Сельские вести

Кельгома Руссь и мокшетне

Вага монь и кельгома Мордовиязе. Картань ширде пяк мала Россиять картанц лангс. Кода стирсь похожай эсь тядянц мархта..Сяс и лувсаськ, Россиять эсь тядякс, а Москуть - тядянь седикс.

Куване кине афольхть яка,

Тага меки модати мрдайхть.

Улест синь нюрьхкянят иль кувакат-

Родинаньконь главнай кинцты прайхть.

Сембе мазышиц перьфпяльть няеви, кда етасак сонь ялга. Етат масторть келес, якат-шяят крайста-крайс, ков аф молят: ошу, вели, сай павазу, кенярдемань гайф. Кельксят сонь вирензон, паксянзон и луганзон. Мялезот туйхть эрьхконза, морянза и ляенза. Варжакстат перьфпяльге, тя мазышись и козяшись кеподьсазь мяльцень и сайхть прязот мороста валхне:

Кда тяштят шачема масторть колга,

Кизефнек лугать.

Мяльце кулемс моронц каргонь полгонц.

Кулхцонтк шяй трвать

Кис срхкат, тя кевсь тонь кицень няфтьсы,

Каршезт стяй шинясь.

Керат кши, макск ялгаценди шяфтенц-

Тошкай эрь розьбрясь.

Марстонь тевса трудендазь мастороньке сатсь оцю сатфкст. Варжакстат перьфпяльге и няйсак, конашкава полафтсь шачема-касома крайсь. Кона ширде ба афолеськ сяве: и стройкаса, и урожаень касфтомаса, и культураса, и спортса. Аф оцю Мордовияньке, но содаф сембе мирти.Тя минь вайгяленьке марявихть, мзярда моратама мокшень морот, тя минь колганк корхтайхть, мзярда няфтевихть мокшень щапне-каряматне. Сембось аф шарфты лия народонь культурань лангс.

Кда морамс,

Мярьган аф весть- кемоньксть

Цефксокс морак- вяшк,

Шачема-касома крайцень

Тядянь лемонц

Зарянь валдти тяштьк.

Мокшень крайть стиренза и церанза аф прафтсазь визькс шамас. Козякофтыхть и касфтыхть эсонза. Каст и виензак, Мордовиязе, мазы мастор, павазу ульхть тевозт шачф мокшень народ!

Тя павазть сатомаса оцю лезксоц тядять-Русть. Мархтонза сотнефтяма веконь век. Тя Руссь стака пингста коль венепти кяденц, кульхтяма ляпе валонц, кда зиян лиси мархтонк, кда тейнек васедихть ешмот.

Сонь тядянь сединь ваксстонь валоц

Минь, ялгат, ваймонеконь панчсь;

Маякокс палы тяште валдоц

Эрь- мезне эряфонь киганк.

Сон аф кадсамазь зиянцта,

Судьбасонк мезе афоль лись...

Ведь сонь курантонь моронц коряс

Мирсь тяни етасы эсь кинц.

Монь лама ялгадон, пяк лама,

Браткс арафтозень рузсь.

Эрь крайса адрес минь мутама,-

Минь Родинаньке фкя- Руссь.

Емла Мордовиязе, но сон Россиять аф явфтови пялькскац, коса эряйхть мокшет, руст, татархт и нинге лама лия нация. Сембе эрятама лац-ряц, койнь и обычайнь ванфтозь. Аньцек марса, фкя-фкянь лангс нежедезь, ульхтяма павазуфт и шумбрат.

Лама ялгадон, пяк лама:

И руст, и татархт, и якутт.

И кона крайса аф ульхтяма

Миндейнек Москусь-марстонь куд.

Еще материалы

Комментарии