Эрзянь авась машты урнеме ды содасы Шекспирэнь
Мезеськак а лисни, а тееви весемеде явозь, эсензэ лувсо. Весемесь сюлмавозь икелень ды сы шканть марто. Эрьва мезенть ундоксонзо таргавсть ламо енов: пертьпельга, верев ды алов, икелев ды удалов. Ды минек эрямонть лангскак, эрьва ломаненть эрямо кинзэ лангскак эряви ваномс. Кода весе тень мельсэ кирдезь, мезеяк а стувтомс. Альбина Васильевна Суняеванень топодсть 75 иеть. Шачсь-кассь сон Ламбаське велесэ. Тетязо васенце эйдензэ лемдизе Альбинакс, истямо, келя, лем марто тейтерь сон вастнесь Ивановасо, ков якась торфов важодеме. Семияст ульнесь покшоль, секскак тетяст-аваст туртов арасель шка колневтемс-налксекшнэмс эйкакштнень марто. Эзь марявояк кода кассть-кепететсть тейтертне ды сась шка мирденень лисеме. Ульнесь Альбинань вечкевикс ломанезэяк, ансяк тетязо эзизе максо Серафимнень, кекшизе мик паспортонзояк, штобу тейтересь аволь оргоде кудосто. Истя вечкемавтомо, ежонь апаро марто, 21-це иесэ сон лиссь мирденень. Урнемань валтнэнь Альбина приметинзе уш эйкакшпорасто. Сон ялганзо марто сеетьтэ якиль свадьбань ваномо, тосо и теевсь содавиксэкс эрзянь свадьбань фольклоронть марто. Эдь седикеле эрзянь аватне морыльть свал: и парс, и беряньс. Од аванть дивавтсть сынст чова эли эчке сурекс таргавозь вайгелест, мазый-лембе валост. Альбина Васильевнаньгак пингезэ ютась теке эрзянь моросонть - важодезь ды ламо эйкакшонь кастозь. Важодсь сон фермасо, ялатеке муиль шка ловномс книгат. Николай Некрасовонь ламо стихотвореният сон кирди превсэ нейдяк. Ловнокшнызе Шекспирэнь. Пек парсте содасы "Ромэо ды Джульеттань" ютксо вечкемань сюжетэнть. Ламбаськень авась нейгак эзинзе стувто урнематнень ды лайшематнень. Альбина Васильевнань ули мелезэ евтамс весенень поздоровт ды тонавтомс тейтерь-аватнень урнеме.
Пасиба евтан Пазонтень, Оште пасиба раужо модань сокинтень, Сюронь-салонь видинтень. Оште пасиба сэтьместэ пуви вармантень, Менель ежова сэнь пелень таргинтень, Видинь-сюронь лангонтень, Сэтьме пиземень нолдынтень. Оште пасиба сюронь кенерсти чи пазонтень, Мирэнь народонь андынтень, Мирэнь масторонь кирдинтень. Кинень мон евтан пасиба эстедень покш вал, Евтан пасиба эстедень покш вал, Тиринь ваныця тетянень. Пасиба, тетяй, пасиба, Вишка сэрень кастомга, Одонь сэрень жалямга. Ансяк, тетякай-тирякай, Емась стяко тейтерь тякань трямот, Тейтерь-тякань кастомат. Мон а маштан раужо палянь муськеме, Ашо палянь максыцякс, ох, тетякай-тирякай.
*** Кинень мон евтан пасиба эстедень покш вал. Евтан пасиба мастор лангс нолды аванень. Пасиба, авай, седей алот кантнимик, Ашо ловсодо антнимик, Пасиба, авай, пасиба, вишка сэрем трямозот. Пасиба, авай, пасиба, монь одонь сэрем жалямга. Кинень мон евтан пасиба, Кинень евтан покшонь вал. Пасиба евтан ве ендонь саинь уряжнэнь, Пасиба, уряж, пасиба монь одонь сэрень жалицям, Мазэ нарядонь максыцям, пасиба, уряж, пасиба. Кото недлят покордазь сэрьсэнь мон эринь, Кото недлят эзинь ойсе мон ды столь экшес. А ней, уряжкай, мон тонть вийнесэ, Вачо пекем тонть вийнесэ мон пештия.
*** Ох, ольной райной оляксчим, Бояраваксчим, тейтерьксчим, Кавто кедьсэ кундатан, Вить лавтов ланга каятан, Кемень сурон пачк таргатан, Кумажа прязон озавтан. Ох, ольной райной оляксчим, Бояраваксчим, тейтерьксчим, Коданя жалка маряват, Козонь тейдян мон катан, Козонь путан варчатан. Путовлитинь оляксчим, седей ежозон, Пелян бояравакс чим, молиндирян ломаньс, Панар карксом лавшоми, тонеть тосо а тарка. Ох, ольной райной оляксчим, Бояраваксчим, тейтерьксчим, Кучовлитинь пиже лугава якамо, цеця потмова пакамо. Пелян велень цератне молить тикшень ледеме, Пелюмасо ледеват, керш покозос каяват. Тосояк тонеть а тарка, тосояк тонеть емамо. Ох, оляксчим ойминем, тейтерькс чинем седейнем, Кодамо жалка маряват, кодамо мила неяват. Пиже дугам а Маня, мазы дугам сазоркам, Сакая Маня малазон, арака Маня боказон, Тон сазоркам паро тетянь ды авань, паро родонь ды племань, Тон оляксчим монь саик, тейтерьксчим примик. Мон тонеть приказ приказан, мон тонеть наказ наказан, Иляк кирде тошнасо, иляк кантне горясо, Иляк максне од церань кедьга, Коморга рудазов зепе уголга. Пижине дугам а Настя, сакая малазон, арака боказон. Тон ольной райной оляксчим коренонзояк таргитя, Илязо ледне мелезэнь, илязо сакшно превезэнь. Ох, ольной райной оляксчим, бояраваксчим, тейтерькс чим, Хоть кадытинь мон Маня марто Насянень, Монь сынст лангс арась надешкам, Монь арась сынст лангс кемемам. Пазава икелев мон путан, Паз лангс кемезь мон кадтан. Ванодо, ялгат, ванодо, Ванодоя сисем коленань родноень, Кодамокс тыненк маряван, кодамокс неяван. Эстень маряван - мон а тейтерян, аволь аван, а солдаткан, а дован, Мон тейтерьксчистэ саезян, оляксчистэ явозян, Лужадовлинь лужадозь, лужадовлинь лондадозь. (Сергедсть: сыть кудат. Одирьвась урни). Те ансяк эрзянь свадьбанть ушодксозо. Урнематнеде ламо ды газетань вейке лопас сынь а кельгить.
Г. КАЖАЕВА