Сельские вести

Марса минь виеньке

1000 киза эрятама Российскяй народть мархта ладязь. Мзяра марстонь вий путф, штоба тя соткссь афоль юкссев, а кемоксталь, виензаль шида шис! Кода содасаськ историяста, 1612 кизоня «Смутнай пингста», мокшэрзянь войскась тапазе ногайскяй ордать. А сон, ордась, ёрась върьгятемс Мининонь и Пожарскяень ополченияснон тылонзон лангс, и ёрась лездомс польскяй интервенттненди, конат ся кизоня ащесть Москувонь Кремляса. И кие содасы, кодама киге туль сяда тов Россиять историяц, кда мокшэрзятненди афоль сяськов ногайскяй ордась. Тяфта жа пяк эрьгавста, виень аф ужяльдезь, аф пелезь мокшэрзятне тюрсть Россиять инкса Наполеононь и фашисттнень нашествияснон пингста. Тячи тейнек ули кода азомс, што мокшэрзятне Россиянь лия нароттнень мархта араласть странать эса эряфонь апак ужяльтть сяс, мес тейнек сембонди Россиясь-Родина. И сембе минь, эсонза эряйхне-россияттама! И сон тейнек эряви ванфтомс и виияфтомс.

Родина! Тя валсь арай содавиксокс эрти нинге анцяйнякс улемстонк. Родина-тя страна, коса тон шачеть, эрятэсь мала ломаттнень и ялгатнень мархта.

Россиясь пяк оцю и козя мастор. Мзярда шись стяй родинать фкя песонза, Москуса -пяле ве. А мзярда кремлёвскяй куранттне няфтихть обедонь пинге, то Чукоткаса и Камчаткаса- удома пинге. Тяфтама оцю мастороньке!

А кодама сон козя! Модась, морятне , ляйхне, паксятне, модалдонь козяшитне- сембось афи азови, конашкава сельмонь каяма вастса минь эрятама.

И тя оцю Масторть эса эрь ломанть ули маладонга мала уженяц. Монь уженязе-Мордовия республикась. Тя монь ёмла родиназе. Нинге ёфси аф кунара странасонк кржа, коса содасть аф оцю Мордовияньконь колга, нльне шорсезь Молдавиять мархта. Тяни жа мокшэрзянь народоньконь колга содайхть и Дальняй Востокса, и Уралса, и Калининградса, лиякс мярьгомс, оцюдонга оцю Россиять сембе уженянзон эса и нльне омба масторса. И тя аф стак. Мордовия Республиканьке моли -аськоляй касомань вииямань киге. Минь Республиканьке лиссь ламоц позициятнень коряс инголи аф аньцек Приволжскяй Федеральнай округса, но и марнек странаса. Мялень кеподи сатфкст сатфт и промышленностьса, и велень хозяйстваса. Аф ваномок тяниень стака кризисть лангс, тяддя Мордовиясь кочкась фкя миллион ниле сятт тёжянь тоннада лама сера.

Башка оцю мяль шарфневи социальнай ширти. Вишкста мольфтеви эряма вастонь, школань, больницянь, соццентрань строямась. И тя сембось аф кагод лангса, а афкукс станя.

Тяддянь васенце сентябрьста мон ялганень мархта тонафнян современнай школаса. Тяса сембось тиф сянкса, штоба минь кочкалеме крхка содамошит, визькс аф тонафнемс тяфтама условияса. Тяниень пингонь од мебель мархта валда кабинетт, компьютернай класс, цебярь столовай, спортзал- сембось сельмонь каяма васта. Мон пяк кеняртьфан, мес тонафнян тяфтама пара вастса.

Веленьке мазоми эрь шиня: тяса строявихть кутт од семьятненди и парста покодихненди, велеть кучкас строявсь соццентра- тяса кармайхть мялень касфнема аф аньцек оттне, но и эряфкшу ломаттне. Велеса ётафтф газ, водопровод, кись - вадяв лента, кона таргавсь велеть Центральнай ульцянц кучкава. Аф оцю пингста велесь петевсь, панжезь панжи, терди одонь седихть. Велесь моли инголи, аф срады- калады. Тяса праздниконь иласта кайгихть мокшень морот, конат азондыхть ингольдень пингть колга, ванфтовихть койхне-обуцятне, корхтатама родной кяльса, кона максфтядянь лофцть мархта. Сембось тиендеви, штоба афолеме лотксе сатфкснень лангс. Минь, мокшэрзятне и Россиянь лия нароттне, марса и фкя-фкянь мархта ладязь эрятама тёжянь киза. И шарьхкодьсаськ, што виикс, и павазукс ульхтяма аньцек марса, и аньцек марса тейнек ванфтови, сядонга виияфтови минь марстонь великай родинаньке- Россиясь!

Иван Исаев, Каргоньжяй велень школань тонафнись.

Еще материалы

Комментарии