Ине Россиясо, эрзянь чипай ало
1000 иень вейсэндямонтень
Ине Россиясо, эрзянь чипай ало…
Чачома чись – кенярксов ды мизолксов чи, сонзэ тешксты аволь ансяк ломанесь, эрьва ошонть ды велиненть мик ули Чачома Чизэ.
Певтеме Россиянь келес сядонь сядот покш ды вишкине велинеть.
Ансяк вейкенть марто пингес сюлмазян кеме сюлмосо. Косо бу аволинь уле, оймем тердезь терди тей, капшазь капши чачома Кочкурвелес, покштянь-бабань масторс.
Кезэрень Кочкурвелентень колмосядто ламо иеть. Лемезэ – васенце эрицянзо Кочкур поштянть лемсэ. Чольнезь чольни каль юткова эряза Ломаткась-Ламадось, кода мерить те леентень сынсь велеэрицятне; эйзэнзэ, теке авань кеме мештес, капши каявомо вишка Шлавкаськак. Радай пандонть лавтовонзо копачазь тусто вирьсэ, пандо алга таргавсь мазый ды ояксчисэ эриця Верепесь. Агей виренть ризнэвтиця увтозо кайсети Нешке латко видьс, косо стамбаро кекши ведьбрянзо Лемтеме лисьмапрясь. Атякш лисьмась одс нолдызе чольнеманзо – мелень коське иеденть мейле окойники вельмесь, ды ней налксезь канды тантейдеяк тантей ведензэ Эрьке лисьмапрянтень…
Ютазь недлячистэ, Петров посттонть икеле Игриштя покшчистэнть, пуромсть Кочкурвелень келей стадиононтень тесэнь чачовт ды инжекс сазь эрзят – весень тердинзе кочкурвелень модась «Садо, садо моронь кужос» эрзянь моронь фольклорной праздникев. Дубенка енксонь лия велетнестэяк састь Кочкурвелень Чачома Чинзэ тешкстамо!
Мейсэ явови те кенярксчись лиятнеде? Вана мейсэ: сон ютавтовсь эрзятнень ды мокшотнень рузонь раськенть марто вейсэндямонтень 1000-иень анокстамонтень. Васенце кевкстематнень ютксо аштить истятнэ, кода ванстомс покштянь-бабань койтнень-кирдатнень, тиринь эрзянь келенть ваньксчинзэ, кезэрень оршамкатнень.
…Апак учо пуромозтнень кортамост сезинзе нармунень чоледема. Сценанть лангс лиссть ашосо оршазь тейтерькат, кутьмерьсэст понгавтозельть «селминеть», сынь уставизь «Чанстямонь» кантатнень – илязо велявто Пазось эйстэнек те чинть ютавтомсто, кецневель мартонок.
Мейле коштось мерсь зуй Покровской церьковань баягатнень чавомадо.
Эрзянь мазый оршамкасо Кочкурвелень авань ансамблясь поладызе покшчив тердеманть «Адядо, ялгат» моросонть.
Слушкина Л.И. – Кочкурвелень прявтось - евтась седейшкавань лембе валт весе пуромозтненень, тешкстынзе истят мероприятиятнень эрявиксчист ды питнест, видькстась: ламо паро ломанть эрить Кочкурвелесэ, тевень вечкицят. Улить содавиксткак, кинь лемтне марсевить аволь ансяк тиринь райононь келес – республикань томбалеяк. Теде башка, Кочкурвелестэ лиссть – Е.В. Скобелев ученоесь, С.И. Дергачев народной учителесь, Г. Самаркина артисткась, Юра ды Витя Дыринтнэ художниктне. Улить сышкань ученойтькак, неть Н.Чинаева ды П.Кочетков аспирантнэ.
Эряви прамс Слушкина Л.И. марто ве мельс: кие лангсо ашти велесь? Тевень вечкицятнень. Кинь кардазост пешксеть ракшадо, паксяст видезь тикшеде ды сюродо. Теде парсте евтнесть ваныцятненень седикелень велень содавикс прявтнэ-кирдийтне – Бурлаков П.И., Зинкин А. П.(снимкасот) ды Слушкин М.В.
П.И. Бурлаков ледстнесь сеть шкатнеде, зярдо весе вийсэ «лексесь» минек колхозось, ферматне пешксельть скалдо, ды паксятне весе видезельть, тосо эзь касо идемтикше… Сон арсесь велеэрицятненень шубрачи ды паро мельть.
Те мероприятиясонть эзь ютаво се фактоськак, кодамо стака тешкс кадсь веленек лангс Ине Отечественной войнась. Советской солдатонть-ушманонть подвигезэ - ине тевезэ свал эри Россиянь весе раськетнень мельсэ. Нейгак минек од цератне анокстыть пряст Тиринь модань ванстома тевентень. Тедеде армияв туить кавто од церат, мелят ульнесть колмо, конат уш курок велявтыть мекев кудов.Туицятненень икелепельксэнь служамонтень паро мельть-арсемат евтась КГБ-нь подполковникесь Наумкин Н.П. ды казсь тенст мельследстнемань казнеть.
Кезэрень шкасто саезь Троицянь ды Игриштянь чистэ мазый вайгель аватне морсезь ютыльть велеванть, сынтемест а сыргавтовиль вейкеяк кенярксчи ды фольклорной праздник. Нейгак сынь яла мукшныть шка пуромомс вейс ды гай вайгельсэ морсемс кезэрень морот, эли свадьбань морсевтемкат. Течияк сынь тесэльть ды казсть кунсолыцятненень седейвитькс.
А юты велень покш чи А.В. Седовонь горниповонь кондямо морамовтомояк. Вайгелезэ цековокс гайгсь весе кужонть келес.
Ялатеке вишка артисттнэде, конат «эрить» «Чипайне» эйкакшонь кужосо, седе мазыйть ды ероковт арасельть! Лангозост ванозь пешкедят мельспародо – евксонь паксясо евксонь цецят, аволь эйкакшт!
Аволь ансяк минек велень эрицятне кецнесть Кочкурвеленть чачома чизэнзэ – лия велестэяк сакшность поздоровонь евтамо. Казнекс морасть морот, киштсть. Шабра Ломаты велень кавто аватне эсест раськень оршамопельсэ гайгстасть кунсолыцятненень-ваныцятненень татаронь мазый Моро (снимкасот). А стяко ламо иень перть мартост эрить кочкурвелень эрицятне ояксчисэ.
Борисов Н.М. – Дубенкань райононь Кочкурвелень ды Ломатынь округонть коряс депутатонь советэнь депутатось евтась велеэрицятненень лембе валт ды казсь Атемасова В.А. – кото эйкакшонь авантень ды Костригина С.И., сон ськамонзо три кавто эйкакшт (снимкасот), питней казнеть.
Велень келес гайгсть тиринь эрзянь келесь, гайгиця вайгельтне витсть ежо, лисьмапрянь ведекс пургсевсь кенярксось, чиськак манеель, мерят, пельтне састь мельс аламнес срадомс – кадык кецнить эрзятне ды витить седеест – течи Игриштя, течи – Кочкурвеленть чачома чизэ, течи – Недлячи-Воскресения.
Мазыйдеяк мазыельть, сюпавдояк сюпавольть ероков кедьсэ ды мазычинь чарькодиця-редиця сельмсэ анокстазь выставкатне: вишка эйкакштнень артовксост ды кедьтеевксэст, чувтосто керсезь мазый кедьенкстнэ ды инечинь алнэтне, чакштне, викшневкстнэ-кодавкстнэ ды пидемкатне-ярсамкатне – алкуксонь «шедеврат»!
Тесэ Кочкурвеленть историязо-эрямокизэ аволь ансяк валсо евтазель – кедьенкссояк невтезель, мезде кортасть фотографиянь мазыйстэ ды превейстэ теезь стендтнэяк.
Слушкина Л.И. казинзе грамотасо мероприятиянь ютавтыцятнень-анокстыцятнень, евтась седейшкавань сюкпря спонсортнэнень-лездыцятненень – Н.М. Борисовнень –Дубенкань райононь Кочкурвелень ды Ломатынь округонть коряс депутатонь советэнь депутатонтень, Д.М. Борисовнень – КФХ «Борисов» директоронтень, ОАО «Атяшевский» оеньзаводонь прявтонтень А.В. Шемеровнень, А.П. Зинкиннэнь – Кочкурвелень седикелень прявтонтень, Дырин К.В., Кондрашкин А.П., Афонькин М.Я. – индивидуальной предпринимательтненень, Афонькин В.Н. – КФХ -нь прявтонтень.
Сы иестэ те фольклорной покшчись карми ютавтовомо Кенде велесэ. Те веленть прявтонтень максозельгак седе тов Слушкина Л.И. пельде «эрзянь фольклоронь чинь» эстафетась (снимкасо).
Меельцекс евтынзе паронь арсемань валонзо «Покрова Божьей матери» Церьковань настоятелесь Отец Василий протоиереесь, конань чанстямонзо-баславамонзо ало ютавтовстькак весе анокстамотне.
…Кочкур веленть Чачома Чизэ тешкставсь… Тукшность инжетне, срадсть велеэрицятне. Кудов сынь ловсонень ды лапшерникнень церепка-кринка марто. Теде башка тень теезель мельспаронь казнеяк – Чкалова велень М.И. Наумкина эрзянь авась стихень ловномам кисэ казсь тень вишка карть – алкуксонь, эйстэст мольсь ленгень тантей чине, теке кезэрень пингстэ качадозевсь покштятнень-бабатнень пельде «сюкпрянь евтамо»…
Сынь кудов ды пештия кринкам ловсодо, кортыть, истямо кедьгесэ сон кувать а режни ды танстезэяк седе кепети. Кеман кортыцятненень, покштятне-бабатне ульнесть ламос чарькодицят, «ванькс» эрямонь ветицят, секс, улема, кувать эрястькак, эйкакшосткак шумбральть.
Ине Россиясо, валдо теште ало,
Косо лембе чипай налонь пуре валы.
Косо свал витеви седеем ды мелем –
Покштянь-бабань мода, тиринь Кочкурвелем.
Тесэнь лисьмапрятне – симат, а пешкедят…
Тесэнь коштось – лексят, лексевлить, прок медень.
Эрьва ломань марто э р з я к с гайги келем –
Покштянь-бабань мода, тиринь Кочкурвелем.
Вельмест паксят одов, чачот од эрицят,
Кадык Пазось тонеть ули анелицякс.
Уличисэ тенек, шумбрачисэ эрямс,
Покштянь-бабань мастор, тиринь Кочкурвелем.
Гайгить баягатне, кунсолодо кода:
Сорксты эрьва оймесь, сорксты сизезь модась…
Озкс кузи менелев «Пингес тонеть эрямс!
Покштянь-бабань мастор, тиринь Кочкурвелем».
Сы иес, «эрзянь моронь кужо», Кенде велесэ вастовттано.
Л. ДЕРГАЧЕВА.