Сельские вести

Марень Спассь Атерь велеса

Тяддень коське и пси кизоня атерень ломатне кочказь инь кельгома вастонди Ляце берякть, коза ульсь ацаф асфальтовай ки, и коса лама киза лихтибрятне симнезь народть ару ведьта, и конат тядде шачсть оду.

Афкукс тяфта и лиссь. Тя кизоть ушетксста, Кльчингяста, 19 январьста, аф ваномок кеме мороснень лангс, народсь мольсть тяза фкя-фкянь мельге ведарка и бидон мархта лихтибрянь веднянкса и… шумбрашинкса.

Ефксонь мазыса часовнясь и купельсь, конац наряжаф святоень ликаса и светиндаф молитваса и шкайса, канды ломатненди эрьгя и шумбраши.

И вов 19 августста тяза тага кочкавсь народсь. Синь етксост ульсть инжихть-журналистт республиканскяй телевиденияста, районнай администрациять оцюняц И.С. Гусаров, Атерень церкавть настоятелец отец Сергий, фольклорнай ансамбльхть райцентраста и Перевесье велеста и лиятне. Кочкавсть лугать лангс, лихтибрять вакс. Вдь сяда цебярь васта аф и муви, коса бы ломаттне марселезь эсь пряснон свободнайста, кенярьфти настроенияса.

Илать ушедозе Покровскяй церкавть настоятелец о. Сергий. Сон служась праздничнай молебен.

Авань ансамбльхне морасть мазы морот, конатнень эса марявсь оцю кельгома шачема крайти, моротненди, кяльти и национальнай щапненди. Татьяна Акимовна Тремасовась, «Ивушка» ансамбльть руководителец, лама азсь мокшень обуцятнень, традициятнень колга. Гайняк - мора!

Анастасия Лемяскина.

Еще материалы

Комментарии