Сельские вести

Кельгома Руссть и мокшэрзянь народть содаф стиренза-церанза

Модать лангса эрь шуфтонять ули сонцень юроц, и эздонза сон шачи, касы, сявонди вий. Тяфтама жа юроц эряфса ули эрь ломанть и марнек народть.

Мокшэрзятнень кисна - юрсна сявондевихть ся шитнень эзда, мзярда атянь - атясна эрясть фкя вастса, конат ащихть кафта оцю ляйхнень Окать и Сурать ёткса и корхтасть фкя кяльса.

Сяда тов эрямста лама веконь ётазь, лама туфталонкса башка народонь группатне кармасть корхтама лия кяльса. Тяфтама жа фкя группаста «финно -угорскяйста» тиевсть и минь народоньке «мордвась» эсь кялензон мархта' мокшеннеть и эрзяннеть.

Мокшэрзятненди «Мордва» лемть максозь шабрань нароттне, конатнень мархта кирнеме кеме соткс тежяньда лама киза, тяконекс и руснень мархта. Тянь колга тяшти авторсь Нестор «Повесть временных лет» летописьсонза. Сон лятфнесы мордвать ся нароттнень ёткста, конат пандсть дань Русти. Мордвась - тя кунардонь Россиянь народ. Мокшэрзянь народсь марса, рузонь народть мархта тюрсть Золотой Ордать каршес. Тя нароттне ладяйхть фкя - фкянь мархта тежянь киза. Синь марса тюрсть Великай Отечественнай войнать пингста врагть каршес ваймонь апак ужяльтть павазу эряфть инкса.

Минь республикастонк фронту тусь аф кржа од цера и стирь. Кинди савсь мрдамс куду, а ламотненди ашезь сав.

Мордовия республикань сяда кафкса ломаттненди максфоль Советскяй Союзонь Героень лем. Синь етксост летчикне : М.П. Девятаев, А.Г. Котов, Т.С. Горячкин, С.А. Полежаев, артиллериеттне - В.Б. Миронов, М.М. Коняшкин, танкисттне - И.П. Адушкин, А.Г. Махров и лиятне. Лама генералда казьф тя оцю казнеса: армиянь генералсь A.M. Пуркаев, генерал - полковниксь И.В. Болдин, авиациянь генерал - полковниксь С.К. Горюнов и лият. Афкуксонь геройкс пряснон няфтезь Мордовиять церанза и стиренза Великай Отечественнай войнань фронттнень эса.

Войнань васенце шитнень валхне: «Семботь фронту, сембось сяськомать инкса!»

Эрь ломанць, шабатне, сиретне тиендезь семботь сянкса, штоба курок тапамс врагть, ароптомс эздонза моданьконь.

Сяськомать маласькофтомс аф кржа тисть Мордовиянь эряйхневок. Колхозникне шинек - венек покодсть паксяса, фермаса, штоба фронту воиттненди пачкодель сяда лама сера, модамарь, сиволь. Мордовиянь эряйхне кочкасть сяськомань фондти ведьгемонь кота миллион цалковай, конатнень лангс тиф колма самолетт и танковай колонна «Мокшэрзянь колхозник».

Ётасть войнань толу стака китне - яттне.

Мокшэрзянь крайть церанза, стиренза лездсть СССР - ть тапаф, плхтаф ошензон, велензон, заводонзон, фабриканзон одукс тиема.

Валом - валом эряфсь ладявсь, войнань сярятьфне пчкафневсть. Тяниень пингть сембода оцю козяшиц мокшэрзянь крайть - тя талантливай, ляпе седи, воляшинь кельги, стака тевда аф пели народоц.

Мордовскяй народсь векта - веке шачфтсь - касфтсь смузю ломатть: ученайхть, спортсметт, сказительхть, морайхть, художникт, тевонь кельги ломатть.

Марнек мирти содавикс тиезе эсь народонц мордовскяй скульпторсь Степан Дмитриевич Нефедов (Эрьзя). Народть еткса кассь художникть Ф.В. Сычковонь творчествац.

Мокшэрзятнень еткста лиссь аф фкя содавикс спортсмен. Эрзянь стирсь Ирина Станкина мордватнень историяса васенцекс арась миронь чемпионкс спортивнай молемаса. Мокшень церась Олег Маскаев миронь чемпион боксонь пялькстомаса. Сембода известнай российскяй гимнастсь, нилексть олимпийскяй чемпионць, Алексей Немов, тага мокша.

Ламоксть олимпийскяй чемпионкать - лыжницать, Любовь Егоровать, тядянза - алянза шачсть тоже Мордовияса, Липовка велеса, кона Атюрьевскяй районца.

Тячиень шис кирнетяма кеме аф юксови соткс рузонь народть мархта.

Мокшетне и эрзятне тячи Россияса - инь оцю народсь финно - угорскяй нароттнень еткса.

Мордовиясь минь кельгома мастороньке, конань лангса эряйхть лама национальностень ломатть. Сембе мирса ашель и аш Россиять кодяма страна, кона вииякшнель кода народнай союз.

Пефтома кельгома Родинати, седиень таколфты стихонь мазы валса сермады мокшень содаф поэтсь А.С. Малькин:

Россия, кельгома Россия,

Ки крайса акша келунал!

Тонь славаце мирть келес лии,

И колгат яла лямбе валсь.

Мордватне ванфтозь синцень кяльснон, культураснон и арасть фкя инь кеме нежедема вастокс оцюдонга оцю российскяй народти и кельгома Российскяй государствати. Тянь синь няфтезь фкя - фкянь мархта марса пцтай кемонь веконь кувалмос эрязь.

Марина Федькина, Колапона велень школань тонафнись.

Еще материалы

Комментарии