Невтизь тиринь келенть мазычинзэ
Инжетнень паро валсо вастынзе директоронть поладыксэзэ Н.В.Бояркина. Надежда Васильевна ламо евтнесь школадонть, краеведческой музейденть, кода кезэрень пингестэ саезь покштяст-бабаст ванстасть ды сюпалгавтсть эрзянь койтнень.
- Миненек те таштазенть седе тов сюпалгавтома ды ванстома мельганок эрицятнень туртов, - мерсь эсь кортамосонзо Н.В.Бояркина.
Устававсть уроктне. Васенценть ютавтызе 6-це классонь тонавтницятнень марто Н.Н. Сайгушкина. Урокось алтазель П.У. Гайнинь «Чачома край» стихотворениянть коряс важодемантень. Петр Уварович Гайнинь ловныцятне содасызь кода стихотворениянь, сонетэнь, моронь, балладань, поэмань, музыкально-поэтической композициянь сермадыцякс. Фронтсо писателесь ульнесь военной корреспондентэкс. Петр Гайнинь поэзиязо ашти миненек прок келейстэ панжадо вальма, конань пачк васолов неявить тиринь масторонть валдо тюсонзо, конатнеде истя гайтевстэ морась поэтэсь.
Уроконть перть вешнематне ульнесть топавтозь: эйкакштне кармасть содамо поэтэнть эрямонь ды творчествань кинзэ, «Чачома край» стихотворениянть содержаниянзо ды идейной енксонзо.
Кемекстамонь уроконть «Лексика» разделэнть коряс 5-це классо ютавтызе Вера Николаевна Ситкина. Тонавтницятне евтнесть стихотвореният эрзянь келенть вечкемадо, содамоевкст ды валмеревкст. Оймамонь кис морасть С. Люлякинань моро «Эрзянь кель».
Седеяк пек весень мельс тусь поэзиянь часось «Тиринь мода седейшкава славан», конань ютавтызь 7-11 классонь тонавтницятне.
Топодить тежа иеть, кода эрзя-мокшонь народось вейсэндясь Россиянь народонть марто. Кемекстынзе ояксчинь сюлмотнень, пурнызе весе виензэ, штобу вейсэ изнямс масторонть лангс кайсевиця яттнэнь. Кедте кедьс кундазь рузонь народонть марто, эрзя-мокшонь важодиця ломантне ламо иень перть ветясть кеме тюрема самодержавно-крепостнической строенть ды феодально-деспотизманть каршо. Те ламо пингень ояксчись кемекстась крестьянской войнань классовой тюремасо, конань прявтсо ульнесть С. Разин ды Е. Пугачев.
Сабанцелень тонавтницятне мельспаросо евтнесть эрзя-мокшотнень символикадост ды тиринь веледест. Алтасть тензэ морояк, конань морызе Сайгушкин Витя.
Семинарось удалась: тонавтнемань, коень-кирдань алкуксонь кенярксов чикс. Нама, эрьва эрзянь келень тонавтыцясь сайсь Сабанцелень школасто сень, мезе лезды тензэ уроконь максомсто.