Сельские вести

Васедемат Геройхнень мархта

Шачемас коре мон 1932-це кизоннян, шачень Атерьса. Азф геройхнень еткста шабакс пингстон, содцень анцек Коновалов Федор Федулловичень. Сон войнада меле работась Атерень сельпоса. Тя пингть, мон сонь ламоксть няендине ульцяста. Махровонь и Акиняевть ашине содце и куленьде.

Эряфсь тиезе стане, што Акиняев и Коновалов Геройхнень мархта содаме и марса работаме. Тя ульсь тяфтане. 1956-це кизоня, мон сань армияста. Служань ниле кизот Тихоокеанскяй флотса.

Тиине и арайне тядязень кудонь тевонзон, васедень ялганень и содаф ломаннень мархта, тоса кармань вешендема работама васта. Фкя суседозе азозе, што Атерень райпотребсоюзу эрявихть работникт. Арьсень и сувань райсоюзонь председательти. Сон азозе, што работникт эрявихть торговай специальностса. И мярьгсь, кда мяльце, сексенда прважатедезь тонафнема Торгово-кооперативнай школав, заготовительнай отделенияв. Мон максонь согласие молемс тонафнема. Сексес покодень лия работаса.

Заготовителькс оформляндамань Федор Федуллович Коновалов. Сон работась Райпотребсоюзса оргинструкторокс (заместитель председателя по кадрам). Эста сон куватьс ванц лангозон, щафолень моряконь щамса.

Кизефтемань коса и мезямокс служань. Мон сембонь азондыне, азондыне сяньге, што армияса тонафнень Военно-морской художественнай студияса, Владивостокскяй художественнай училищаса. Ся валхнень азондомода меле Федор Федуллович, эжелгодсь и пеедезевсь. Аделасак тонафнемацень кармат рисовандама стенгазетат тееньк.

Заготовительнай школать аделайне 1957-це кизоня, октябрьста. Мордпотребсоюзонь заготуправленияста кучемазь работама Атерень райпотребсоюзонь заготконторав инструктором.

Тоса тага васедеме Коноваловонь мархта. Васедеме кода пара ялгат. Сон лятфтазе сянь, што мон «художникан». Кармась сидеста макссема тяфтама тефт, работада меле или выходной шиста, кода стенгазетань сермадомат, плакат, лозунгт и лият. Ся работатнень инкса тейне тиендсть зарплатане.

Лиссь станя, што 1958-це кизоня сексенда монь тага кучемазь тонафнеме Саранскяи торгово-кооперативнай школав, кота ковонь ревизоронь курсс.

Тонафнемс направлениять тага максозе оргинструкторсь Ф.Ф. Коновалов. Сон эста арьсесь тейне парста тонафнемс, кемоста люпштазе кядезень, ашкордамань.

Ревизоронь школать аделайне и сань меки. Тя пингть райпотребсоюзса мольсть кадровай полафткст. Фкясь эздост ся, што Коновалов Ф.Ф. оргинструкторонь вастстонза етафтозь Атерень сельпоти председателькс. Мон ашень арсекшне сянь колга, што вастозонза пуцамазь монь.

Вов тяфтамот монь васедемане Советскяй Союзонь Геройть Федор Федуллович Коноваловонь мархта.

Эста райпотребсоюзть сельповонза колмоль. Стрельникавонь сельпоса председателькс ульсь Акиняев Егор Григорьевич.

Мархтонза мон васеньцеда васедень заготконтораса работамста, телефонца корхтаме заданиянь пяшкодемать колга.

Заготконторась кодама аньцек тефт ашесть тиенде. И жуватань кеднят кочксесть, и учань понат. Тяда башка, кочксесть вторичнай сырье: кшни, котфонь лоскутт, аф эрявикс каготт.

Фкя шобдаваня звонясь контораса телефонц, но Василий Федорович Тишкин ашель тоса. Мон сявине трубкать, кизефтсть директорть. Звонясть Мордпотребсоюзонь заготуправленияста. Кодама только валхт тейне ашесть аз трубкать пачк, мес аф пяшкодькшнесаськ заготовительнай плантть. Мон мярьгонь, што путсаськ марнек вийеньконь, а плановай заданиять вельф пяшкодсаськ.

Стрельникавонь сельпось тя тевса работась кальдявста. Ожка, мярьгонь,-звонян Акиняевоньди, аф ламода сюцеса. Вайгялезень тиине начальниконьнекс, ушедонь телефон пачк учема виденцямат Егор Григорьевичень эзда. Монь корхтамазе ашезь ту Акиняевонь мяльс и эстокиге путомань вастс. Станя пешкодсь трубкати, мон даже трстадень. Мезе калякондась тейне, но мекольце валонза, лядсть навечно монь мялямозон.

-Тееть тоса аш мезе тиендемс, вага сявхть мяшок копорезт и кочксек веленява тряпкат и кшнит. Визькс арась. Пара хоть контораса ашельхть ломатть, ато рахсема вастокс тиелемазь. Мон шарьхкодень, што эцень аф эсь тевозон. Да и киян мон заготконтораса? Нярень нолдазь ащемазень няезе бухгалтероньке.

-Эх, Никифор Васильевич, - мярьгсь Мария Михайловна.

-Тон кинь каршес кеподить вайгяльцень. Минь сонь вакссонза китама? Райкомонь баярхне мархтонза тяпоняста корхнихть. Од кизонди Е.Г. Акиняевонь сельповоц вторичнай сырьень кочкамаса планонц пяшкодезе вельф. Телефонца гайнемась тейне лядсь цебярь урококс эряфоньберьф.

Торгово-кооперативнай школаса ревизоркс тонафнемста, курсовой экзаменда инголе 1-20 майста 1959-це кизоня кучемазь производственнай практикас Атерень райпотребсоюзу. Райпотребсоюзонь ревизорть Иван Тимофеевичень Кузьминонь мархта кучемазь Стрельникавонь сельпов документальнай ревизиянь тиема.

Председательсь Е.Г. Акиняев васфтемазь цебярьста. Стясь шранц ваксста и кемоста люпштазень кяденьконь. Эста тердезе главнай бухгалтеронц Е.Д. Васякинать. Акиняев кизефтезе, коса карматама эряма? Азоськ, што карматама сашендома мековасу велосипедса. Но сяка Егор Григорьевич вешфтсь бухгалтеронц кядьста тееньк кавртира.

Аделавсь практиказе и мон сувань кабинетозонза дневникозень подписандафтома. Егор Григорьевиченьди мон азонь благодарность пяк цебярьста васфтеманкса. Сон стясь столонц ваксста, здоровай, богатырскяй кядьлапшссонза люпштазе монь кядезень, арьсесь парста сдавандамс экзаменнонь и мрдамс работама- родной велезонк. Тя ульсь Егор Григорьевичень мархта мекольце васфтомазе. 1959 кизонь 2 июньста сон кулось.

Егор Григорьевич серьс оцюволь, эчколь. Корхталь кайгиста, но ляпоняста. Работникнень лангс ашезь пешкодкшне, работаса требовательнаель. Сон маштсь шутендама. Сельповонь работникне корхнесть колганза пара валса. Пцтай голь якаль военнай формаса. Хромовай кямонза пиндолдольхть. Армейскяй гимнастерканц мяштьсонза пиндолдсь Героень Золотань тяштсь. Мзярдонга аф юкставихть кафта Советскяй Союзонь Геройхнень Е.Г. Акиняевонь и Ф.Ф. Коноваловонь мархта васедематне.

Тянь фалу азонкшнеса эсь уноконенди и содаф ломаненди. Тянь колга сермадонь лувихнендинге.

Никифор Сяткин, пенсионер, трудонь ветеран.

Еще материалы

Комментарии