Сельские вести

Синь аноклакшнесть тонафнема книгат

Нинге оцязорт пингста татаронь поэтсь Ф.И. Агиев (1887-1938) работакшнесь учителькс Казань ошса, 1915-1918 кизотнень еткса ульсь редакторкс «Ак юл» (Валда ян») журналса. Сон лисендсь татаронь кяльса. Тя журналса Ф.И. Агиев нолязень иттненди эсь стихонзон, азксонзон и еньксонзон.

Шачемань коряс Ф.И. Агиев татаронь Тенишева веленяста, кона ащи Усть-Рахмановка велеть ваксса.

Революцияда меле сон мрдась шачема велезонза. Покодсь аф лама пинге учителькс. Сяда меле кочкафоль оцюнякс волостень ашувонь комитету. Тоса етась работама Пенза ошу, коса работась губернскяй просвещениянь наркоматса, вятьс татаронь отделть. Тяка еткть нолясь татаронь кяльса газета, коса печатлакшневсть иттненди литературнай произведениянза. Эряфонь мекольдень кизонзонзон пингста работась Моску ошса, РСФСР-нь просвещениянь наркоматса. Тя смузю татаронь алять эряфоц сязеви репрессиянь кефнень ала.

Мокшень учительхнень еткста, васенцесь кие сермадсь и нолдась тонафнема книга ульсь поэтсь Р.Р. Федькин (1909-1984). Шачсь Колапона велеса.

1940-це кизоня нолдась тонафнема книга «Родной литература» 6-це классонь тонафнихненди. Тя книгась нолявсь войнань и войнада мельдень кизотнень. Пинге етазь тя книгать сон ламоксть петнезе и полафнезень кой-кона материалхнень.

1950-це кизотнень ушетксста Р.Р. Федькин книганц нолязе марса, лия автор мархта.

Лама вий и эрьгя путнесь учебниконь нолдамань тевти учительсь М.В. Кондрашкин (1926-2002). Шачсь сон Бораж велеса. Тоса же ушедозе учителень кинц, а меле работась Атерень васенце средняй школаса. Васенце учебникоц, лия автор мархта, нолдафоль 1964-це кизоня «Мокшень кяль» 4-це классонь тонафнихненди лем ала. Лисендсь сон 1992-це кизотнень самс. Тя учебникта башка 1970-це кизотнень ушетксста нолясь 3-це классонь тонафнихненди «Родной вал» учебник. Азф учебникнень тонафнемс сон нолясь методическяй пособият.

Атерень 1-це средняй школань учительницась А.Г. Еремкина нолясь «Мокшень кяль» учебник 2-це классонь тонафнихненди, конац лисендсь фкя изданияса.

П.И. Веденеева, аф Атюрьевскяй райононь. Но сон педучилищать аделамода меле сась работама Атерь вели, школав и лядсь эряма тязк. П.И. Веденеева марса А.И. Келинать мархта анокласть и нолдасть 3-це классонди «Родной вал» учебник. Библиотекасон улихть тя учебникть кафта экземпляронза. Фкясь нолдафоль 1988-це и омбоцесь 1992 кизотнень эзда.

Тяни П.И. Веденеева пенсияса, эряй Саранскяй ошса.

М.В. Кондрашкин, А.Г. Еремкина и П.И. Веденеева эрясть Атерьса.

Азса, што синь мархтост васетькшнень, лац содалине синь и лядыхть монь мялезон, аф аньцек кода школьнай учебниконь сермадыхть, но и кода пара учительхть и цебярь ломатть.

Василий Сиркин, краевед.

Еще материалы

Комментарии