инжекс ды евтнесть тенек, кода тюрсть ятонть каршо. Минь кунсолынек сынст евтнемаст ды эзинек чарькоде эйкакшонь превсэ, кода стака тенст тень весе ледстнемс одов. Ансяк шкань ютазь те весе чарькодеви. Ды нейгак, зярдо эряви сермадомс максозь теманть коряс сочинения, зярс арсемадо мейле ялатеке савсь кундамс те тевентень.
Кода аламо минь содатано вакссонок эриця ломантнеде! Саинь мель сермадомс Ключагина Агреппина Ивановнадо, куринкасо тензэ мерить Граня баба. Сон войнасо эзь ульне, но савсь тензэ аволь аламо печтямс стакачить, кода и весенень неть иетнестэ. Нама, а сеске молинь тензэ. Жаль марявсь тень: одов сави ледстнемс сеть войнань иетнень. Икеле, мон мекс-бути свал арсинь, Граня баба чачома-касома таркань коряс минек велень. Лисни овсе аволь истя. Сон Шейн-Майданонь рузонь велестэ ды уш ведьгемень колмо иеть эри Кулязбуесэ. Ломанесь сон кортакшов, тевень вечкиця, свал несак кудоютконь тевень теемстэ, куш тензэ аволь аламо иеть – кавксоньгемень ниле. Васенце кевкстеманть лангс кудораськензэ ланга евтнемастонть карминь содамо, што семияст покшоль – кевейкее ломаньстэ ульнесь: покштязо-сырькаезэ, тетязо-авазо ды сисем эйкакшост. Агреппина – котоцель. Тетязо, Кошин Иван Михайлович, ульнесь финнэнь войнасо, стакасто ранязель, Ине войнань ушодомс кулось.
Войнадо кулянть кандызе вельсоветэнь прявтось. Войнав саизь Агреппина Ивановнань кавто ялаксонзо: Яковонь ды Сашань. Сынь ютызь войнанть педе-пес, пачкодекшнесть Берлин видьс, ранязельть, казезельть зярыя медальсэ ды орденсэ. Зярс тюрсть ялаксонзо ды велень лия цераломантне, Агреппина важодсь колхозсо. Тонавтнеманть савсь кадомс. Ды се шкане тень лангс пек эзть ванояк. Эрявкшнось кастомс сюро фронтов, кодамс кавто сурс лембе варьгат, носкат. Паксятнень сокильть лишмесэ, букасо, косто-косто савкшнось ускомс эстесткак. Товзюронть нуйсть тарвазсо, пурнасть жнейканть мельга, сюлмсесть ды вачкасть пуллт, конатнень пивцеме усксесть утомс. Пивцэсть тельняяк. Весе сюронть кучсть фронтов, сынсь жо ярсасть марчонь, наксадо модамарень тикше марто човор кшиде. Агреппина Ивановна лия аватнень марто якась Сурск малав окопонь чувомо, важодсь Свердловск ошонь заводсо, косо анокстасть военной орудиятненень, машинатненень эрявикс детальть.
Ломантне цидярсть. Изнизь те кажонть. Кармасть велявтомо войнасто фронтовиктне. Агреппина Ивановна вадрясто прядсь Ромодановасо мекше мельга якицянь курсат, важодсь эсь колхозонь нешкепиресэ.Мекшень кудынетнеде ульнесть сядо сизьгемень, пурныль ламо медь.
Войнань шкане аволь весе паксятне соксевильть ды видневильть. Ламотне кадозельть, вельтявсть пакся тикшэсэ. Састь «Чапаев» лемсэ колхозонтень МТС-тэ тракторист. Сынст ютксо ульнесь Иван Прокофьевич Ключагин, Кулязбуень комськолмово иесэ од цера. Сон редизе рузаватнень ютксто эсь вечкевиксэнзэ ды саизе эстензэ никс, конань марто уцяскавсто эрясь ниленьгемень кавсто иеть, вейсэ трясть-кастасть ниле эйкакшт. 1989-це иестэ куломась нельгизе Иван Прокофьевичень малавиксэнзэ ютксто. Граня баба евтнесь мирдензэ лангаяк, зяро савсь тензэ неемс ятонть каршо тюремстэ ды концлагерьсэ улемстэ.
Шкась чии, чии, мейсэяк а лоткавтови. Эряви теемс весементь, штобу авольть уле неень шкань войнат. Ансяк теде арсесть Ине войнань участниктне!