Сельские вести

Вов тейть и копшат-калацят

Марувонь Аннась аф фкя Ожна велень церань седи солафтсь. Тячи фкять мархта "хи - хи - хи" да "хи-хи-хи", ванды омбоцеть. И кажнайти надияфнесь рьвакс лисемс. Аф стак цюланстост марнек вальмя сельмосна тапафт.

-Панде,-мярьгсь тядяц, Мару рьвяня. - Аш мезе эрь илядня кудоньконь каршес церань хоровотт пуропнемс. Тяса аф клуб. Пинге, рьвакс, стирняй, лисемс.

-Рьвакс, рьвакс..., - бта полаксась тядянц эса. - Мярьгат, цератне ки лангса валяндайхть.

-Да эрь илядня вальмалонк вяшкондихть…

-Вяшкондихть да аф сят. Аш Ожна велеса коряван жанихт. Фкять енец лафча, омбоцеть пиленза оцюфт. Рахсемонк кармайхть. Вов мярьгихть Марувонь Аннати цебярь мирдевок ашезь мув.

-Эх-эх-эх… Аф серень аф ронгонь ширде Шкайсь ашензе обжа, а прясот нинге варма. Пиленза оцюфт, енец лафча. Ломанць цебярь улеза, ененте ладявост. А аляце кодамоль рьвяямстонк. Шалхкоц якстеряпшкаль, шуваняль, кода олгоняль.

-Алязе тя алязе.

-Виде, эсь кичкорце аф няеви. А мес Капризонь Микольсь аф мирде. Сянь перьфкат сяда шарфтк. Аф шарыбря, трудонь кельги. Вакссонза вачеда аф лядат, цюкорда кармай аннемот.

Аню кулхцондозе тядянц, лиссь рьвакс Миколенди. Недлявок марса ашесть кенере эрямс, од мирдсь андозе кельгоманц "цюкорда".

Анювонь креснавац тердезень шачема шинь илазонза. Пиравасть цебярьста: симсть-ярхцасть, кштисть- морасть. Шобдава стясь Аню, сельмекабанза сенепт.

-Тш - тш - тш", - велень аватне, да "тш- тш-тш". Тя, кле, Капризсь пикссезе. Лиянди аш кинди.

-Шушеласта прань,-виденцякшнесь Аню. А сонцень сельмоведенза шудихть. Нату, ялганцты и панжезе ваймонц. Тя кле, сон, муженекозе, никсафтозень кядьстон цюкоршка мокшенданзон.

-Мезенкса, ялганяй?,- абонкшнесь Нату. -Да лац-ряц эрямска марса ашеде кенере?

-Монць муворусь, монць… Саме пиравама вастста. Кафцьке комблявняфтама. Мирденекозе велясь васта лангс и ушедсь кода трактор крнама. А тоса маряса зря-бря ушедсь пешкоткшнема.

-Кадомак, мярьгонь, нолдайть кяднень, пови вдь пови.

Мон ворьгодень ваксстонза диванти. Ащемаль шеернякс, афолемаль кашторда. А мон ктор-ктор-ктор, ктор-ктор-ктор. Аф каят, аф пови. А сон тага:

-Пови вдь, пови, лябате вдь…

И тяфта веньберьф. Удомбачк кати-кинь мархта воявась. А тоса матодовонь. Маряса цят-цят щека ланга. Юпадень диван лангста:

-Ах, аеркс! Мезенкса пикссамак?! Мезень кальдяв тиень?

А сон келептезень сельмонзон, корожкс лангозон ваны:

-Простямак, Анюта, шяйтаттне веньберьф эсон пикссесть.

-Шяйтаттнень мархта воявать, а повсь тейне. Ашесть кирдев сельмоведне, ушедонь авардема. А сон нолдазе прянц, ушедсь виденцякшнема: "Монцьке аф шарьхкодьса, мезе тиень".

-Тяфтамть мархта пелькс эрямаське. Тяни мокшенданзонды воля макссь, оду удомбачк пеель кядезонза сяви. Тага простяфтсы прянц.

Тяда меле Миколь удомбачк корхнесь сидеста. Но Аню старандась аф матодовомс, фалу кирдсь вакссонза мезень-бди стаканя, мирдьта аралама пяль. То тапама вастть алу путнесь, то кодамовок палка. Монцьке, кле, ацентьфтсайне шяйтаттнень. Весть стясь Миколь венели, Аню кодак керсы касом ланга палкаса, вастть вакс боком и велясь, тозк и венелендась. Аню сяшкава эводсь, што кяпе и штадоня веньгучкать ласьксь велень медсестрать инкса. Ся сась, ванозе и корхтай:

-Тят лажна, Анюта, кармай эряма. Тяфта тейнза и эряви, штоба оду кядензон афолезень ноля. Ату онцтонза шяйтатт пяк няи. Тяда меле лоткай ононь няемда.

Каприз Микольсь- ломанць грамотнайль. Вузувок молель тонафнема, кда улельхть алянц ярмаконза. А тяни титиенза-митиенза сатсть аньцек техникумонди. Тонафнесь церась, кочксесь содамошит. Но колхозу молемс мялец ефси ашель. Сувась кода-бди велень хозяйствань управленияв Коля щенянц варжама. Ся и прважазе оцюняснонды. Пади, кле, муй коряват кодамовок тев. Тевоньке тяса аф пулю, аф назему, эрямс можна. Шкуркин од церать примазе пяк лац. И тевга мусь. Сявозе покодема статистикань отделу. Тевсь аф стака, аньцек чирк да чирк каготкятнень эса. А няфтьсак, кле, лац пряцень, сяда ответственнай тев макстама.

Од церась управленияса трудендась аф куватьс. Фкя планеркаста Варлам Абрамыч Шкуркин ушедсь кизефнема работниконзон кядьста, кие-мезе исяк тись. Фкясь колхозу якась, омбоцесь министерствав каготт аноклась.

-А тон мезьса кеняртьфтсамасть, Варакин? - кизефтезе Миколень. -Мезе исяк шиньберьф тиеть?

Шнафтомс пря аш мезьса. Ушедсь виденцякшнема. Лангсонза ушедсть ктордома.

-Варакин, ялгатнень мяльсна содамс, кодама тефт исяк тиеть- якафтоть,- нинге весть кизефтезе Шкуркин.

-А мон, Варлам Абрамыч, шеерхт кунцень,- отвечась Миколь. -Покодемс тейне шоряйхть. Аньцек сяван кядезон кагод, а синь, окаяннайхне, ширк фкя пяли ласькихть, ширк омба пяли ласькихть. Сембе нерванень сивозь.

-И лама кундать?-Мянь комсь ветие.

-Ха-ха-ха, ха-ха-ха, кармасть лангсонза рахсема ялганза. А кие-бди мярьгсь: "Тянкса аф грех премиявок максомс".

-А нинге мезе тиеть?- кизефтезе баярнясь.

Миколь кяжиясь ялганзон лангс и азозе сембе "видеть-правдать", мезевок ашезь карма кяшендема:

-А нинге, Варлам Абрамыч, "сяпинянкса" лавкав ласькондень.

-И ламоксть ласькондеть,- Варакин?

-Ветешкаксть… Васенда инженерхненди кафтошка сюлека кандонь, тоса…

-Панде, панде.. Шарьхкодень. Вов кода, значит, трудендатада, велень хозяйствать эса кепоттяда.

Тя корхтамада меле Капризонь Микольть кучезь прянь тряма "Аньцек инголи" колхозу. Аш месть, кле, управленияса шеерхт кунцемс, да лавкати ласькондемс.

Колхозонь предсь, Василь Иваныч, путозе учань фермав азорнякс. Ломаньда трудендась аф лама. Сонць, кафтошка эряфкшу аванят. И, конешна, сембе тевса сафтысь Курмань Васясь. Ся и тишень ускись, и учань печкись- ваткайсь.

Анювоц кизефтьсы:

-Мезькс работат, Миколь?

-Овчаркакс…

-Мезькс? Мезькс?

-Пилетнень панжить… Аф кулихненди нинге весть азса - овчаркакс.

-Ся пинекс штоли?

-Да кой-коста пинекска сави увамс. Ломаттне, няк, кодапт тусть, апак увак, пешкоткшнек аф сембонь шарьхкодьсазь.

-Увазь тисак тевть…

-Тят пеле, тиса. Сивольняфтома аф катте.

Фермась оцюволь. Учада эсонза ламоль. Тердезе весть предсь и корхтай:

-Врлам Абрамыч ванды ошу моли, оцю ломань мархта васьфти. Кода вдь гостинецфтома. Тефне тяфтома аф решандавихть. Печк шашлыконди кафта учанят. Лацке урядайть, цебярьняста ашкодыть. Ату вдь тоса аф миннет ялгатне, меки мрдафтсазь.

-Мзярти анокламат, Василь Иваныч?

-Тячити эрявихть.

-Ули эняльдемаце пяшкотьф.

-Содасайне ня баярнятнень,- мярьгсь Миколенди Курмань Васясь. -Теест сяда справнай, куяв учанят эрявихть. Тяфтавок пексна кода очконят. Вов уратфнень эзда кафтоня ваткатама.

-Тон месть, Вася?! А кда киньге кулофттама, кафцьконь тюрьмав чаподьсамазь.

-Тят пеле, кивок аф кулы. Баярняда "живучай" ломать аш. Мзяра тяфтама учада порьсть, мезевок мархтост ашезь лисе, тазат потмосна алятнень.

-А кда предсь содасамазь?-Аф содасамазь. Кафта учанят печктама: фкянять тейть, омбоценять тейне.

-А аватненди?

-Потмоснон макссаськ варчсемдост. Годявихть… Лац вдь корхтан, Миколай Миколаеч.

-Лац, лац, Вася.

Весть тяфта тисть, обмоцеда, колмоцеда. Миколень пеконяц тиевсь сивольнять эзда.

-А вов Варлам Абмамычень лангс баярня ялганза ширем сельмот кармасть ванома. Фкять лимокс-сюнокс кармась пурямонза шашлыкта меле, недля ушу ласькондсь. Омбоцесь сивольдовок лоткась ярхцамда. Пяк ни ласьксь седи куцюнязонза. А мзярда андозь учань палняда министрть полафтыенц Аким Акимычень, Миколень аф пара тевнянза лиссть лангс. Баярнясь кафтошка недля рязондсь больницяса аф аньцек сонць, но и сембе семьяц.

Василь Иваныч панезе Миколень учань фермаста. А меле эстейнзовок мельганза савсь тумс. Варлам Абрамыч ашезе простя предть.

Тяни Варакин тага лядсь тевфтома, "сяпинять" мархта кармась ялгафнема. Анювоц анзяй, анзяй. Фкя пилеванза лиси, обмоцева сувай.

-Сяда тов тяфта эрямс аш кода,-мярьгсь Миколенцты.- Али архт Москуву добувама, али ськамот эряк.

Од алясь кочказе васенцеть. Марувонь Анюсь недля срхкафнесь эсонза оцю ошу добувама. Марнек Ожна велеть етазе, шумос ярмаконя аньцесь. Кие вете сятт максы, кие тежянь. Вдь кис эряви, васень пингть симомс-ярхцамс, эряма вастонкса пандомс. Пидесь-панць мархтонза, щапт аноклась. Парязе баняса. Кие содасы, кле тоса мзярда удалай штамс.

А тоса прважазе автобусса шабрань станцияв. Сумканзон ускозень лисапедса, пяк ни стакатольхть, кядьса ашесть и кандов. И мезе арьсетяда, пачкодсь Микола Москуву? Аш, конешна. Аньцек валгсь автобусста, ушедсь вешендема мамамбяль. Копорясь "сяпиняда" ярмаконь аф ужяльдезь. Ши симондсь, кафта, колма. То вокзалса валяндай, то шуфтонятнень ала кожеряй. А Анювоц учи, надияй. Аля ваймоц Москуву добувама туф, зепе ярмак уски. А мзярда симондевсть ципанза, поревсь ярхцамбялец, сась куду. Щамонза рдазуфт, изгоряфт. Кяденза сязентьфт, шамац кицькоряф. Аню аньцек няезе, эстокиге седиезонза кундась:

-Тон коста и мезе мархтот?

-Москуста… Аф няйсак штоли,- отвечась Миколь.

-Вай, Шкабаваскяй… Кали Москуву ни пачкотькшнеть?

-Пачкотькшнень… пачкотькшнень. Мон добувань, а тяни архт добувама тон.

-А мезьса, шумоньконь пандсаськ? Мзяра мархтот аньцень. Мзяра лавкав шумуфтама. Аньцек исяк тежянень питне кандонь. Мярьгонь Марож Нюрати, сай Миколезе Москуста, пандсаськ.

-Пандсаськ мзярдовок.

-Мзярдовок? ! Да вдь синь учема аф кармайхть, вешсазь- анасазь шумоснон.

-Афольхть макса…

Аню аварьгодсь.

А омбоце шиня вятезе Милканянц Олдакс велень базару мимс. И лофцуволь, и сятяволь жуватанясна. Мзяра пинге эсост трясь. А тяни косьфтасыне кафцьконь кургснон.

Вов тейть, Мару ава, и копшат-калацят. Афолеть раха да рахават.

Илья Вешкин.

Еще материалы

Комментарии