Сельские вести

Варжаксттама кунардонь пингти

Васенцесь ащи мокшень Козловка велеть эзда пяле вайгяльбе вастса, шуварса валф пандонять пряса. Сон таргави кельме ширде лямбе шири, кувалмоц 200, а келец 60 метра. 1980 кизоня и (1993 кизоня) тяза сашендсь археологическяй экспедиция Мордовскяй Республикань правительствать видеса кялень, литературань, историянь и экономикань научно-исследовательскяй институтста, конанди вятикс ульсь Яков Васильевич Беляев. Экспедициянь участникне мусть ломанень пакарьхть, тюремань предметт, керамика и всякай тюсонь крганят.

Ламотне эздост тифт клянцекста, сияса валф металлста.

Муфкснень еткса бронзаста тиф украшеният, кшнинь пеелень пакш, стрелань оржа пет, бронзовай браслетт, шнанди бронзовай бляшка, севонень оцю кукшення. Тяста жа муфт кунардонь пингонь лия предметт, тяконь лувксса оржа пика. Сонь кувалмоц 28,7 сантиметра. Яков Васильевич азозе, што тостонь средняй школань учительсь В.Д. Шнякин макссь тейст копьянь пе, кона тиф кшниста и ащи ромб лаца.

Тяниень пингть В.Д. Шнякин, сонць историческяй наукань кандидат. Эряй и работай Саранск ошса.

Кунардонь пингонь калмолангста муф предметтне характернайхть VIII-XI веконь древнемордовскяй лия калмотнень эзда муф предметтненди.

Степановка велеть ваксса кунардонь пингонь калмоть музь 1985 кизоня Стрельниковскяй совхозонь рабочайхне, конат жуватанди кизонь лагерьса латцесть траксонь потяма установкат. Велеть эзда сон ащи 2,5 вайгяльбе васта Ляча ляйть виде ширеса, кафта лашмотнень еткса. Тяста муф кой-кона предметтне максфт Мордовскяй госуниверситетонь архелогическяй музейти, синь лувкссост бронзовай кафта подвескат, бронзовай гривна, севонень кукшення, кшнинь крез, лама подвескат.

1986 кизоня тяса работасть научно-исследовательскяй институтонь археолокне И.М. Петербургский, В.Н. Шитов и Я.В. Беляев. Мезе тейст удалась содамс? Калмось ульсь прямоугольнай, кувалмоц 176, келец 52 сантиметра, стенанза крутат, потмаксоц ровна. Калмоть юго-западнай ширец калатф. Сонь потмостонза муфт пакарьхть, бронзаста тиф браслет и суркс. Калмоть потмаксоц ацафоль шуфтонь пластинаса.

Ученайхнень мяльснон коряс тяза калмафоль шаба или подростка. Степановка велеть маласа муф сире пингонь калмотне лувондовихть Х векть пенцты и Х1 векть ушетксонцты. Тяста муф шляпа лаца брослетсь сувси тя видонь украшениятнень сяда поздняй вариантснонды. Тяфтама браслеттне, конат канневихть VIII-IX векненди, кода правила, сяда оцюфт и орнаментсновок лия.

ХI векста тяфтама браслетт ашесть тиендев. Крез лаца тиф подвескатне, ученайть В.И. Мартьяновонь валонзон коряс, характернайхть Х веконь идень калмотненди, конат муфт древнемордовскяй лия калмотнень эзда. Тяни Степановка велеть ваксса сире пингонь калмотне юмама- арама лангост. Работатнень пингста 1993 кизоня фкя калмось калафтф, а лядыхне ваясть наземть потмос. Научно-исследовательскяй институтонь ученайхнень мархта корхнемста содавсь, што синь тя вастть лувондсазь историческяй памятникокс и эряви араламс государствать мархта. Атюрьевскяй районца муф сире пингонь кафта калмоланкне кой-конашкада лездыхть историяньконь тонафнемаса. Можна тиемс кой-кодама вывотт. Ванондови регионца Х векть песта и Х1 векть ушетксса эрясть древнемордовскяй плямат: конатнень этнокультурнай признаксна калмамань иласна и материальнай культурасна пцтай фкя лацоннет кунардонь пингонь мордвать мархта, конат сяка жа пингть эрясть Цна и Вад ляень маласа. 2009 кизоня Морд-Козловка велеса, поселкань куттнень строямста, фундаментонди лотконь шувомста, строительхне мусть кукшень кунардонь пингонь меднай ярмак мархта.

Василий Сяткин, Торбеевскяй ПЛ №3 Атерь велень филиалста  преподаватель.

Еще материалы

Комментарии