Вечкевикс тевезэ – важодемс эйкакш марто
Любовь Михайловна чачсь-кассь минек райононь Андреевка велесэ. Од тейтересь эзь кавтолдо, ков молемс седе тов тонавтнеме. Сонзэ седейсэ умок палсь вейке бажамо – улемс тонавтыцякс. Те мелесь Любань ветизе Н.П.Огарев лемсэ университетэнь филологической факультетэв.
- Тонавтыцясь – те истямо ломань, кона аволь ансяк максы содамочить эйкакштнэнень эли кемексты обуцясост паро енкстнэнь, сон свал ашти вакссост, тееви эрямост пельксэкс, кенярды ды мелявты мартост вейсэ, - корты Любовь Михайловна.
Отяжелень школасо эрзянь келенть тонавтнить весе 126 эйкакштне. Ды кода эно лиякс?! Ведь весе сынь эрзят. А кадови ялганзо эйстэ Саша Гусевдак. Ютасть уш вете иеть, кода церынесь эри Отяжелесэ, сон тетянзо-аванзо марто сась тей Узбекистансто, тетянзо тиринь велев. Саша аволь ансяк корты эрзякс, сон яки эрзянь келень ды литературань уроктнэсак, получи паро оценкат.
Школась Отяжбуесэ ловови вадрятнестэ вейкекс. А виде ули а ледстямс тесэнь художественной самодеятельностень артисттнэнь мазый тевесткак. Вейкеяк покшчи а ютни сынтемест. Сынь морсить аволь ансяк эсест школасо, яксить шабра велевгак. А весть лиснесть райцентрань культурань кудонь сцена лангс, гайтев вайгельсэст токшэсть седейть. Школанть мельспарозо – Килейне» ансамблясь, кона вейсэндинзе тиринь моронь ды киштемань вечкиця тейтерькатнень ды церынькатнень. Сынь весе ютко шкаст алтыть од моронь ды киштемань тонавтнемантень. Морось тенст лезды тонавтнемасо ды эрямосо.
Нолдави Отяжелень школасо «Лисьмапря» журналось. Сонзэ лопатнень пештить Любовь Михайловнань тонавтницянзо. Номердэ номерс эйсэнзэ свал лиснить од сермадыцятнень стихест, евтнемаст,евксост, артовксост. Ловномстост алкукс витеви ежот. Эйкакштнэ сермадыть «Чилисемавгак». Те – Катя Палькина, кона тедиде прядызе школанзо, Света Солдаткина, Оксана Канакова ды лият.
Те иесь канды Л.М. Русяеванень ламо важодема ды кенярдома. Аволь умок сынст школань эрзянь келень ды литературань кабинетэсь, косо Любовь Михайловна заведующей, республикань конкурссо занясь васенце тарка. Виде, кабинетэсь покш, валдо, ванькс. Сонзэ теемантень ютась 20 ламо тежа целковойть. Стенасо эрьва стэндэсь мездеяк ды евтни. Тесэ и национальной оршамопельтне, и эрзя-мокшонь ине сермадыцятне, и грамматикась…
Сеетьстэ Любовь Михайловна максы урокт эсензэ школань ды районнонь тонавтыцятненень. Те недлястонть сакшность сонзэ урокс мик Саранскойстэяк.
Любовь Михайловна снартни варштамс эсь виензэ оште вейке конкурссо «Учитель года – 2010».
Арсетяно, те пелькстамосонть тонавтыцясь лиси изницякс. Ней жо, Любовь Михайловна эрьва валске кенярдозь сови школав, вастови тонавтницянзо марто. «Мон вечкан важодеме эйкакш марто», - мельспаросо корты тонавтыцясь.